జపాన్ వీధుల్లో చీరకట్టుతో యువతి.. జపనీయుల రియాక్షన్ చూశారా

భారత సంస్కృతి, సంప్రదాయాలు.. ప్రపంచ వ్యాప్తంగా ఎంతో ప్రసిద్ధి చెందాయి. అందుకే విదేశాలకు చెందిన వారు చాలా మంది భారత సంప్రదాయాలని పాటించేందుకు చాలా ఆసక్తి చూపుతూ ఉంటారు. కట్టు, బొట్టు లాంటివి తమకు రాకపోయినా.. భారతీయులను చూసి నేర్చుకుంటూ ఉంటారు. ఇక భారత సంప్రదాయంలో పెళ్లిళ్లు చేసుకున్న విదేశీయులు కూడా ఉన్నారు. ఇక భారత సంప్రదాయంలో చీరకట్టుకు ఉండే ప్రాధాన్యతే వేరు. చీర కట్టుకున్న భారతీయులను చూసి చాలా మంది విదేశీయులు చీరలు కట్టుకునేందుకు ఆసక్తి చూపుతారు. ఈ క్రమంలోనే తాజాగా జపాన్ రోడ్లపై ఓ యువతి చీరకట్టుతో అందరి చూపును తనవైపు తిప్పుకుంది.

ఇన్‌స్టాగ్రామ్‌లో వైరల్ అవుతున్న ఓ వీడియోలో యువతి జపాన్ రోడ్లపై చీరకట్టుతో అందర్నీ మంత్రముగ్ధుల్ని చేసింది. అంతా వెస్ట్రన్ దుస్తులు ధరించి వెళ్తుండగా.. వారందరికీ భిన్నంగా ఆ యువతి మాత్రం చీరకట్టులో అలరించింది. దీంతో అక్కడ ఉన్న వారి చూపు మొత్తం ఆమె వైపే ఉంది. అయితే ఆమె భారత యువతి కావడం విశేషం. భారత్‌కు చెందిన ఓ ఇన్‌స్టాగ్రామ్‌ ఇన్‌ఫ్లూయెన్సర్.. జపాన్ వీధుల్లో చీరకట్టుతో ఇచ్చిన స్టిల్స్ ప్రస్తుతం సోషల్ మీడియాలో తెగ వైరల్ అవుతున్నాయి. నీలిరంగు చీర.. బంగారు వర్ణం అంచు కలిగి ఉంది. అక్కడ ఫోటో షూట్, రీల్స్ చేసింది. అది చూసి జపాన్ వాసులు మంత్రముగ్ధులు అయ్యారు. దీంతో అక్కడ ఉన్న వారు తమ సెల్‌ఫోన్లు తీసి ఆమెను ఫోటోలు తీసుకోవడం ప్రారంభించారు.

చీర కట్టుకున్న యువతిని చూసి వారు ఆశ్చర్యపోవడం ఆ వీడియోలో కనిపిస్తోంది. అయితే ఆ వీడియో సోషల్ మీడియాలో తెగ ట్రెండింగ్‌లో ఉంది. తనను చీరకట్టులో చూసి జపనీయుల నుంచి ఇలాంటి రియాక్షన్ వస్తుందని తాను అస్సలు ఊహించలేదని ఆ యువతి పేర్కొంది. జపాన్‌లో తాను చీరకట్టుకుని వీధుల్లో వెళ్తుంటే వారు నన్ను చూసి ఆశ్చర్యపోయారని ఆ వీడియోకు క్యాప్షన్ పెట్టింది. సరదా కోసం చీరకట్టుకుని టోక్యో వీధుల్లో వెళ్తే జనాల నుంచి ఇలాంటి రియాక్షన్ వస్తుందని తాను అస్సలు ఊహించలేదని ఆ యువతి తెలిపింది.

అయితే ఈ వీడియో వైరల్ కావడంతో కొందరు నెటిజన్లు మాత్రం ఆ యువతిపై తీవ్ర విమర్శలు చేస్తున్నారు. చీరకట్టుకున్నవు బాగానే ఉంది కానీ.. జాకెట్ ఎందుకు వేసుకోలేదు అని ప్రశ్నిస్తున్నారు. అయితే ఈ కామెంట్లకు మరికొందరు నెటిజన్లు గట్టి కౌంటర్లు ఇస్తున్నారు. పూర్వం బ్రిటీష్ పాలకులు భారత్‌కు రాకముందు భారతీయ మహిళలు కేవలం చీర మాత్రమే కట్టుకునేవారని.. లోపల జాకెట్ వేసుకునే వారు కాదని పేర్కొన్నారు.