అరకు కాఫీ ఎలా ఉంది భువనేశ్వరి?.. చంద్రబాబు‌ ట్వీట్‌, భువనేశ్వరి రిప్లై

తెలుగుదేశం పార్టీ అధినేత చంద్రబాబు నాయుడు, ఆయన సతీమణి నారా భువనేశ్వరి మధ్య సోషల్ మీడియా మాధ్యమం ఎక్స్ వేదికగా జరిగిన సంభాషణ ప్రస్తుతం వైరల్ అవుతోంది. నిజం గెలవాలి యాత్రలో భాగంగా నారా భువనేశ్వరి ప్రస్తుతం ఉత్తరాంధ్ర జిల్లాలలో పర్యటిస్తున్నారు. అందులో భాగంగా బుధవారం ఉదయం భువనేశ్వరి అరకు ప్రాంతంలో పర్యటించారు. అరకు సెంటర్‌లోని అరకు గోల్డ్ కాఫీ సెంటర్ వద్ద గిరిజనులు సాగు చేస్తున్న కాఫీ రుచి చూశారు. దీనిపై చంద్రబాబు ఇంట్రెస్టింగ్ ట్వీట్ చేశారు. సతీమణి భువనేశ్వరి కాఫీ తాగుతున్న ఫోటోను జత చేస్తూ.. కాఫీ ఎలా ఉంది భువనేశ్వరి అంటూ ప్రశ్నించారు. "భువనేశ్వరీ... మన గిరిజన సోదర, సోదరీమణులు పండించే కాఫీ రుచి ఎలా ఉంది?" అని చంద్రబాబు ఎక్స్ వేదికగా సరదాగా ప్రశ్నించారు.

అయితే చంద్రబాబు ట్వీట్‍‌కు భువనేశ్వరి సైతం అంతే సరదాగా రిప్లై ఇచ్చారు. అరకు కాఫీ రుచి నచ్చిందన్న భువనేశ్వరి. .మన ఇంటి కిచెన్‌లోనూ అరకు కాఫీ ప్యాకెట్లు ఉన్నాయంటూ చంద్రబాబుకు గుర్తుచేశారు. అయితే అరకు ప్రకృతి సౌందర్యం, ఇక్కడ ప్రజల ఆప్యాయత మధ్య కాఫీ రుచి మరింత పెరిగిందంటూ భువనేశ్వరి ట్వీట్ చేశారు.

" కచ్చితంగా నచ్చింది అండీ. మన కిచెన్‌లో కూడా అరకు కాఫీ ప్యాకెట్లు ఉన్నాయి. అయినా కూడా అరకు ప్రకృతి సౌందర్యం, ప్రజల మధ్య ఇది ఇంకా రుచిగా ఉంది. మన గిరిజన సోదరీమణులు, సోదరుల ప్రేమే ఈ ప్రత్యేకమైన రుచికి కారణమని అనుకుంటున్నా. దీనిని (అరకు కాఫీ) మీరు అంతర్జాతీయ బ్రాండ్‌గా మార్చినందుకు గర్వపడుతున్నా" అంటూ భువనేశ్వరి రిప్లై ఇచ్చారు. ప్రస్తుతం చంద్రబాబు, భువనేశ్వరి ట్విటర్ సంభాషణ వైరల్ అవుతోండగా.. లవ్ బర్డ్స్ అంటూ నెటిజనం కామెంట్స్ చేస్తున్నారు.

మరోవైపు అరకు పర్యటనలో స్థానిక టీడీపీ లీడర్ దొన్నుదొర అరకు కాఫీ గొప్పతనాన్ని భువనేశ్వరికి వివరించారు. చంద్రబాబు పాలనలో కాఫీ తోటలను ప్రత్యేకంగా ప్రోత్సహించారని వివరించారు. అరకు పర్యటనలో ప్రకృతి అందాలను, ఆహ్లాదకరమైన ప్రదేశాలను పరిశీలించిన భువనేశ్వరి.. అరకును పర్యాటక ప్రదేశంగా ప్రోత్సహించేందుకు మరిన్ని చర్యలు తీసుకోవాల్సి ఉందని అభిప్రాయపడ్డారు. టీడీపీ అధికారంలోకి వస్తే అరకు ప్రాంతాన్ని, కాఫీ తోటల పెంపకాన్ని ప్రోత్సహించేలా మరిన్ని చర్యలు తీసుకోవాలని చంద్రబాబుకు సూచిస్తానని భువనేశ్వరి స్థానికులకు హామీ ఇచ్చారు.