విశాఖ ఫ్లోటింగ్ బ్రిడ్జ్‌ తెగిపోలేదట.. అసలు సంగతి ఇది, వీడియో ఇదిగో!
Andhra Pradesh Telugu | Suryaa Desk | Published : Tue, Feb 27, 2024, 09:19 PM
విశాఖ బీచ్‌లో ప్రారంభించిన ఫ్లోటింగ్ బ్రిడ్జి ఒక్కరోజులోనే తెగిపోయింది. ఆదివారమే ఈ బ్రిడ్జిని ప్రారంభించారు.. సోమవారం నుంచి సందర్శకులను అనుమతించాలని భావించగా.. అంతలోనే అది కాస్తా రెండు ముక్కలైంది.. ప్రభుత్వం తీరుపై విమర్శలు వచ్చాయి. దీంతో అధికారులు క్లారిటీ ఇచ్చారు. ఫ్లోటింగ్ బ్రిడ్జ్‌ పటిష్టతను పరిశీలించేందుకు చేపట్టిన ప్రక్రియపై దుష్ప్రచారం చేస్తున్నారని ఆగ్రహం వ్యక్తం చేశారు.బ్రిడ్జ్‌ నుంచి ప్లాట్‌ఫాంను డీ–లింక్‌ చేసి మాక్‌డ్రిల్‌ నిర్వహిస్తే.. ఫ్లోటింగ్ బ్రిడ్జ్‌ తెగిపోయిందని సోషల్‌ మీడియాలో రాద్దాంతం చేస్తున్నారన్నారు. సోషల్‌ మీడియాలో జరుగుతున్న దుష్ప్రచారం పూర్తిగా అవాస్తవమని, సీసీ కెమెరాలో రికార్డ్‌ అయిన డీ–లింక్‌ చేస్తున్న దృశ్యాన్ని విడుదల చేశారు.
ఫ్లోటింగ్ బ్రిడ్జ్‌ పటిష్టతను పరిశీలించేందుకే బ్రిడ్జ్‌ నుంచి ప్లాట్‌ఫాంను డీ లింక్‌ చేశామని జిల్లా కలెక్టర్‌, మెట్రోపాలిటన్‌ కమిషనర్‌ డాక్టర్‌ మల్లికార్జున తెలిపారు. మాక్‌ డ్రిల్‌లో భాగంగా ఫ్లోటింగ్ బ్రిడ్జ్‌ పటిష్టతను పరిశీలించేందుకే నిర్వాహకులు బ్రిడ్జ్‌ నుంచి ప్లాట్‌ఫాంను విడదీసినట్లు చెప్పారు. దీనికి ఫ్లోటింగ్ బ్రిడ్జ్‌ తెగిపోయిందని సోషల్‌ మీడియాలో దుష్ప్రచారం చేశారన్నార. ఇది పూర్తిగా అవాస్తవమని.. వాతావరణంలో మార్పులు కారణంగానే సోమవారం సందర్శకులను అనుమతించలేదన్నారు. ప్రతి నెలా పౌర్ణమి, అమావాస్య సమయాల్లో సముద్రంలో ఆటుపోట్లు ఉంటాయని.. ఆ సమయాల్లో సాంకేతిక పరిశీలనలో భాగంగా సర్వసాధారణంగా చేపట్టే ప్రక్రియ మాత్రమే అన్నారు. భవిష్యత్తులో కూడా ఇదే విధంగా ఎప్పుటికప్పుడు పటిష్టతను పరిశీలించేందుకు మాక్‌డ్రిల్స్‌ చేపడతామన్నారు.
విశాఖలో పర్యాటకులను మరింత ఆకర్షించే దిశగా వీఎంఆర్‌డీఏ పీపీపీ విధానంలో ఫ్లోటింగ్ బ్రిడ్జ్‌ ఏర్పాటుకు గ్లోబల్‌ టెండర్లు ఆహ్వానించింది. ఇందులో సాయి మోక్షా షిప్పింగ్‌ అండ్‌ లాజిస్టిక్స్‌ సంస్థ దక్కించుకుంది. వీఎంఆర్‌డీఏకు ఏడాదికి రూ.15.3 లక్షలు ముందస్తు చెల్లింపుల ప్రాతిపాదికన ఈ ప్రాజెక్టును చేపట్టింది. కేరళ, కర్నాటక రాష్ట్రాల్లో విజయవంతంగా నడుస్తున్న ఫ్లోటింగ్ బ్రిడ్జ్‌లను పరిశీలించారు. నిపుణులైన కార్మికులతో విశాఖలో సబ్‌మైరెన మ్యూజియానికి సమీపంలో బ్రిడ్జ్‌ ఏర్పాటు చేశారు.
ఈ ఫ్లోటింగ్ బ్రిడ్జిని రాజ్యసభ సభ్యులు వైవీ సుబ్బారెడ్డి చేతుల మీదుగా ప్రారంభించారు. సోమవారం నుంచి సందర్శకులను బ్రిడ్జ్‌ పైకి అనుమతించాలని నిర్వాహకులు భావించారు. అయితే సముద్ర కెరటాల తీవ్రత ఎక్కువగా ఉండడంతో మూడు రోజుల పాటు సందర్శకులకు అనుమతి లేదని ముందుగానే ప్రకటించారు. ఈ క్రమంలో ఫ్లోటింగ్ బ్రిడ్జ్‌ టీ జాయింట్‌ పటిష్టతను పరిశీలించేందుకు మాక్‌ డ్రిల్‌ నిర్వహించాలని భావించారు. దీనిపై అధికారులకు సమాచారం అందించారు. బ్రిడ్జ్‌ నుంచి ప్లాట్‌ఫాంను డీ లింక్‌ చేసి అక్కడకు దగ్గరలో ఏర్పాటు చేసిన యాంకర్లకు దగ్గరగా జరిపి ఉంచారు. వాటి మధ్యలో కనిపించిన ఖాళీ ప్రాంతాన్ని ఫొటో తీసి టీడీపీ నాయకులు ఫ్లోటింగ్ బ్రిడ్జ్‌ తెగిపోయిందని తప్పుడు ప్రచారం చేశారంటున్నారు.
|
|