ఏపీ ప్రజలకు శుభవార్త.. విజయవాడ నుంచి మరో కొత్త విమాన సర్వీసు ప్రారంభం
Andhra Pradesh Telugu | Suryaa Desk | Published : Thu, Apr 18, 2024, 09:08 PM
విజయవాడ ఎయిర్‌పోర్ట్ నుంచి కొత్త విమాన సర్వీసు ప్రారంభమైంది. హైదరాబాద్కు ఎయిరిండియా ఎక్స్‌ప్రెస్‌ నూతన బోయింగ్‌ విమాన సర్వీసును తీసుకొచ్చారు. విజయవాడ ఎయిర్‌పోర్టు నుంచి 186 సీట్లతో ఈ భారీ బోయింగ్‌ సర్వీసు మంగళవారం ప్రారంభమైంది. ఈ విమాన సర్వీసును ఎయిర్‌పోర్టు డైరెక్టర్‌ ఎం.లక్ష్మీకాంత్‌రెడ్డి లాంఛనంగా ప్రారంభించారు.. ప్రయాణికులకు బోర్డింగ్‌ పాస్‌ను అందించారు. విజయవాడ నుంచి హైదరాబాద్కు రోజూ ఉదయం 8.55 గంటలకు ఈ విమానం బయల్దేరుతుంది. 10 గంటలకు హైదరాబాద్కు చేరుకుంటుంది. బోయింగ్‌ విమానంలో 8 బిజినెస్‌ క్లాస్‌, 178 ఎకానమీ క్లాస్‌ సీటింగ్‌ ఉంది.
హైదరాబాద్కు ఎయిరిండియా ఎక్స్‌ప్రెస్‌ నూతన సర్వీసుతో ఈ మార్గంలో ఇతర విమానయాన సంస్థలతో పోటీ ప్రారంభమైంది. హైదరాబాద్‌ రూట్‌లో ఇప్పటి వరకు దేశీయ దిగ్గజ ప్రైవేట్‌ విమానయాన సంస్థ ఇండిగో సర్వీసులు ఎక్కువ నడుస్తున్నాయి. విజయవాడ నుంచి ప్రస్తుతం హైదరాబాద్కు 8 విమాన సర్వీసులు నడుస్తున్నాయి. వీటిలో ఏడు సర్వీసులు ఇండిగో ఎయిర్‌లైన్స్‌వే.. ఒక సర్వీసు మాత్రం ఎయిరిండియాకు చెందినది. ప్రస్తుత నూతన సర్వీసుతో హైదరాబాద్‌ రూటులో 9వ విమాన సర్వీసు మొదలైనట్టే. చార్మినార్‌-ఉండవల్లి కేవ్స్‌ పేరుతో ఈ ఎయిరిండియా ఎక్స్‌ప్రెస్‌ నడుస్తుంది. కాగా, ఈ కొత్త సర్వీసు ఇండిగోకు గట్టి పోటీ ఇవ్వనుంది. ధరలు తగ్గించే పరిస్థితి వస్తుందని అంతా భావిస్తున్నారు. ఇండిగో విమానాలన్నీ చిన్నవి కావటం, ఎయిరిండియాది భారీ బోయింగ్‌ కావడంతో ప్రాధాన్యత పెరిగే అవకాశం ఉంది.
|
|