ఏపీ ఎన్నికల్లో ఇదేం పైత్యం.. ఏ పార్టీకి ఓటేశారో చెబుతూ వీడియోలు, ఫోటో తీసుకున్నారు

ఆంధ్రప్రదేశ్ ఎన్నికల పోలింగ్ ప్రక్రియ ప్రశాంతంగా ముగిసింది. ఉదయం 7 గంటలకు మొదలైన ఓటర్ల క్యూ లైన్లు అర్ధరాత్రి వరకు కొనసాగాయి. అయితే పోలింగ్ సమయంలో కొందరు ఓటర్లు అత్యుత్సాహం ప్రదర్శించారు. ఎన్నికల సంఘం నిబంధనలు పట్టించుకోకుండా మొబైల్స్‌తో పోలింగ్ కేంద్రాల్లోకి వెళ్లారు. అక్కడితో ఆగకుండా ఏ పార్టీకి ఓటు వేశారో తెలిసేలా మొబైల్స్‌లో ఫోటోలు, వీడియోలు తీసుకున్నారు. కృష్ణా జిల్లా గన్నవరం నియోజకవర్గంలో కొందరు ఓటర్లు.. ఓటు వేయడాన్ని, వీవీప్యాట్‌ చీటీలను మొబైల్స్‌లో ఫోటోలు తీసి సోషల్ మీడియాలో పోస్ట్ చేశారు.

 గుంటూరు పశ్చిమ నియోజకవర్గంలో అలాంటి సన్నివేశాలు కనిపించాయి. మంత్రి రజినికి ఓటు వేసినట్లుగా ఓ ఓటరు మొబైల్‌లో రికార్డ్ చేశారు. ఆ వీడియో కూడా ప్రస్తుతం సోషల్ మీడియాలో వైరల్ అవుతోంది.. దీంతో నెటిజన్లు మండిపడుతున్నారు. మరోవైపు గుంటూరు జిల్లా ప్రత్తిపాడు నియోజకవర్గంలో కూడా కొందరు ఓటు వేసి ఫోటోలు తీసుకుని సోషల్ మీడియాలో పోస్ట్ చేశారు. ఈ వీడియోలు వైరల్ కావడంతో చర్చనీయాంశంగా మారింది.

విశాఖపట్నం ఉత్తర నియోజకవర్గం పరిధిలో ఓ పోలింగ్ బూత్‌లో మరో వ్యక్తి కూడా ఓటు వేసి వీడియో తీసుకున్నాడు. ఆ వీడియో కూడా సోషల్ మీడియాలో చక్కర్లు కొట్టింది. పోలింగ్ విధుల్లో నిమగ్నం కావడంతో పోలీసులు కూడా తక్కువగా ఉండటంతో కొందరు అత్యుత్సాహం ప్రదర్శించారు. ఈ వీడియోలు, ఫోటోలపై అధికారులు స్పందించారు. వీడియోలను, ఫోటోలను పరిశీలించిన తర్వాత చర్యలు తీసుకుంటామని చెప్పారు. గతంలోనే ఎన్నికల సంఘం పోలింగ్ కేంద్రాల్లోకి మొబైల్స్ తీసుకెళ్లడం నిషేధం.. నిబంధనలు ఉల్లంఘిస్తే చర్యలు తప్పవు. కానీ అవన్నీ ఎవరూ పట్టించుకోలేదు.. మొబైల్స్ తీసుకెళ్లి ఓటు వేయడాన్ని వీడియోలు, ఫోటోలు తీసుకున్నారు.