బీజేపీ సీనియర్ నేత, మాజీ డిప్యూటీ సీఎం సుశీల్ మోదీ మృతి

బీజేపీ సీనియర్ నేత, బిహార్ మాజీ డిప్యూటీ సీఎం సుశీల్ కుమార్ మోదీ కన్నుమూశారు. గత కొంతకాలంగా కేన్సర్‌తో బాధపడుతోన్న ఆయన.. ఢిల్లీలోనీ ఆల్ ఇండియా ఇన్‌స్టిట్యూట్ ఆఫ్ మెడికల్ సైన్సెస్‌లో చికిత్స పొందుతూ సోమవారం రాత్రి మరణించారు. నెల రోజులుగా ఎయిమ్స్‌లో సుశీల్ మోదీ చికిత్స తీసుకుంటున్నారు. బిహార్‌లో బీజేపీకి కీలక నేతగా ఉన్న సుశీల్ మోదీ.. ఆరోగ్య పరిస్థితి దృష్ట్యా ప్రస్తుత లోక్‌సభ ఎన్నికలకు దూరంగా ఉన్నారు. తాను ఎన్నికల్లో పోటీచేయడం లేదని ఏప్రిల్ 3 సుశీల్ మోదీ ఎక్స్‌లో తెలిపారు.

 ‘‘గత ఆరు నెలలుగా కేన్సర్‌తో బాధపడుతున్నాను.. ఇప్పుడు ప్రజలకు తెలియజేయాల్సిన సమయం వచ్చింది.. లోక్‌సభ ఎన్నికల్లో నేను పోటీచేయడం లేదు.. అన్ని విషయాలు ప్రధాని నరేంద్ర మోదీకి తెలియజేశారు.. ఎల్లప్పుడూ దేశం, బిహార్, పార్టీకి నేను అంకితం’’ అని తెలిపారు. మూడు దశాబ్దాలుగా పార్టీపై ఆయన గణనీయమైన ప్రభావాన్ని చూపిన ఆయన మరణం బిహార్‌లో బీజేపీకి తీరనిలోటు. 2005 నుంచి 2020 మధ్య 11 ఏళ్ల పాటు నితీశ్ కుమార్ క్యాబినెట్‌లో డిప్యూటీ సీఎంగా ఉన్నారు. సుశీల్ కుమార్ మోదీ మరణంపై బీజేపీ అగ్రనేతలు అమిత్ షా, రాజ్‌నాథ్ సింగ్, రవిశంకర్ ప్రసాద్‌లు తీవ్ర విచారం వ్యక్తం చేశారు.

‘ఈ రోజు బిహార్ గొప్ప నాయకుడ్ని కోల్పోయింది.. ఏబీవీపీ నుంచి బీజేపీ వరకూ పార్టీతోపాటు ప్రభుత్వంలో అనేక ముఖ్యమైన పదవులను అలంకరించారు. ఆయన రాజకీయాలు పేదలు, వెనుకబడిన వర్గాల ప్రయోజనాలకే అంకితమయ్యాయి.’ అని అమిత్ షా ట్వీట్ చేశారు. ఇక, సుశీల్ మోదీ మరణంపై పశ్చిమ్ బెంగాల్ సీఎం మమతా బెనర్జీ, బిహార్ మాజీ డిప్యూటీ సీఎం, ప్రతిపక్ష నేత తేజస్వీ యాదవ్‌లు తమ ప్రగాఢ సంతాపం తెలియజేశారు.