రేపు ఢిల్లీకి పవన్ కళ్యాణ్.. రాగానే కీలక నిర్ణయం!

ఏపీలో ఎన్నికలు దగ్గరపడుతున్నాయి. మరో వారం, పది రోజుల్లో ఎన్నికల షెడ్యూల్ ప్రకటించే అవకాశం ఉంది. అయితే ఇప్పటికీ కూడా టీడీపీ, జనసేనతో బీజేపీ చేరుతుందా లేదా అనే విషయమై సస్పెన్స్ కొనసాగుతోంది. పొత్తు విషయమై ఇప్పటికే టీడీపీ అధినేత చంద్రబాబు నాయుడు బీజేపీ పెద్దలతో భేటీ అయ్యారు. పలు విషయాలపై చర్చించారు. అయితే రోజులు గడుస్తున్నా కూడా బీజేపీ వైపు నుంచి ఎలాంటి ప్రకటన రాలేదు. దీంతో తొలి విడతగా అభ్యర్థులను సైతం టీడీపీ, జనసేన ప్రకటించేశాయి. బీజేపీ కలిసి వస్తుందేమోననే కారణంతో మరికొన్ని సీట్లకు అభ్యర్థులను ప్రకటించలేదు. ఇలాంటి పరిస్థితుల్లో జనసేన అధినేత పవన్ కళ్యాణ్ బుధవారం ఢిల్లీ వెళ్లనున్నారు. పొత్తుల మీద బీజేపీ పెద్దలతో చర్చించేందుకే పవన్ హస్తినకు వెళ్తున్నట్లు తెలిసింది.

ఢిల్లీ వెళ్లనున్న జనసేనాని.. కమలం పార్టీ పెద్దలతో పొత్తులు, సీట్ల కేటాయింపుపై చర్చించనున్నట్లు సమాచారం. ఇప్పటికే జనసేనకు 24 అసెంబ్లీ, 3 లోక్‌సభ స్థానాలను కేటాయించారు. అయితే కేవలం ఐదుసీట్లకు మాత్రమే అభ్యర్థులను ప్రకటించారు పపన్ కళ్యాణ్. మిగిలిన స్థానాలకు మరో రెండు మూడురోజుల్లో అభ్యర్థులను ప్రకటిస్తారని తెలుస్తోంది. మరో పది మందితో రెండో జాబితా ప్రకటించే అవకాశం ఉందని జనసేన వర్గాలు చెబుతున్నాయి. అయితే ఢిల్లీ నుంచి తిరిగి వచ్చిన తర్వాత పేర్లు ప్రకటిస్తారని సమాచారం.

మరోవైపు పొత్తుల మీద, టీడీపీని ఎన్డీయేలో చేర్చుకోవటం మీద బీజేపీ రాష్ట్ర నాయకత్వం మొత్తం నిర్ణయాధికారాన్ని బీజేపీ అధిష్ఠానానికే వదిలేసింది. ఢిల్లీ పెద్దల సూచనల ప్రకారం ఎన్నికల బరిలో నిలుస్తామని కాషాయపార్టీ నేతలు చెబుతున్నారు. ఇదే సమయంలో ఒంటరిగా పోటీ చేయాల్సి వచ్చినా ఇబ్బందులు తలెత్తకుండా ముందస్తు జాగ్రత్తలు తీసుకుంటున్నారు. బీజేపీ తరుఫున పోటీ చేసేందుకు దరఖాస్తులు కూడా భారీగానే వచ్చినట్లు తెలుస్తోంది. అయితే హైకమాండ్ ఏ నిర్ణయం తీసుకున్నా కట్టుబడి ఉంటామని ఏపీ బీజేపీ నేతలు అంటున్నారు.

మరోవైపు బుధవారం ( మార్చి6) ఎన్డీఏ పక్షాల సమావేశం జరగనుంది. ఈ సమావేశాల్లోనే టీడీపీని ఎన్డీయేలోకి తీసుకునే విషయంలో క్లారిటీ ఇస్తారనే ప్రచారం జరుగుతోంది. పవన్ కళ్యాణ్‌తో భేటీ తర్వాత ఈ విషయంలో కమలం పార్టీ పెద్దలు ఓ నిర్ణయాన్ని వెల్లడిస్తారని సమాచారం. ఎన్నికలు సమీపిస్తున్న నేపథ్యంలో త్వరగా నిర్ణయాన్ని తెలియజేయాలని అభిప్రాయం రెండు పార్టీల్లో వ్యక్తమవుతోంది.