ఏపీలో రైతులకు జగన్ సర్కార్ మరో గుడ్‌న్యూస్.. వారందరికి మార్చి 1 నుంచి పక్కా

ఏపీలో ఆక్వా రైతులకు జగన్ సర్కార్ శుభవార్త చెప్పింది. అర్హులైన ఆక్వా రైతులందరికీ సబ్సిడీపై విద్యుత్‌ సరఫరా చేసేందుకు ప్రభుత్వం చిత్తశుద్ధితో కృషి చేస్తుందని మంత్రులు పెద్దిరెడ్డి రామచంద్రరావు, బొత్స సత్యనారాయణ, డాక్టర్‌ సీదిరి అప్పలరాజు తెలిపారు. విజయవాడలోని మంత్రి పెద్దిరెడ్డి క్యాంప్‌ కార్యాలయంలో ఆక్వా సాధికారికత కమిటీ సమావేశం నిర్వహించారు. ఇటీవల ఈ–ఫిష్‌ సర్వే ద్వారా ఆక్వా జోన్‌ పరిధిలో 10 ఎకరాల్లోపు అర్హత పొందిన 3,467 విద్యుత్‌ కన్‌క్షన్లకు మార్చి ఒకటో తేదీ నుంచి విద్యుత్‌ సబ్సిడీ వర్తింపజేయాలని డిస్కమ్‌లను ఆదేశిస్తూ తీర్మానం చేశారు.

రాష్ట్రంలో 4,68,458 ఎకరాల్లో ఆక్వా సాగవుతుండగా, దానిలో 3,33,593.87 ఎకరాలు ఆక్వాజోన్‌ పరిధిలో 10 ఎకరాల్లోపు ఉన్నట్టుగా ఈ–ఫిష్‌ సర్వే ద్వారా నిర్థారించారు. మొత్తం 66,993 విద్యుత్‌ కనెక్షన్లలో ఇప్పటికే ఆక్వా జోన్‌ పరిధిలో అర్హత పొందిన 50,605 కనెక్షన్లకు విద్యుత్‌ సబ్సిడీ వర్తింపజేస్తుండగా.. తాజాగా కమిటీ ఆమోదంతో ఆ సంఖ్య 54,072కు పెరిగింది. ఆక్వా రైతుల తరఫున రాష్ట్ర ప్రభుత్వం గత నాలుగేళ్లుగా రూ.3,306.5 కోట్లు విద్యుత్‌ సబ్సిడీని డిస్కమ్‌లకు చెల్లించిందన్నారు మంత్రులు.

తాజాగా అర్హత పొందిన కనెక్షన్లకు ఏటా రూ.55 కోట్లు అదనపు భారం పడనుందని మంత్రులు తెలిపారు. ఆక్వా రైతాంగానికి అండగా నిలిచేందుకు సీఎం వైఎస్‌ జగన్‌ అత్యంత ప్రాధాన్యత ఇస్తున్నారని.. నాణ్యమైన సీడ్‌ సరఫరా విషయంలో రాజీపడే ప్రసక్తే లేదన్నారు. ఇక నుంచి అప్సడా అనుమతి పొందిన తర్వాతే విదేశాల నుంచి బ్రూడర్స్‌ను దిగుమతి చేసుకోవాలని.. అలా చేయని కంపెనీలపై చర్యలు తీసుకుంటామని హెచ్చరించారు. కొత్తగా విద్యుత్‌ కనెక్షన్లు పొందేవారిలో అర్హులను గుర్తించి సబ్సిడీ వర్తింపజేసేందుకు మూడు నెలలకు ఒకసారి సమీక్షిస్తామన్నారు.

ఆక్వా ఉత్పత్తుల రేట్లను ఆర్బీకేల ద్వారా ప్రకటిస్తూ, దళారుల చేతుల్లో రైతులు మోసపోకుండా తీసుకున్న చర్యలు సత్ఫలితాలను ఇస్తున్నాయని అధికారులు వివరించారు. వంద కౌంట్‌ రొయ్యలకు కేజీకి రూ.245 ధర ప్రస్తుతం మార్కెట్‌లో లభిస్తోందన్నారు. గుజరాత్, తమిళనాడు, ఒడిశా రాష్ట్రాలతో పోలిస్తే మన రాష్ట్రంలోనే ఎక్కువ రేటు రైతుకు దక్కుతోందన్నారు. మంత్రుల ప్రకటనపై ఆక్వా రైతులు హర్షం వ్యక్తం చేశారు.