పిల్లలు పోర్న్ వీడియోలు చూడటం నేరం కాకపోవచ్చు కానీ

ప్రస్తుతం ఆన్‌లైన్‌లో పెరిగిపోతున్న పోర్న్‌ వీడియోలు తీవ్ర సమస్యగా మారాయి. కొందరు ఈ అశ్లీల వీడియోలు చూసి వాటికి బానిసలై.. సమాజంలో అనేక అకృత్యాలకు పాల్పడటం తీవ్ర ఆందోళన కలిగిస్తోంది. ఇక ఈ పోర్న్ వీడియోలను చిన్న పిల్లలను ఉపయోగించి తీయడం మరింత ఆందోళనకు గురి చేస్తోంది. ఈ క్రమంలోనే ఈ విషయంపై స్పందించిన సుప్రీంకోర్టు కీలక వ్యాఖ్యలు చేసింది. చిన్నారులు అశ్లీల వీడియోలు చూడటం నేరం కాకపోవచ్చేమో గానీ.. పిల్లలను ఉపయోగించి అశ్లీల వీడియోలు తీయడం తీవ్రమైన విషయమని తెలిపింది. అంతేకాకుండా చిన్నారులతో వీడియోలు తీయడంనేరమని శుక్రవారం సుప్రీంకోర్టు తేల్చి చెప్పింది.

చిన్న పిల్లల పోర్న్ వీడియోలు డౌన్‌లోడ్‌ చేసుకుని చూడటాన్ని పోక్సో, ఐటీ చట్టాల కింద నేరంగా పరిగణించలేమని మద్రాసు హైకోర్టు ఇచ్చిన తీర్పును సవాలు చేస్తూ దాఖలైన పిటిషన్‌పై విచారణ జరిపిన చీఫ్ జస్టిస్ ఆఫ్ ఇండియా జస్టిస్ డీవై చంద్రచూడ్ నేతృత్వంలోని ద్విసభ్య ధర్మాసనం ఈ వ్యాఖ్యలు చేసింది. చిన్నారుల సంక్షేమం కోసం పని చేస్తున్న ఫరీదాబాద్‌కు చెందిన ‘జస్ట్‌ రైట్స్‌ ఫర్‌ చిల్డ్రన్‌ అలయెన్స్‌’.. ఢిల్లీకి చెందిన ‘బచ్‌పన్‌ బచావో ఆందోళన్‌’ అనే ఎన్జీవోలు.. మద్రాస్ హైకోర్టు ఇచ్చిన తీర్పును సుప్రీంకోర్టులో సవాల్ చేశాయి.

ఓ 28 ఏళ్ల యువకుడు తన సెల్‌ ఫోన్‌లో చిన్నపిల్లల అశ్లీల వీడియోలను డౌన్‌లోడ్ చేసుకోగా.. ఆ వ్యక్తిపై కేసు నమోదైంది. అయితే ఈ కేసులో ఈ ఏడాది జనవరి 11 వ తేదీన విచారణ చేపట్టిన మద్రాసు హైకోర్టు.. ఆ యువకుడికి వ్యతిరేకంగా క్రిమినల్‌ చర్యలు తీసుకోకుండా రద్దు చేస్తూ సంచలన తీర్పు వెలువరించింది. దీంతో జస్ట్‌ రైట్స్‌ ఫర్‌ చిల్డ్రన్‌ అలయెన్స్‌, బచ్‌పన్‌ బచావో ఆందోళన్‌ ఎన్జీఓల తరఫున సీనియర్‌ న్యాయవాది హెచ్‌.ఎస్‌.ఫుల్కా సుప్రీంకోర్టులో వాదనలు వినిపించారు. మరోవైపు.. ఈ కేసులో నిర్దోషిగా ప్రకటించిన యువకుడి తరఫున హాజరైన లాయర్.. వాట్సాప్‌లో ఆ వీడియోలు ఆటోమేటిక్‌గా డౌన్‌లోడ్‌ అయినట్లు కోర్టుకు తెలిపారు.

మద్రాస్ హైకోర్టు ఇచ్చిన తీర్పుపై విచారణ జరిపిన సీజేఐ జస్టిస్‌ డీవై చంద్రచూడ్‌, జస్టిస్‌ జేబీ పార్దీవాలాలతో కూడిన ధర్మాసనం.. ఈ కేసులో తీర్పును రిజర్వ్ చేసింది. ఈ సందర్భంగా కోర్టు కొన్ని కీలక సూచనలు చేసింది. ఎవరికైనా చిన్నారుల పోర్న్ వీడియోలు ఇన్‌బాక్సులో వచ్చి చేరితే సంబంధిత చట్టాల కింద పరిశీలనను నివారించడానికి వాటిని డిలీట్‌ చేయాలని పేర్కొంది. అలా చేయకుండా ఐటీ నిబంధనలను ఉల్లంఘిస్తే అప్పుడు అది నేరం అవుతుందని స్పష్టం చేసింది. మరోవైపు.. ఈ కేసుపై తన అభిప్రాయాలను ఏప్రిల్‌ 22 వ తేదీలోగా లిఖితపూర్వకంగా తెలపాలని జాతీయ బాలల హక్కుల సంఘాన్ని జస్టిస్ డీవై చంద్రచూడ్ కోరారు.