అమలాపురం ఆర్టీసీ డిపోలో ఆంబోతు బీభత్సం.. రెండు గంటల హైడ్రామా, చివరికి క్రేన్ సాయంతో
Andhra Pradesh Telugu | Suryaa Desk | Published : Tue, Mar 26, 2024, 08:06 PM
డాక్టర్ బీఆర్ అంబేద్కర్ కోనసీమ జిల్లా అమలాపురం ఆర్టీసీ డిపోలో ఆంబోతు వీరంగం సృష్టించింది. గ్యారేజీలోకి దూసుకుపోయిన ఆంబోతును బయటకు రప్పించేందుకు ఒకేసారి నాలుగైదు బస్సులు ముందుకు రావడంతో.. బెదిరిన ఆంబోతు మళ్లీ డిపోలోకి పరిగెత్తింది. అక్కడ ప్రయాణికులపైకి ఎక్కడ దూసుకు వస్తుందోనని ఆర్టీసీ అధికారులు భయపడ్డారు. డిపోలో ఆంబోతును చూసి చాలామంది ప్రయాణికులు భయంతో పరుగులు తీశారు. రెండు గంటల పాటు అక్కడ వీరంగం సృష్టించింది.
ఆంబోతు డిపో నుంచి రోడ్డెక్కి ముమ్మిడివరం గేటు సెంటరుకు చేరుకుంది. అక్కడ కూడా కొద్దిసేపు భీభత్సం సృష్టించడంతో పలువురికి గాయాలయ్యాయి. వారిలో ఒకరిని ఆసుపత్రికి తరలించి వైద్యం అందిస్తున్నాు. ఆంబోతు దెబ్బకు భయపడిన స్థానికులు వెంటనే పోలీసులకు సమాచారం ఇవ్వగా.. పోలీసులు, అగ్నిమాపక సిబ్బంది అతికష్టం మీద ఆంబోతును తాళ్లతో బంధించి క్రేన్ సాయంతో మున్సిపాలిటీకి సంబంధించిన ట్రాక్టర్లోకి చేర్చారు.. అక్కడి నుంచి వేరే ప్రాంతానికి తరలించారు. దీంతో స్థానికులు ఊపిరి పీల్చుకున్నారు.
|
|