తిరుపతిలో గొల్లుమన్న గ్లాస్.. జనసేన అభ్యర్థిపై ఇంఛార్జి సంచలన వ్యాఖ్యలు

తిరుపతిలో జనసేన పార్టీకి తలనొప్పులు తప్పడం లేదు. తిరుపతి ఎమ్మెల్యే సీటును జనసేన పార్టీ.. చిత్తూరు ఎమ్మెల్యే ఆరణి శ్రీనివాసులుకు కేటాయించింది. వైసీపీ నుంచి వచ్చిన శ్రీనివాసులకు పవన్ కళ్యాణ్ తిరుపతి ఎమ్మెల్యే సీటు కట్టబెట్టారు. ఈ నేపథ్యంలో తిరుపతి జనసేనలోని ఓ వర్గం ఆయనకు సహకరించడం లేదు. ఆరణి శ్రీనివాసులకు టికెట్ కేటాయించడంపై తిరుపతి జనసేన ఇంఛార్జి కిరణ్ రాయల్ అసంతృప్తితో ఉన్నారు. ఈ క్రమంలోనే కిరణ్ రాయల్ మంగళవారం సంచలన వ్యాఖ్యలు చేశారు.

జనసేన అభ్యర్థి ఆరణి శ్రీనివాసులు ఇంకా వైసీపీ ఎమ్మెల్యేగానే వ్యవహరిస్తున్నారని విమర్శించారు. వార్డుల్లో కేడర్‌ను మార్చుతూ గందరగోళం సృష్టిస్తున్నారని ఆరోపించారు. జనసేన అధ్యక్షుడు పవన్ కళ్యాణ్ కోసం పనిచేయడానికి తిరుపతి జనసేన క్యాడర్ సిద్ధంగా ఉందన్న కిరణ్ రాయల్.. తిరుపతిలో జనసేన తరుఫున కుక్కకు పెట్టినా భారీ మెజారిటీతో గెలిపిస్తామని సంచలన వ్యాఖ్యలు చేశారు.

మరోవైపు అసంతృప్తితో ఉన్న కిరణ్ రాయల్‌ను బుజ్జగించేందుకు ఆరణి శ్రీనివాసులు మంగళవారం ఆయన ఇంటికి వెళ్లారు. దీనిపైన కూడా కిరణ్ రాయల్ సెటైర్లు వేశారు. తిరుపతి జనసేన ఇంఛార్జిగాఉన్న తనను కలిసేందుకు ఆరణి శ్రీనివాసులుకు ఈ రోజు సమయం దొరికిందంటూ ఎద్దేవా చేశారు.మరోవైపు తాను రూ.2 కోట్లు డిమాండ్ చేసినట్లు పేపర్లలో వార్తలు రాయిస్తున్నారన్న కిరణ్ రాయల్...రూ. 2 కోట్లు కాదు రూ. 10 కోట్లు లేదంటే 15 కోట్లని చెబితే బాగుంటుందని అన్నారు.తిరుపతిలో వైసీపీని ఎదిరించే దమ్ము జనసేనకు మాత్రమే ఉందన్న కిరణ్ రాయల్.. తిరుపతిలో జనసేన తరుఫున కుక్కను నిలబెట్టినా భారీ మెజారిటీ గెలిపిస్తామన్నారు.

మరోవైపు తిరుపతి ఎమ్మెల్యే సీటును శ్రీనివాసులుకు కేటాయించడాన్ని తిరుపతి మాజీ ఎమ్మెల్యే, టీడీపీ నేత సుగుణమ్మ సైతం వ్యతిరేకిస్తున్నారు. మొన్నటి వరకూ వైసీపీలో ఉన్న వ్యక్తికి టికెట్ ఇవ్వడం ఏమిటని ప్రశ్నించారు. అధినేత నిర్ణయాన్ని తాము గౌరవించి సర్దుకుపోయినా.. పార్టీ క్యాడర్ మాత్రం అంగీకరించలేదంటూ సుగుణమ్మ సోమవారం కన్నీళ్లు పెట్టుకున్నారు. జనసేన, టీడీపీ నేతల నుంచి తీవ్ర వ్యతిరేకత వ్యక్తమవుతున్న నేపథ్యంలో అసమ్మతి గళాలకు సర్దిచెప్పడానికి శ్రీనివాసులు బాగా కష్టపడాల్సి ఉంటుందని రాజకీయ విశ్లేషకులు అభిప్రాయపడుతున్నారు.