'పవన్ గెలిచాక.. నా భర్త రిక్షా తొక్కిన డబ్బులతో అందరికీ పార్టీ ఇస్తా'.. ఆ మహిళకు బంపర్ ఆఫర్

జనసేన పార్టీ అధినేత పవన్ కళ్యాణ్‌ ఫ్యాన్ ఫాలోయింగ్ గురించి పెద్దగా చెప్పనక్కర్లేదు. అటు హీరోగా, ఇటు రాజకీయ నేతగా ఎంతోమంది అభిమానుల్ని సంపాదించుకున్నారు పవన్ కళ్యాణ్. 2019 ఎన్నికల్లో తొలిసారి ప్రత్యక్ష రాజకీయాల్లోకి వచ్చారు.. భీమవరం, గాజువాక నుంచి పోటీ చేసినా విజయం దక్కలేదు. అయినా సరే ఎక్కడా వెనకడుగు వేయలేదు.. పార్టీని కాపాడుకుంటూ వచ్చారు. 2024 ఎన్నికల్లో ప్రభుత్వ వ్యతిరేక ఓటును చిలనవ్వనని చెబుతూనే.. తెలుగు దేశం, బీజేపీలతో కలిసి కూటమి కట్టారు. పవన్ ఈ ఎన్నికల్లో నియోజకవర్గం మారారు.. కాకినాడ జిల్లా పిఠాపురం నుంచి పోటీ చేశారు. అక్కడ కూడా పవన్ ఎంతోమంది అభిమానుల ప్రేమను సంపాదించారు.. భారీగా పోలింగ్ నమోదైంది. అయితే పిఠాపురంలో ఓ రిక్షావాలా భార్య ‌పవన్ కళ్యాణ్‌పై తనకు ఉన్న అభిమానాన్ని చాలా గొప్పగా చెప్పుకుంది.

పవన్ కళ్యాణ్ గెలిస్తే.. ఊరంతా నా భర్త రిక్షా తొక్కిన డబ్బులతో పార్టీ ఇస్తానని ఆమె ఎంతో అభిమానంతో చెప్పారు. తన భర్త రిక్షా తొక్కినా తక్కువ డబ్బులు వస్తాయని.. అయినా సరే పార్టీ ఇవ్వడం మాత్రం ఖాయమన్నారు. ఆయన ముసలాయనని పెద్దగా ఎవరూ రిక్షాకు పని చెప్పరని.. ఆమెకు భర్త కూడా మద్దతు ఇచ్చారు. తన భార్య మాట ఇచ్చి ప్రకారం పార్టీ ఇవ్వడం ఖాయమని.. తమకు ఉన్న స్థోమతలోనే మంచి పార్టీ ఇస్తామని హామీ ఇచ్చారు. అవసరమైతే రిక్షా తాకట్టు పెడతామంటూ తేల్చి చెప్పారు భార్యాభర్తలు. ఈ వీడియో సోషల్ మీడియాలో బాగా వైరల్ అయ్యింది. పవన్ కళ్యాణ‌పై ఆ మహిళా అభిమాని చూపించిన ప్రేమతో టాలీవుడ్ ప్రొడ్యూసర్ శ్రీనివాస్ కుమార్ ట్విట్టర్ వేదికగా స్పందించారు. ఆమె పవన్‌పై చూపిస్తున్న అభిమానానికి తాను ఫిదా అయ్యానన్నారు. పిఠాపురంలో పవన్ కళ్యాణ్ గెలవగానే తాను కచ్చితంగా ఆ మహిళ భర్తకు ఆటోను గిఫ్ట్‌గా ఇస్తానని ప్రకటించారు. 'నా ఫేవరెట్ హీరో, అభిమాన నేత పవన్ కళ్యా‌ణ్‌పై ఆమె చూపించిన ప్రేమలో కల్మషం లేదు.. ఎంతో నిజాయితీ కనిపించింది' అన్నారు. అయితే ఈ ట్వీట్‌పై స్పందించిన పలువురు పవన్ కళ్యాణ్ అభిమానులు, నెటిజన్లు పవన్ కళ్యాణ్‌ గెలుపు, ఓటమి సంగతి పక్కన పెట్టి.. ఆమె చూపిస్తున్న అభిమానానికి ఇప్పుడే ఆటో కొనిస్తే బావుంటుందని కామెంట్స్ చేశారు. అది కూడా నిజమే అంటూ ప్రొడ్యూసర్ శ్రీనివాస్ కుమార్ అన్నారు.

ప్రొడ్యూసర్ శ్రీనివాస్ కుమార్ ట్వీట్‌కు టాలీవుడ్ డైరెక్టర్ మెహర్ రమేష్ కూడా స్పందించారు. తమ్ముడు శ్రీనివాస్ వెంటనే నువ్వు ఓ వెహికల్ బుక్ చెయ్ జూన్ 4 వరకు వేచి ఉండలేను, ఆ అవసరం కూడా లేదు.. ఆ జనసేన పార్టీ కార్యకర్త పెద్ద మనసును అభినందించాల్సిందే అంటూ ట్వీట్ చేశారు. మెహర్ రమేష్ ట్వీట్‌కు ప్రొడ్యూసర్ శ్రీనివాస్ కుమార్ స్పందించారు.. లవ్ యూ అన్నా.. కచ్చితంగా అలానే చేద్దాం.. కళ్యాణ్ బాబు కోసం ఏ రోజైనా, ఏ సమయమైనా పర్లేదు అంటూ మరో ట్వీట్ చేశారు. మొత్తానికి ఆ మహిళా అభిమాని పవన్ కళ్యాణ్‌పై చూపించిన ప్రేమకు జనసైనికులు సైతం ఫిదా అయ్యారు. పేరుకు పేదరాలైనా సరే కల్మషం లేని ఆమె అభిమానానికి హ్యాట్సాఫ్ అంటున్నారు. అంతేకాదు ఈ మహిళ వీడియోను జనసేన పార్టీ కూడా ట్వీట్ చేసింది.