స్వాతంత్య్రం వచ్చినప్పటి నుంచి ఆ ఊర్లో తొలిసారి ఎగిరిన జాతీయజెండా.. గ్రామస్థుల సంబరాలు

స్వాతంత్య్రం వచ్చి 77 ఏళ్లు పూర్తయినా ఇంకా దేశంలోని కొన్ని ప్రాంతాలు.. జనజీవన స్రవంతిలో కలవకుండా ఉన్నాయి. అందులో కొన్ని గిరిజన, ఆదివాసీ గూడాలు ఉండగా.. మరికొన్ని నక్సల్స్ ప్రభావిత ప్రాంతాలు కూడా ఉన్నాయి. ఈ క్రమంలోనే స్వాతంత్ర్యం వచ్చినప్పటి నుంచి జాతీయ జెండా ఎగరని ఒక ఊరిలో తాజాగా మువ్వన్నెల పతాకం ఎగిరింది. దీంతో ఆ గ్రామస్థులు ఆనందంతో సంబరాలు చేసుకుంటున్నారు. అయితే అది మావోయిస్టుల చెరలో ఉన్న గ్రామం కావడం గమనార్హం. ఛత్తీస్‌గఢ్‌లోని సుక్మా జిల్లాలోని పువర్తి గ్రామం ఇప్పుడు వార్తల్లో నిలిచింది.

స్వాతంత్య్రం వచ్చిన తర్వాత మొట్టమొదటిసారి ఆ పువర్తి గ్రామంలో జెండా ఎగిరింది. ఇది మావోయిస్ట్ ప్రభావిత ప్రాంతమైన ఈ పువర్తి.. మావోయిస్ట్‌ అగ్రనేత హిడ్మా స్వగ్రామం కావడం గమనార్హం. ఇక ఆ గ్రామంలో ప్రభుత్వానికి సమాంతరంగా మావోయిస్టులు ప్రభుత్వాన్ని నడిపేవారు. దీంతో ఆ ప్రాంతంలోకి వెళ్లాలంటేనే పోలీసులు వెనక్కి తగ్గేవారు. ఇక హిడ్మా కోసం పోలీసులు ఎన్నో ఆపరేషన్లు చేపట్టినా.. వాటి నుంచి తప్పించుకుని పోలీసులకు సవాల్ విసిరేవాడు.

ఈ క్రమంలోనే పువర్తి చుట్టు పక్కల పోలీస్ చెక్‌పోస్టులు ఏర్పాటు చేస్తూ క్రమంగా ముందుకెళ్లిన భద్రతా బలగాలు చివరికి ఆ గ్రామంలోకి వెళ్లి అక్కడ జెండా ఎగురవేశాయి. దీంతో స్వాతంత్ర్యం సిద్ధించిన తర్వాత తొలిసారి అక్కడ మువ్వన్నెల జెండా రెపరెపలాడింది. బస్తర్ ప్రాంతంలో తరచూ భద్రతా బలగాలపై అత్యంత వ్యూహాత్మకంగా, భీకర దాడులకు హిడ్మా పాల్పడేవాడు. ఈ క్రమంలోనే వామపక్ష తీవ్రవాదం అణచివేతకు భద్రతా బలగాలు తీసుకుంటున్న చర్యల్లో హిడ్మా గ్రామం వద్ద పోలీసు చెక్‌పోస్టు ఏర్పాటు చేయడం అత్యంత కీలక పరిణామంగా మారింది.

ఈ పరిణామాల నేపథ్యంలో ఇప్పుటికీ మావోయిస్టులు చెరలో ఉన్న పువర్తి గ్రామంలో తొలిసారి జాతీయ జెండా ఎగురవేయడంతో స్థానికులు సంబరాలు జరుపుకున్నారు. ఈ క్రమంలోనే పోలీసులు, భద్రతా బలగాలకు వ్యతిరేకంగా.. మావోయిస్టులు భారీ దాడులు చేసేందుకు ప్లాన్ చేశారు. అయితే భద్రతా దళాల తనిఖీలో పలువురు మావోయిస్టులు పట్టుబడ్డారు. అయితే వారిని అదుపులోకి తీసుకున్న తర్వాత పోలీసులు.. గ్రామంలో జెండా ఎగరవేయడానికి సిద్ధం అయ్యారు. ఈ క్రమంలోనే పువర్తి గ్రామంలో సోమవారం జాతీయ జెండా ఎగురవేసి అక్కడి ప్రజలకు స్వేచ్ఛను అందించారు. అంతేకాకుండా తమ అవసరాల కోసం మావోయిస్టులు కూరగాయలు పండించే భూములను కూడా పోలీసులు స్వాధీనం చేసుకున్నారు.

ఆ పువర్తి గ్రామం, చుట్టు పక్కల ప్రాంతం మావోయిస్టులకు శిక్షణ ఇచ్చే శిబిరంగా ఉండేది. సమావేశాలు నిర్వహించుకోవడంతోపాటు స్థానిక యువకులను నక్సలిస్టులుగా మార్చి వారికి శిక్షణ ఇచ్చేవారు. ఈ క్రమంలోనే ఒకప్పుడు పోలీసులు అడుగు పెట్టడానికి భయపడే ఆ ప్రాంతంలో.. గత కొన్ని నెలలుగా పలు పోలీసులు శిబిరాలు ఏర్పాటు చేశారు.