టీడీపీకి బిగ్ షాక్.. వైసీపీలో చేరిన మాజీ మంత్రి.. మరి ఆయన పరిస్థితి ఏంటో!

ఏపీలో ఎన్నికలు దగ్గర పడుతున్న వేళ.. అంబేద్కర్ కోనసీమ జిల్లాలో టీడీపీకి బిగ్ షాక్ తగిలింది. ఆ పార్టీ సీనియర్ లీడర్, మాజీ మంత్రి గొల్లపల్లి సూర్యారావు వైసీపీ గూటికి చేరారు. టికెట్ తనకు రాదనే అసంతృప్తితో టీడీపీకి గుడ్‌బై చెప్పి.. తాడేపల్లి క్యాంపు కార్యాలయంలో సీఎం వైఎస్ జగన్ సమక్షంలో వైసీపీ కండువా కప్పుకున్నారు. గొల్లపల్లి సూర్యారావు వెంట వైఎస్‌ఆర్‌సీపీ రీజనల్‌ కోఆర్డినేటర్‌ పి.వి.మిథున్‌రెడ్డి, ఎంపీ కేశినేని నాని ఉన్నారు. ఆయనతోపాటుగా పి.గన్నవరం టీడీపీ లీడర్ స్టాలిన్ బాబు కూడా వైసీపీలో చేరిపోయారు.

ఈ సందర్భంగా టీడీపీ అధినేత చంద్రబాబు, నారా లోకేష్ మీద గొల్లపల్లి సూర్యారావు విమర్శలు చేశారు. ఇన్నాళ్లూ నిబద్ధతతో పనిచేసిన తనను పార్టీ నుంచి మెడపట్టి గెంటేసినట్లు చేశారని అన్నారు. అధికారం కోసం చంద్రబాబు మౌనమునిగా మారారన్న గొల్లపల్లి సూర్యారావు.., నారా లోకేష్ దుర్మార్గపు ఆలోచనలు చేస్తూ తన పట్ల నిర్లక్ష్యంగా వ్యవహరించారని విమర్శించారు. అంతకుముందు టీడీపీకి రాజీనామా చేస్తున్నట్లు ప్రకటించిన గొల్లపల్లి సూర్యారావు.. బహిరంగ లేఖ రాశారు. తన ఆత్మగౌరవాన్ని చంద్రబాబు దెబ్బతీసినందునేరాజీనామా చేసినట్లు చెప్పుకొచ్చారు.

2004లో తొలిసారిగా కాంగ్రెస్ నుంచి ఎమ్మెల్యేగా గెలుపొందిన గొల్లపల్లి సూర్యారావు.. వైఎస్ఆర్ మంత్రివర్గంలో చిన్న పరిశ్రమల శాఖ మంత్రిగా పనిచేశారు. రాష్ట్ర విభజన తర్వాత 2014లో టీడీపీలో చేరిన ఆయన.. రాజోలు నుంచి పోటీ చేసి గెలుపొందారు. అనంతరం 2019 ఎన్నికల్లో అదే స్థానం నుంచి మరోసారి బరిలోకి దిగిన గొల్లపల్లి సూర్యారావు.. జనసేన అభ్యర్థి రాపాక వరప్రసాద్ చేతిలో ఓటమి పాలయ్యారు. అప్పటి నుంచి టీడీపీ ఇంఛార్జిగా కొనసాగుతూ వచ్చారు.

మరోవైపు రాపోలు నుంచి జనసేన తరుఫున గెలిచిన రాపాక.. ఆ తర్వాత వైసీపీ గూటికి చేరిపోయారు. వచ్చే ఎన్నికల్లో అదే స్థానం నుంచి వైసీపీ తరుఫున పోటీచేయాలని భావిస్తున్నారు. ఈ నేపథ్యంలో గొల్లపల్లి సూర్యారావు కూడా ఆ పార్టీలోకే చేరటంతో.. టికెట్ ఎవరికి దక్కుతుందనేది ప్రాధాన్యం సంతరించుకుంది. రాజోలు నుంచి జనసేన పోటీ చేయాలని నిర్ణయించిన నేపథ్యంలో టీడీపీలో ఉంటే టికెట్ రాదనే కారణంతోనే గొల్లపల్లి సూర్యారావు వైసీపీ చేరినట్లు తెలుస్తోంది.