బెంగాల్‌లో ఆకస్మిక తుఫాను బీభత్సం: ఐదుగురు మృతి.. 500 మందికి గాయాలు
national | Suryaa Desk | Published : Mon, Apr 01, 2024, 10:34 PM
ఆదివారం సాయంత్రం పశ్చిమ్ బెంగాల్‌లోని పలు ప్రాంతాలపై ఆకస్మిక గాలివాన విరుచుకుపడింది. ముఖ్యంగా జల్‌పాయ్‌గురి జిల్లాలో తుఫాను భారీ విధ్వంసం సృష్టించింది. ఈదురు గాలుల వల్ల జిల్లా కేంద్రంతోపాటు మైనగురి తదితర పరిసరాల్లో అపార నష్టం వాటిల్లింది. హఠాత్తుగా వచ్చిన ఈ తుఫాను ధాటికి వందలాది నివాసాలు ధ్వంసమయ్యాయి. పలుచోట్ల చెట్లు, విద్యుత్‌ స్తంభాలు నేలకొరిగాయి. ఈ నేపథ్యంలో రాజర్‌హట్, బర్నీష్, బకాలీ, జోర్పక్డి, మధబ్దంగా, సప్తిబరి ప్రాంతాలు ఎక్కువగా ప్రభావితమయ్యాయి. ఆకస్మిక తుఫాను కారణంగా ఐదుగురు మృతిచెందగా, మరో 500 మంది గాయపడినట్లు అధికారులు ప్రకటించారు.
మరోవైపు, తుఫాను‌కు ప్రభావితమైన జల్‌పాయ్‌గురికి బెంగాల్ సీఎం మమతా బెనర్జీ ఆదివారం అర్ధరాత్రి కోల్‌కతా నుంచి చేరుకున్నారు. జల్‌పాయ్‌గురి సూపర్ స్పెషాలిటీ ఆస్పత్రిలో చికిత్స పొందుతున్న బాధితులను ఆమె పరామర్చించారు. తుఫాను బాధిత కుటుంబాలను ఆదుకుంటామని, అన్ని రకాలుగా ప్రభుత్వం సాయం చేస్తుందని ముఖ్యమంత్రి భరోసా ఇచ్చారు. ఆకస్మిక తుఫాను కారణంగా చనిపోయిన వారి కుటుంబాలకు ప్రధాని నరేంద్ర మోదీ సానుభూతి తెలిపారు. సహాయక చర్యల్లో బీజేపీ కార్యకర్తలు పాల్గొనాలని, అధికారులు అవసరమైన చర్యలు తీసుకోవాలని మోదీ ట్వీట్ చేశారు.
ఆకస్మిక తుఫాను దెబ్బకు జల్‌పాయ్‌గురి చిగురుటాకులా వణికిపోయింది. భీకర గాలులకు ఇళ్లు, మోటార్‌సైకిళ్లు, కార్లు ఎగిరిపడ్డాయి. తుఫాను ప్రభావం పొరుగు జిల్లాలు కూచ్‌బెహార్, అలీపుర్‌దువార్‌లలో కూడా కనిపించింది. తుఫాను సుమారు 10 నిమిషాల పాటు కొనసాగిందని, ఇది తీస్తా నది దిగువ నుంచి ప్రారంభమై భారీ శబ్దంగా మారి పలు చెట్లను నేలకూల్చిందని ప్రత్యక్ష సాక్షులు తెలిపారు. ఆదివారం జల్‌పాయ్‌గురి పట్టణంలోని చాలా ప్రాంతాలు, పొరుగున ఉన్న మైనగురిలోని అనేక ప్రాంతాలలో వడగళ్లతో కూడిన బలమైన గాలులు వీచాయి.
|
|