చంద్రబాబును అందరూ మర్చిపోయినా, నేను మర్చిపోను: సింగర్ స్మిత

టీడీపీ అధినేత చంద్రబాబు నాయుడు పుట్టినరోజు సందర్భంగా ప్రముఖుల నుంచి శుభాకాంక్షలు వెల్లువెత్తుతున్నాయి. సోషల్ మీడియా వేదికగా చంద్రబాబుకు పుట్టినరోజు శుభాకాంక్షలు తెలియజేస్తున్నారు. దీంతో ఎక్స్‌లో #HBDBabu ట్రెండ్ అవుతోంది. మరోవైపు తెలుగుదేశం పార్టీ అధినేత చంద్రబాబు పుట్టినరోజు సందర్భంగా.. పాప్ సింగర్ స్మిత గతంలో మాట్లాడిన ఓ వీడియో ప్రస్తుతం వైరల్ అవుతోంది. ఓ ఇంటర్వ్యూలో చంద్రబాబు గురించి సింగర్ స్మిత మాట్లాడిన వీడియోను టీడీపీ శ్రేణులు వైరల్ చేస్తున్నాయి. ఇక ఈ వీడియోలో చంద్రబాబుపై తనకు ఉన్న అభిమానాన్ని స్మిత చెప్పుకొచ్చారు.

కష్టాలు, సంక్షోభాలు వచ్చినా చంద్రబాబు కుంగిపోలేదని.. ఆయనంటే తనకు అత్యంత గౌరవమని స్మిత చెప్పారు. అందుకే అందరూ ఆయనను మర్చిపోయినా.. తాను మాత్రం మర్చిపోనని చెప్తున్నా్రు.

"జైళ్లో పెట్టడం వలన ఆయన స్థాయి మారదు. ఆయన ఎంత కష్టపడతారో అందరూ చూశారు. ఆ వయసులో ఆయన్ని జైళ్లో ఉంచడం బాధేసింది. మనమంతా ఇంత సంతోషంగా జీవిస్తున్నామంటే ఎవరు కారణం? ఇదంతా ఆయన చలవే. ఆయన ఒక మాటన్నారు. ఇదంతా నేను చేసినప్పుడు ఇక్కడున్న వాళ్లంతా పుట్టి ఉండరమ్మా అని నాతో అన్నారు. అయినా తన కోసం వచ్చారని.. స్టేడియం నిండిపోయిందని అన్నారు. ఆయన స్థాయిని ఎవరూ తగ్గించలేరు. ఆయనంటే నాకు కృతజ్ఞత ఎక్కువ".. అని స్మిత చెప్పారు.

" ఆయన్ని నేను రాజకీయనేతగా మాత్రమే చూడట్లేదు. అందరూ మర్చిపోయినా.. ఆయన్ని నేను మర్చిపోను. రాజకీయాలతో, పార్టీలతో నాకు సంబంధం లేదు. కానీ వ్యక్తిగా ఆయనంటే నాకు గౌరవం. కృతజ్ఞత. ఆయన గురించి తెలిసిన మనిషిగా ఆయన గురించి గొప్పగా మాట్లాడుతా.. మాట్లాడుతూనే ఉంటా. ఒక తరం కోసం కాదు.. భవిష్యత్ తరాల కోసం ఉపయోగపడేలా పని చేసిన నాయకుడు ఆయన. అలాంటి వ్యక్తిని తీసుకెళ్లి జైళ్లో పెడితే ఎవరూ ఏం సాధించేది ఉండదు. మరింత బలంగా మనముందుకు వస్తారు" అని సింగర్ స్మిత చెప్పారు.

 మరోవైపు సింగర్ స్మిత.. గతంలో కూడా చంద్రబాబుకు మద్దతుగా వ్యాఖ్యలు చేశారు. అనుభవం ఉన్న వాళ్లకే ఓటేయాలంటే పేర్లు ప్రస్తావించకుండానే 2019 ఎన్నికల సమయంలో ఆమె వీడియో రిలీజ్ చేశారు. అలాగే అమరావతి రాజధాని రైతుల ఉద్యమ సమయంలోనూ సింగర్ స్మిత రైతులకు మద్దతుగా ట్వీట్లు చేశారు. ఈ క్రమంలోనే చంద్రబాబు పుట్టినరోజు సందర్భంగా స్మిత చేసిన వ్యాఖ్యలు ప్రస్తుతం వైరల్ అవుతున్నాయి.