స్వాతి మలివాల్‌పై దాడి.. కేజ్రీవాల్ ఇంటి నుంచి మరో వీడియో లీక్

ఆమ్ ఆద్మీ పార్టీ అధినేత, ఢిల్లీ ముఖ్యమంత్రి అరవింద్ కేజ్రీవాల్ నివాసంలో ఆయన వ్యక్తిగత సహాయకుడు బిభవ్ కుమార్ తనపై దాడి చేశాడంటూ ఆ పార్టీ ఎంపీ స్వాతి మలివాల్ చేసిన ఆరోపణలపై రాజకీయ దుమారం రేగుతోంది. ఈ నేపథ్యంలో ఈ ఘటనకు సంబంధించిన మరో వీడియో వెలుగులోకి వచ్చింది. సీఎం కేజ్రీవాల్ నివాసం నుంచి స్వాతి మలివాల్‌ను పోలీసులు, భద్రతా సిబ్బంది బయటకు పంపడం ఆ వీడియోలో స్పష్టంగా కనిపిస్తోంది. తనను బయటకు తీసుకొస్తున్న సిబ్బందిని ఆమె వదిలించుకునే ప్రయత్నం చేయడం అందులో రికార్డయ్యింది. అంతేకాదు, ఆమె ఒంటిపై ఎటువంటి గాయాలైన గుర్తులు లేవు.

వాస్తవాలు వెలుగులోకి వచ్చాయంటూ.. ఘటన జరిగిన రోజు, న్యాయస్థానం ముందు వాంగ్మూలం ఇవ్వడానికి ఆమె వెళ్లిన రోజు దృశ్యాలున్న వీడియోను ఆప్‌ విడుదల చేసింది. శుక్రవారం కూడా కేజ్రీవాల్‌ ఇంటి నుంచి ఒక వీడియో క్లిప్‌ బయటకు వచ్చింది. భద్రతా సిబ్బందితో ఆమె వాదించడం ఆ వీడియోలో కనిపించింది. ఆ వీడియో విడుదల కాగానే.. హిట్‌మ్యాన్‌ అంటూ మలివాల్‌ ఎక్స్ (ట్విట్టర్‌)లో తీవ్రంగా స్పందించారు. అసలు విషయం దాచిపెట్టి పోస్టులు, వీడియోలను ప్రచారం చేయడం ద్వారా.. ఈ నేరం నుంచి తనను తాను రక్షించుకోవచ్చని భావిస్తున్నారని ఆమె విమర్శించారు. అయితే, ఆమె చెప్పిన హిట్‌మ్యాన్‌ ఎవరన చర్చ జరుగుతోంది.

సీఎం కేజ్రీవాల్ నివాసంలో ఆయన వ్యక్తిగత సహాయకుడు బిభవ్ కుమార్ తనపై దాడి చేశారంటూ స్వాతి ఆరోపించిన విషయం తెలిసిందే. తనను ఇష్టమొచ్చినట్టు, ఏడు ఎనిమిది చెంపదెబ్బలు కొట్టారని, పొట్టతో పాటు సున్నితమైన ప్రాంతాల్లోనూ కాలితో తన్నాడని ఆరోపించారు. అయితే, బిభవ్ కూడా మాలీవాల్‌పై పోలీసులకు ఫిర్యాదు చేశారు. ఆమె ఆరోపణల వెనక బీజేపీ కుట్ర ఉందని ఆరోపించిన ఆయన.. ఈ వ్యవహారంలో స్వాతి ఓ పావు మాత్రమేనని చెప్పారు. అపాయింట్‌మెంట్‌ లేకుండా సీఎంను కలవడానికి వచ్చిన స్వాతి.. కేజ్రీవాల్‌పై ఆరోపణలు చేయడమే ఆమె ఉద్దేశమని ఆప్ మంత్రి అతీషి మండిపడ్డారు.