అయోధ్యకు అమితాబ్ బచ్చన్, ఐశ్వర్యరాయ్‌లను పిలిచారు కానీ.. వాళ్లను పిలవలేదు.. మోదీపై రాహుల్ విమర్శలు

అయోధ్య రామ మందిర ప్రారంభోత్సవం గురించి కాంగ్రెస్ ఎంపీ రాహుల్ గాంధీ మరోసారి గుర్తు చేశారు. జనవరి 22 వ తేదీన అంగరంగ వైభవంగా నిర్వహించిన అయోధ్య ప్రాణ ప్రతిష్ఠ కార్యక్రమానికి హాజరు కావాలని.. అందించిన ఆహ్వానాలపై రాహుల్ గాంధీ తీవ్ర స్థాయిలో మండిపడ్డారు. ఈ సందర్భంగానే అయోధ్యకు ఆహ్వానించిన వారి పేర్లను ప్రస్తావిస్తూ.. రాహుల్ గాంధీ చేసిన వ్యాఖ్యలు ప్రస్తుతం తీవ్ర దుమారం రేపుతున్నాయి. అయితే అయోధ్య ప్రారంభోత్సవానికి బీసీ, ఎస్సీ, ఎస్టీలను ఎవరినైనా పిలిచారా అని ప్రశ్నించిన రాహుల్ గాంధీ.. అదే సమయంలో అమితాబ్ బచ్చన్, ఆయన కోడలు ఐశ్వర్యరాయ్‌లను ఆహ్వానించారని ప్రధానమంత్రి నరేంద్ర మోదీ లక్ష్యంగా తీవ్ర ఆరోపణలు చేశారు.

భారత్‌ జోడో న్యాయ్ యాత్ర ప్రస్తుతం ఉత్తర్‌ప్రదేశ్‌లోని ప్రయాగ్‌రాజ్‌లో కొనసాగుతోంది. ఈ క్రమంలోనే యాత్రలో భాగంగా ప్రసంగించిన రాహుల్ గాంధీ ఈ వ్యాఖ్యలు చేశారు. దేశాన్ని నడిపించే వ్యక్తులను అయోధ్య ప్రాణ ప్రతిష్ఠ కార్యక్రమానికి దూరంగా ఉంచారని విమర్శలు చేశారు. అదే సమయంలో బాలీవుడ్ సెలబ్రిటీలు అయిన అమితాబ్ బచ్చన్, ఐశ్వర్యరాయ్ బచ్చన్‌లను అయోధ్యకు ఆహ్వానించారని మండిపడ్డారు. ఒక్క ఓబీసీ, ఎస్సీ, ఎస్టీలకు ఆహ్వానం అందించలేదని విమర్శించారు.

"మీరు రామ మందిర ప్రాణ ప్రతిష్ఠ కార్యక్రమం చూశారా. అందులో ఒక్కరైనా ఓబీసీ, ఎస్సీ, ఎస్టీ ముఖాలను చూశారా. కానీ ఈ కార్యక్రమానికి అమితాబ్ బచ్చన్, ఐశ్వర్య బచ్చన్, ప్రధాని నరేంద్ర మోదీ హాజరయ్యారు. కానీ దేశాన్ని నిజంగా నడిపించే వ్యక్తులను మనం అంత గొప్ప కార్యక్రమంలో చూడలేదు. వాళ్లు దేశాన్ని ఎప్పటికీ నియంత్రించలేరని గుర్తుంచుకోవాలి" అని రాహుల్ గాంధీ వ్యాఖ్యానించారు.

ఇక అయోధ్య ప్రాణ ప్రతిష్ఠ కార్యక్రమానికి హాజరు కావాలని కాంగ్రెస్ పార్టీ తరఫున ఆ పార్టీ జాతీయ అధ్యక్షుడు మల్లిఖార్జున ఖర్గే, ఆ పార్టీ అధినేత్రి సోనియా గాంధీ, లోక్‌సభలో ప్రతిపక్ష నేత అధిర్ రంజన్ చౌదరీకి ఆహ్వానం అందింది. అయితే బీజేపీ ప్రభుత్వం.. అయోధ్య రామ మందిర ప్రారంభోత్సవాన్ని రాజకీయం చేస్తోందని.. వచ్చే లోక్‌సభ ఎన్నికల్లో ఓట్లు పొందేందుకు ప్రయత్నిస్తోందని ఆరోపిస్తూ.. ఈ కార్యక్రమాన్ని బహిష్కరించాయి.