పీకే తీసేసిన తహశీల్దార్.. ఐప్యాక్ టీమ్ తన్ని తరిమేస్తే జాతకాలు చెప్తున్నాడు: కొడాలి నాని

ఎన్నికల వ్యూహకర్త ప్రశాంత్ కిషోర్ ఏపీ రాజకీయాలపై చేసిన వ్యాఖ్యల మీద వైసీపీ నేతలు, మంత్రులు మండిపడుతున్నారు. చంద్రబాబు దగ్గర డబ్బులు తీసుకుని నోటికొచ్చినట్లు వాగుతున్నారని మండిపడుతున్నారు. పీకేలాంటి వాళ్లు ఎన్ని జాతకాలు, జ్యోతిష్యాలు చెప్పినా కూడా ఏపీలో వైసీపీ విజయాన్ని ఆపలేరని చెప్తున్నారు. తాజాగా మాజీ మంత్రి, వైసీపీ ఎమ్మెల్యే కొడాలి నాని పీకే వ్యాఖ్యలకు కౌంటర్ ఇచ్చారు. పీకేని తీసేసిన తాశీల్దార్‌‌గా అభివర్ణించిన కొడాలి నాని.. ఐప్యాక్ టీమ్ తన్ని తరిమేస్తే చంద్రబాబు దగ్గర డబ్బులు తీసుకుని జాతకాలు చెప్తున్నారని సెటైర్లు వేశారు. పీకేలాంటి వెధవల మాటలను పట్టించుకోవాల్సిన అవసరం లేదంటూ ఘాటు వ్యాఖ్యలు చేశారు.

" ఏపీలో ఏ ప్రభుత్వం వస్తుందో ప్రశాంత్ కిశోర్ జ్యోతిష్యం చెప్పాడు. ఏ రాష్ట్రంలోనూ, ఏ పార్టీ కూడా అతన్ని వ్యూహకర్తగా పెట్టుకోలేదు. ఐ ప్యాక్ నుంచి కూడా ప్రశాంత్ కిశోర్‌ను తన్ని తరిమేశారు. ఐప్యాక్ టీమ్ వైసీపీ కోసం పనిచేస్తోంది. రుషి ఆధ్వర్యంలో ఐప్యాక్ మాకు పనిచేస్తోంది. ఇప్పుడు లగడపాటి రాజగోపాల్ మాదిరిగా ప్రశాంత్ కిశోర్ జ్యోతిష్యం చెప్పడం మొదలెట్టాడు. డబ్బులు తీసుకుని పార్టీల కోసం వ్యూహకర్తగా పనిచేయడం ఆయన వృత్తి. ప్రశాంత్ కిశోర్ తీసేసిన తహశీల్దార్ లాంటోడు. ఐప్యాక్ టీమ్ తన్ని తరిమేస్తే బిహార్‌లో రాజకీయ పార్టీ పెట్టి డిజాస్టర్ అయ్యి డిస్పోజల్ అయ్యాడు. ఎవరూ కూడా వ్యూహకర్తగా పెట్టుకునే అవకాశం లేదు" అని కొడాలి నాని ఫైరయ్యారు.

ఏపీలో వైసీపీ ప్రభంజనాన్ని ఎవరూ ఆపలేరన్న కొడాలి నాని.. పీకేలాంటి వెధవలు చెప్పే మాటలను నమ్మాల్సిన అవసరం లేదన్నారు.

" ఇప్పుడేమో చంద్రబాబు లాంటి పనికిరాని వ్యక్తుల దగ్గర ప్యాకేజీ తీసుకుని జ్యోతిష్యం చెప్తున్నాడు. ప్రశాంత్ కిశోర్ చెప్తే రాష్ట్రంలో 2 నుంచి 3 శాతం ఓట్లు పడతాయని చంద్రబాబు ఆశ. తెలంగాణలో కేసీఆర్ గెలుస్తాడని, రాజస్థాన్, ఛత్తీస్‌ఘడ్‌లలో కాంగ్రెస్ ప్రభుత్వం వస్తుందని పీకే ఎన్నికల ముందు జాతకం చెప్పాడు. కానీ ఏమైంది? ఇప్పుడేమో ఏపీలో జగన్‌కు గెలిచే అవకాశం లేదు. టీడీపీ గెలుస్తుందని జ్యోతిష్యం చెప్తున్నాడు."

"లగడపాటి, పీకేలాంటి వాళ్లు డబ్బులు తీసుకుని సర్వేలు చేయకుండా, ప్రజలను మభ్యపెట్టేందుకు ఇలాంటి మాటలు మాట్లాడుతున్నారు. ఇలాంటి పనికిరాని వ్యక్తులు చెప్పే మాటలను రాష్ట్ర ప్రజలు పట్టించుకోరు. జగన్ ప్రభంజనాన్ని అడ్డుకునే శక్తి, సామర్థ్యం పీకే, చంద్రబాబులకు లేదు. గతం కంటే అత్యధిక మెజారిటీతో జగన్ అధికారంలోకి వస్తాడు. పీకేలాంటి వెధవల మాటలను పట్టించుకోవాల్సిన అవసరం లేదు" అని కొడాలి నాని విమర్శించారు.