కాకినాడలో దారుణం.. పెళ్లిరోజు (లీపు సంవత్సరం) నాడే భార్యను చంపిన భర్త

కాకినాడలో దారుణం జరిగింది.. ప్రేమించి పెళ్లి చేసుకున్న భార్యను భర్త హత్య చేయడం కలకలంరేపింది. పెళ్లిరోజునాడే ఈ ఘోరం జరిగింది.. లీపు సంవత్సరం కావడంతో నాలుగేళ్ల తర్వాత ఫిబ్రవరి 29న వచ్చిన వివాహ రెండో వార్షికోత్సవం రోజునే భార్యను కత్తితో నరికి చంపేశాడు. కాకినాడలోని పప్పుల మిల్లు ప్రాంతానికి చెందిన బందుల నూకరాజు, దివ్యకు ఎనిమిదేళ్ల క్రితం 2016 ఫిబ్రవరి 29న ప్రేమించి పెళ్లి చేసుకున్నారు. వీరికి పాప, బాబు సంతానం. నూకరాజు ఫ్యాబ్రికేషన్‌ కాంట్రాక్టు పనులు చేస్తుంటాడు. ఆ పనుల నిమిత్తం ఇతర ప్రాంతాలకు వెళ్లి రెండుమూడురోజులు ఉండి వస్తుంటాడు.

కొంతకాలంగా భార్య దివ్యపై అనుమానం పెంచుకున్నాడు నూకరాజు. బుధవారం రాత్రి ఇద్దరి మధ్య వాగ్వాదం జరగ్గా కుటుంబ సభ్యులు, బంధువులు వచ్చి సర్ది చెప్పారు. గురువారం ఉదయం బయటకు వెళ్లి వచ్చిన నూకరాజు మళ్లీ భార్యతో గొడవ పడ్డాడు. వారి ఇంట్లో నుంచి పెద్దగా కేకలు వినిపించినా.. రోజూ మాదిరిగానే సాధారణ గొడవే అనుకుని సమీపంలో ఉన్న బంధువులు, స్థానికులు పట్టించుకోలేదు. కొద్ది సేపటికి ఇంట్లో నుంచి దివ్య బయటకు రాగా.. అప్పటికే సిద్ధంగా ఉంచిన కత్తిని తీసుకుని వీధిలో ఆమెపై దాడి చేశాడు. మెడపై తీవ్ర గాయమై అక్కడిక్కడే ప్రాణాలు కోల్పోయింది.

ఆమెను కాపాడేందుకు వెళ్లిన మృతురాలి తోడికోడలు తల్లి లక్ష్మిపై కూడా నూకరాజు కత్తితో దాడి చేయగా.. ఆమె చేతి వేలికి గాయాలయ్యాయి. అడ్డొస్తే నిన్నూ చంపేస్తానని బెదిరించడంతో ఆమె ప్రాణభయంతో పక్కకు వెళ్లిపోయారు. సమాచారం అందుకున్న పోలీసులు ఘటనా స్థలానికి వెళ్లి వివరాలు సేకరించారు. కేసు నమోదు చేసి దర్యాప్తు చేస్తున్నట్లు ఆయన చెప్పారు. నిందితుడి అరెస్ట్‌పై పోలీసులు క్లారిటీ ఇవ్వాల్సి ఉంది.