అనంతపురం రేంజ్ డీఐజీ అమ్మిరెడ్డిని బదిలీ చేసిన ఎన్నికల సంఘం
Andhra Pradesh Telugu | Suryaa Desk | Published : Tue, May 07, 2024, 09:56 PM
ఆంధ్రప్రదేశ్ ఎన్నికల వేళ మరో పోలీస్ ఉన్నతాధికారిని ఎన్నికల సంఘం బదిలీ చేసింది. అనంతపురం రేంజ్ డీఐజీ అమ్మిరెడ్డిని బదిలీ చేస్తూ ఈసీ ఉత్తర్వులు జారీ చేసింది. ఆయన తర్వాత స్థానంలోని అధికారికి బాధ్యతలు అప్పగించి.. వెంటనే విధుల నుంచి రిలీవ్ చేయాలని ఆదేశించింది. ఎన్నికలు పూర్తయ్యే వరకూ ఆయనకు ఎన్నికలకు సంబంధించిన ఎలాంటి విధులూ అప్పగించొద్దని ఈసీ చెప్పింది. ఆయన స్థానంలో మరొకరిని నియమించేందుకు వీలుగా ముగ్గురు ఐపీఎస్ అధికారుల పేర్లతో సోమవారం రాత్రి 8 గంటల్లోగా ప్యానల్ జాబితాను సమర్పించాలని సీఎస్ జవహర్రెడ్డిని ఆదేశించింది. ఈసీ కొత్త డీఐజీపై ఇవాళ నిర్ణయం తీసుకునే అవకాశం ఉంది.
ప్రతిపక్షాలపై అధికార పార్టీ నేతలు దాడులకు తెగబడుతున్నారని ఎన్నికల సంఘానికి ఫిర్యాదులు వెళ్లాయి. అలాగే గత నెల 29న మంత్రి పెద్దిరెడ్డి రామచంద్రారెడ్డి సొంత ఊరు సదుం మండలం యర్రాతివారిపల్లెలో బీసీవై పార్టీ అధినేత రామచంద్ర యాదవ్, ఆయన అనుచరులు ప్రచారానికి వెళ్లడంతో ఉద్రిక్త పరిస్థితులు కనిపించాయి. రామచంద్ర యాదవ్ ప్రచార వాహనాలను కూడా తగులబెట్టారు. ఈ ఘటన తర్వాత రామచంద్ర యాదవ్ ఎన్నికల సంఘానికి ఫిర్యాదు చేశారు. ఈ ఫిర్యాదు చేసిన కొద్ది రోజులనే డీఐజీని బదిలీ చేశారు. మరోవైపు ఇటీవల బదిలీ చేసిన రెండు స్థానాల్లో కొత్త డీఎస్పీలను ఎన్నికల సంఘం నియమించింది. అనంతపురం అర్బన్ డీఎస్పీగా టి.వి.వి ప్రతాప్ కుమార్ను, రాయచోటి డీఎస్పీగా రామచంద్రరావును నియమిస్తూ ఎన్నికల సంఘం తాజాగా ఉత్తర్వులు జారీ చేసింది.
|
|