నా భర్తను చంపితే రూ.50 వేలు రివార్డు.. వాట్సాప్ స్టేటస్ పెట్టిన వివాహిత

తన భర్తను చంపితే రూ.50వేలు రివార్డు ఇస్తానని ఓ వివాహిత తన వాట్సాప్ స్టేటస్‌ పెట్టుకోవడం సంచలంగా మారింది. దంపతుల మధ్య విబేధాల కారణంగా ఆమె ఇలా వాట్సప్‌ స్టేటస్‌లో పెట్టింది. విస్మయానికి గురిచేసే ఈ ఘటన ఉత్తర్‌ప్రదేశ్‌లోని ఆగ్రా జిల్లాలో చోటుచేసుకుంది. భార్య స్టేటస్‌ చూసి భయపడిపోయిన సదరు భర్త.. పోలీస్ స్టేషన్‌కు వెళ్లి ఫిర్యాదు చేశారు. ఆమె నుంచి తనకు ప్రాణహాని ఉందని, తనకు రక్షణ కల్పించాలని పోలీసులను వేడుకున్నాడు. అంతేకాదు, గతంలో ఆమె స్నేహితులు కూడా తనను బెదిరించాడని అతడు ఆరోపించాడు. దీంతో పోలీసులు కేసు నమోదుచేసి, దర్యాప్తు చేపట్టారు.

వివరాల్లోకి వెళ్తే... ఆగ్రాలోని బాహ్‌కు చెందిన బాధితుడికి.. జులై 9, 2022లో మధ్యప్రదేశ్‌లోని భింద్‌కు చెందిన యువతితో వివాహం జరిగింది. పెళ్లైన కొద్ది కాలానికే భార్యాభర్తల మధ్య గొడవలు మొదలయ్యాయి. ఇరువురూ తరుచూ ఘర్షణ పడటంతో ఐదు నెలలకే భర్తను వదిలి ఆమె డిసెంబరు 2022లో పుట్టింటికి వెళ్లిపోయింది. అప్పటి నుంచి ఆమె తన తల్లిదండ్రుల వద్దే ఉంటుంది. అంతేకాదు, ప్రస్తుతం ఆమె భింద్ పోలీస్ స్టేషన్‌లో భరణం కోసం దావా వేసింది. భర్త నుంచి తనకు భరణం ఇప్పించాలని ఆమె కోరింది. భార్యను కాపురానికి తీసుకొచ్చేందుకు భర్త చేసిన ప్రయత్నాలు ఫలించలేదు.

అయితే, డిసెంబర్ 21, 2023న తాను భింద్ నుంచి తిరిగి వస్తుండగా అత్తమామలు తనను చంపుతామని బెదిరించారని భర్త పేర్కొన్నాడు. ఇది జరిగిన తర్వాత తనను చంపిన వారికి రూ.50 వేలు రివార్డు ఇస్తానని వాట్సాప్ స్టేటస్‌గా పెట్టిందని ఆరోపించాడు. అంతేకాదు, తన ఇంటిపక్కనే అద్దెకు ఉండే ఓ వ్యక్తితో తన భార్య వివాహేతర సంబంధం పెట్టుకుందని సంచలన ఆరోపణలు చేశాడు. తమ మధ్య గొడవలకు అదే కారణమని తెలిపారు. తన భార్య, ఆమె ప్రియుడు ఫోన్‌చేసి చంపుతామని పలుసార్లు బెదిరింపులకు పాల్పడ్డారని తెలిపారు. కాగా, ఐదేళ్ల కిందట గురుగ్రామ్‌లో ఇలాంటి కేసు ఒకటి వెలుగులోకి వచ్చింది. తన భర్తను చంపితే రూ.16 లక్షలు ఇస్తానని ఓ మహిళ ప్రకటించింది.