డీకే రూ.100 కోట్ల ఆఫర్ చేశారు.. ప్రజ్వల్ వీడియోలపై బాంబు పేల్చిన బీజేపీ నేత

లోక్‌సభ ఎన్నికల వేళ వెలుగులోకి వచ్చిన జేడీఎస్ ఎంపీ ప్రజ్వల్ రేవణ్ణ అకృత్యాల దేశవ్యాప్తంగా తీవ్ర దిగ్భ్రాంతికి గురిచేశాయి. అయితే, ఈ వీడియోలను కుట్రపూరితంగానే బయటపెట్టారని ప్రచారం సాగుతోంది. ఈ నేపథ్యంలో బీజేపీ నేత దేవరాజే గౌడ సంచలన వ్యాఖ్యలు చేశారు. డిప్యూటీ సీఎం డీకే శివకుమార్ ఆ వీడియోలు బయటకు వచ్చేలా చేశారని గౌడ ఆరోపించారు. కుమారస్వామిని రాజకీయంగా తొక్కేయాలనేది డీకే టార్గెట్ అని పేర్కొన్నారు. ఈ విషయంలో డీకే తనను సంప్రదించి.. సహకరిస్తే రూ.100 కోట్లు ఇస్తానని ఆశపెట్టారని తెలిపారు. అంతేకాదు, తాను బౌరింగ్ క్లబ్‌లోని 110 నంబరు గదిలో ఉన్నప్పుడు అడ్వాన్స్‌గా చెన్నరాయపట్నానికి చెందిన గోపాలస్వామి అనే వ్యక్తితో రూ.5 కోట్ల పంపారని ఆరోపణలు చేశారు.

ప్రజ్వల్ రేవణ్ణ మాజీ డ్రైవర్ కార్తీక్ నుంచి డీకే శివకుమార్ పెన్ డ్రైవ్ పొందారని దేవరాజే గౌడ చెప్పారు. ప్రజ్వల్ రేవణ్ణ వీడియోల వివాదం అయ్యేందుకు ముమ్మాటికీ డీకేనే కారణం అని దుయ్యబట్టారు. ఈ వ్యవహారంలో డీకే శివకుమార్‌‌తో పాటు మంత్రులు ఎన్ చెలువరాయస్వామి, కృష్ణ బైరె గౌడ్, ప్రియాంక్ ఖర్గే పాత్ర కూడా ఉందని దేవరాజే గౌడ ఆరోపణలు చేయడం గమనార్హం.

‘డీకే శివకుమార్ డీల్‌కు నేను అంగీకరించలేదు... అందుకు నాపై కక్షసాధింపు చర్యలకు దిగారు.. అట్రాసిటీ కేసు పెట్టారు.. ఆధారాలు లేకపోవడంతో మరో కేసు బనాయించారు.. లైంగిక వేధింపుల కేసు నమోదు చేసి జైలుకు పంపారు.. రూ.100 కోట్ల ఆఫర్‌కు సంబంధించి ఆడియో రికార్డింగ్స్ నా దగ్గర ఉన్నాయి. ఆ ఆడియో రికార్డింగ్స్ బయటపెడితే కాంగ్రెస్ సర్కారు కూలిపోతుంది.. ప్రజ్వల్ రేవణ్ణ కేసుకు సంబంధించి సిట్ మీద నాకు నమ్మకం లేదు. సాక్ష్యాధారాలను సీబీఐకి మాత్రం అందజేస్తాను... తన వద్ద ఉన్న వీడియోలు విడుదలైన వాటికి తేడా ఉంది’ దేవరాజే గౌడ వివరించారు.

మరోవైపు, దేవరాజె గౌడను సిట్ అధికారులు అదుపులోనికి తీసుకుని.. కోర్టు ముందు హాజరు పరిచారు. అతడి నుంచి మరిన్ని వివరాలను రాబట్టాలని సిట్ కోరడంతో శనివారం వరకు కస్టడీకి కోర్టు అనుమతించింది. ప్రజ్వల్‌ వీడియోలు ఉన్న పెన్‌డ్రైవ్‌లు పంచడం, కొందరు బాధితులపై అఘాయిత్యాలకు పాల్పడిన ఆరోపణలపై ఏప్రిల్‌ 23న హాసన సైబర్‌ క్రైమ్‌ పోలీస్ స్టేషన్‌లో కేసు నమోదైంది. ఈ కేసులో దేవరాజేగౌడ ఎనిమిదో నిందితుడిగా ఉన్నారు.