ముంబయిలో గాలి దుమారం.. హోర్డింగ్ కూలిన ఘటనలో 14కు చేరిన మృతులు

దేశ ఆర్ధిక రాజధాని ముంబయిలో సోమవారం సాయంత్రం గాలివాన బీభత్సం సృష్టించింది. ఘట్‌కోపర్‌లో హోర్డింగ్ కూలిన ఘటనలో మృతుల సంఖ్య అంతకంతకూ పెరుగుతోంది. ఈ ఘటనలో ఇప్పటి వరకూ 14 మంది మృత్యువాతపడినట్టు అధికారులు వెల్లడించారు. మరో 70 మందికిపైగా గాయపడినట్టు తెలిపారు. ఘట్‌కోపర్‌లోని సమతా నగర్‌లో సాయంత్రం 4.30 గంటల ప్రాంతంలో 100 అడుగుల ఎత్తైన ఇనుప బిల్‌బోర్డ్ ఈదురుగాలులకు కూలి పక్కనే ఉన్న రైల్వే పెట్రోల్‌ పంపుపై పడింది. దీంతో హోర్డింగ్‌ కింద పలువురు చిక్కుకుని తీవ్రంగా గాయపడ్డారు.

వారిని చికిత్స కోసం వివిధ ఆస్పత్రులకు అధికారులు తరలించారు. హోర్డింగ్‌ కింద చిక్కుకున్న పలువుర్ని బయటకు తీయడానికి ఎన్డీఆర్ఎఫ్, అగ్నిమాపక సిబ్బంది తీవ్రంగా శ్రమించారు. హోర్డింగ్‌ను క్రేన్లు, గ్యాస్‌ కట్టర్ల సాయంతో ఎన్‌డీఆర్‌ఎఫ్ బృందం పైకిలేపింది. అటు, ఘటనా స్థలిని మహారాష్ట్ర ముఖ్యమంత్రి ఏక్‌నాథ్‌ షిండే సందర్శించారు. మృతుల కుటుంబాలకు ప్రభుత్వం తరఫున రూ.5 లక్షల చొప్పున పరిహారాన్ని ప్రకటించారు. కాగా, అనుమతి లేకుండా ఈ హోర్డింగ్‌ ఏర్పాటుచేసినట్టు ముంబయి నగరపాలక సంస్థ అధికారులు తెలిపారు.

పెట్రోల్ బంకులో ఉన్న కార్ల, ద్విచక్రవాహనాలపై ఇనుప బోర్డు కూలిపోవడంతో ప్రాణనష్టం అధికంగా ఉంది. ప్రత్యక్ష సాక్షి మాట్లాడుతూ.. ‘ఓ సంస్థకు చెందిన భారీ హోల్డింగ్ కూలి పెట్రోల్ పంపుపై పడిపోయిన సమయంలో నేను అక్కడే ఉన్నాను.. అక్కడి ఉన్న కార్లు, బైక్‌లు దాని కింద చిక్కుకున్నాయి.. బాధితులు బయటకు రావడానికి మేము సాయం చేశాం.. కొందరు త్రుటిలో తప్పించుకున్నారు’ అని చెప్పారు.

మరోవైపు, వడాలాలోని బర్కత్‌ అలీ నాకాలో శ్రీజీ టవర్‌ సమీపంలో నిర్మాణంలో ఉన్న మెటల్‌ పార్కింగ్‌ టవర్‌ రోడ్డుపై కూలింది. ఈ ఘటనలో ఇద్దరు గాయపడగా.. 8 వాహనాలు దెబ్బతిన్నాయి. ముంబయి విమానాశ్రయంలో విమానాల రాకపోకలను నిలిపివేసి.. సుమారు 15 విమానాలను దారి మళ్లించారు. సాయంత్రం 5.03 గంటలకు రన్‌వే కార్యకలాపాలను పునరుద్ధరించారు. వర్షం, ఈదురుగాలి కారణంగా అనేక ప్రాంతాల్లో స్తంభాలు, చెట్లు నేలకొరిగాయి. కొన్నిచోట్ల వైర్లు తెగిపడ్డాయి. పలు మార్గాల్లో మెట్రో సేవలను తాత్కాలికంగా నిలిపివేశారు. సెంట్రల్‌ రైల్వే పలు లోకల్ రైళ్లను నిలిపివేసింది.