అయ్యప్ప భక్తులకు గుడ్‌ న్యూస్.. ఇక మరింత నిశ్చింతగా దర్శనం

అయ్యప్ప భక్తులకు ట్రావెన్‌కోర్ దేవస్థానం బోర్డు శుభవార్త చెప్పింది. అయ్యప్పస్వామి దర్శనం కోసం ఇక నుంచి రోజుకు 50 వేల మంది భక్తులను వర్చువల్ క్యూ బుకింగ్ విధానం ద్వారా అనుమతించాలని నిర్ణయం తీసుకుంది. అలాగే భక్తులకు ఇన్సూరెన్స్ అమలు చేయనున్నారు. రోజూ 80 వేలమందిని దర్శనానికి అనుమతించాలని నిర్ణయించినప్పటికీ.. కొన్ని పరిమితుల కారణంగా 50 వేలకే కుదిస్తూ నిర్ణయించింది. వచ్చే మండల, మకరవిళక్కు సీజన్‌ నుంచి ఈ నిర్ణయం అమలు చేయనున్నారు.

మరోవైపు దర్శనం కోసం ఆన్‌లైన్ బుకింగ్ సదుపాయం గతంలో పదిరోజుల ముందు వరకూ మాత్రమే అందుబాటులో ఉండేది. ప్రస్తుతం మూడు నెలల ముందుగానే వర్చువల్ క్యూ బుకింగ్ చేసుకునే అవకాశం కల్పించారు. అలాగే వర్చువల్ క్యూ ద్వారా దర్శనం చేసుకునే భక్తులకు ఇన్సూరెన్స్ పాలసీ అందించనున్నారు. ఇందుకోసం బుకింగ్ సమయంలోనే వారివద్ద నుంచి రూ.10 రూపాయలు వసూలు చేస్తారు. యాత్ర సమయంలో అనుకోని పరిస్థితులు తలెత్తితే బీమా అందించేందుకు ఈ ఇన్సూరెన్స్ పాలసీని తీసుకువచ్చినట్లు దేవస్థానం బోర్డు అధికారులు తెలిపారు. అలాగే ఇన్సూరెన్స్ కవరేజీని పెంచేందుకు ఇన్సూరెన్స్ కంపెనీలతో చర్చిస్తామని తెలిపారు.

దర్శనం కోసం వచ్చే మహిళలు, చిన్నారులను ప్రత్యేకంగా ఏర్పాటు చేసిన బారికేడ్ల ద్వారా దర్శనానికి పంపనున్నారు. అలాగే మహిళలు, దివ్యాంగుల కోసం అప్పం, అరవణ ప్రసాదం పంపిణీ కేంద్రాల వద్ద ప్రత్యేక కౌంటర్లు ఏర్పాటు చేయనున్నారు. దర్శనానికి వచ్చే భక్తుల సంఖ్యను లెక్కించేందుకు, ప్రకటనల కోసం అరవణ ప్లాంట్ వద్ద కౌంటింగ్ సెన్సార్ ఏర్పాటు చేయనున్నారు. మరోవైపు అన్నదాన మండపం వద్ద కూపన్‌ల స్థానంలో పీవోఎస్ మెషీన్ల ద్వారా టోకెన్లు ఇవ్వాలని నిర్ణయించారు. అలాగే డోలీ సేవల కోసం ప్రీపెయిడ్ రిజిస్ట్రేషన్ అమలు చేయాలని నిర్ణయించారు.