ఏపీలో వారందరికీ గుడ్‌న్యూస్.. 4 రోజుల్లోనే అకౌంట్లలో పడిన రూ.5868 కోట్లు

ఆంధ్రప్రదేశ్‌‌లో ఎన్నికలు ముగిశాయి. అయితే ఎన్నికల కారణంగా రాష్ట్రంలో ఎన్నికల కోడ్ అమల్లో ఉండటంతో ప్రభుత్వం ప్రజల ఖాతాల్లో వేసే డీబీటీ నిధులు ఆగిపోయాయి. అయితే పోలింగ్ ముగిసిన తర్వాత సంక్షేమ పథకాల లబ్ధిదారుల ఖాతాల్లో డబ్బులు జమ చేయొచ్చనే ఈసీ ఆదేశాలతో ఇన్ని రోజులు ఆగిపోయిన ప్రక్రియ ఇప్పుడు తిరిగి ప్రారంభం అయింది. ఈ నేపథ్యంలోనే వివిధ రకాల పథకాల కింద లబ్ధిదారులుగా ఉన్న వారి ఖాతాల్లోకి డబ్బు జమ అవుతోంది. దీంతో పోలింగ్ ముగిసిన తర్వాత నుంచి 4 రోజుల్లో లబ్ధిదారుల ఖాతాల్లోకి రూ.5868 కోట్లను జగన్ ప్రభుత్వం వేసింది.

అయితే ఈ రూ.5868 కోట్లను వివిధ పథకాల కింద లబ్ధిదారులకు అందించింది. వైఎస్సార్ ఆసరా పథకం కింద డ్వాక్రా మహిళలకు రూ. 1843 కోట్లు జమ చేశారు. ఇక రైతులకు ఇన్‌పుట్ సబ్సిడీ కింద రైతుల ఖాతాల్లోకి రూ. 1236 కోట్లు వేశారు. మరోవైపు.. వైఎస్సార్ చేయూత పథకం కింద రూ.1552 కోట్లను లబ్ధిదారుల అకౌంట్లలో వేశారు. ఈబీసీ నేస్తం కింద అగ్రవర్ణాల పేదలకు రూ.629 కోట్లు జమ చేశారు. జగనన్న విద్య దీవెన పథకం కింద లబ్ధిదారులైన విద్యార్థులకు ఫీజు రియంబర్స్‌మెంట్ కింద రూ.605 కోట్లు అకౌంట్లలోకి వచ్చి చేరాయి.

ఎన్నికల కమిషన్ ఇచ్చిన ఆదేశాలతో ఈ పథకాలకు డబ్బు చెల్లింపులు ఇన్ని రోజులు ఆగిపోయాయి. అయితే పోలింగ్ పూర్తి కావడంతో తిరిగి సంక్షేమ పథకాల అమలుకు మార్గం సుగమం అయింది. ఈ క్రమంలోనే ఎన్నికల కోడ్ పూర్తి కాగానే.. లబ్ధిదారుల ఖాతాల్లోకి డబ్బులు జమ చేస్తానని.. సీఎం వైఎస్ జగన్‌మోహన్ రెడ్డి హామీ ఇచ్చారు. అందులో భాగంగానే కోడ్ పూర్తి కాగానే డబ్బులు చెల్లింపులు చేశారు.

ఈ పథకాల కింద లబ్ధిదారులకు నిధులు విడుదల చేసేందుకు ఎన్నికలకు ముందు ఆంధ్రప్రదేశ్‌లో తీవ్ర ఉత్కంఠ రేగింది. డీబీటీ పథకాల డబ్బులు అర్హుల ఖాతాల్లో జమ చేసేందుకు అనుమతి ఇవ్వాలని ఎన్నికలకు రెండు, మూడు రోజులు ముందు జగన్ ప్రభుత్వం ఎన్నికల సంఘాన్ని కోరగా.. అందుకు ఈసీ అంగీకరించలేదు. ఎన్నికల ప్రక్రియ అంతా పూర్తై ఫలితాలు వెల్లడైన తర్వాత డబ్బులు విడుదల చేయొచ్చని తెలపడం తీవ్ర చర్చనీయాంశంగా మారింది. దీంతో కొందరు లబ్ధిదారులు ఏపీ హైకోర్టును ఆశ్రయించారు. అయితే పోలింగ్ పూర్తైన తర్వాత అకౌంట్లలో జమ చేయవచ్చని హైకోర్టు ఆదేశించడంతో.. తాజాగా నిధుల జమ కొనసాగుతోంది. దీంతో ఎప్పుడెప్పుడా అని లబ్ధిదారులు ఎదురు చూస్తున్న సమయం రానే వచ్చింది.