నా దేవుడు మీరే.. నా ప్రాణం మీదే.. చంద్రబాబు పాదాలకు బుద్ధా వెంకన్న రక్తాభిషేకం

అభిమానం ఉంటే పాలభిషేకం చేస్తారు లేదా పూలతో అభిషేకం చేస్తారు. కానీ టీడీపీ నేత బుద్ధా వెంకన్న స్టైలే వేరు. టీడీపీ అధినేత చంద్రబాబుపై తన అభిమానం చాటుకునేందుకు.. ఏకంగా రక్తంతో అభిషేకం చేశారు బుద్ధా వెంకన్న. తన రక్తంతో అధినేత చిత్రపటానికి రక్తాభిషేకం చేసి బాస్ మీద తనకు ఉన్న అభిమానాన్ని ప్రదర్శించారు. అయితే బుద్ధా వెంకన్న ఇలా చేయడానికి కూడా ఓ కారణం ఉందండోయ్. వచ్చే ఎన్నికల్లో విజయవాడ వెస్ట్ టికెట్‌ను బుద్ధా వెంకన్న ఆశిస్తున్నారు. అయితే పొత్తులో భాగంగా ఈ టికెట్‌ను జనసేనకు కేటాయించే అవకాశాలు కనిపిస్తున్నాయి. ఈ నేపథ్యంలో విజయవాడ వెస్ట్ టికెట్ సాధ్యం కాకపోతే.. అనకాపల్లి ఎంపీ సీటు ఇవ్వాలంటున్నారు బుద్ధా వెంకన్న. ఇందుకోసం అధినేతను ప్రసన్నం చేసుకునే పనిలో ఈ రకంగా చేశారని టాక్.

ఆదివారం ఉదయం రక్తాన్ని బాటిల్ లోకి నింపిన బుద్ధా వెంకన్న .. గోడపై చంద్రబాబు నాయుడు జిందాబాద్, నా ప్రాణం మీరే అని రక్తంతో రాసుకొచ్చారు. ఆ తర్వాత చంద్రబాబు ఫ్లెక్సీలోని చంద్రబాబు పాదాలకు రక్తాభిషేకం చేశారు. అనంతరం చంద్రబాబు తనకు దేవుడితో సమానమనీ.. స్వామిభక్తిని నిరూపించుకునేందుకే ఇలా చేసినట్లు చెప్పుకొచ్చారు. చంద్రబాబుకు తనకంటే ఎక్కువ విధేయుడు ఎవరు ఉంటారంటూ ప్రశ్నించిన బుద్దా వెంకన్న.. అన్ని అర్హతలు ఉన్న తనకు విజయవాడ వెస్ట్ టికెట్ ఇవ్వాలనీ.. లేదంటే అనకాపల్లి ఎంపీ టికెట్ ఇవ్వాలని అన్నారు. అయితే సీటు విషయంలో తనది విన్నపం మాత్రమే అన్న బుద్దా వెంకన్న ఆయన ఎలాంటి నిర్ణయం తీసుకున్నా కట్టుబడి ఉంటానని స్పష్టం చేశారు.

మరోవైపు తనకు టికెట్ ఇవ్వకపోయినా అధినేతను విమర్శించనని బుద్ధా వెంకన్న చెప్పారు. చంద్రబాబు రాజు అని .. తామంతా ఆయన సైనికులమని చెప్పుకొచ్చారు.చంద్రబాబును బ్లాక్‌మెయిల్‌ చేసినా, బెదిరించినా పుట్టగతులు లేకుండా పోతారని అన్నారు. అయితే బుద్ధా వెంకన్న గతంలో ఎమ్మెల్సీగా పనిచేశారు. ఈసారి ప్రత్యక్ష ఎన్నికల్లో బరిలోకి దిగాలని భావిస్తున్న బుద్ధా వెంకన్న.. విజయవాడ వెస్ట్ లేదా అనకాపల్లి ఎంపీ టికెట్ కావాలని కోరుతున్నారు. సీటు ఇవ్వకపోతే చంద్రబాబుపై ప్రేమపోరాటం చేస్తానంటూ ఇటీవల ప్రకటించిన బుద్ధా వెంకన్న.. ఇప్పుడేమో ఏకంగా రక్తాభిషేకం చేశారు. అయితే సీటు ఇవ్వకుంటే విమర్శించను అంటూ బుద్ధా వెంకన్న ఎమోషనల్ బ్లాక్ మెయిల్ చేస్తున్నారనే విమర్శలు వస్తున్నాయి.