టాక్స్‌పేయర్లకు అలర్ట్.. మీకు ఇన్‌కం టాక్స్ రీఫండ్ రాలేదా

మన దేశంలో ఆదాయానికి అనుగుణంగా ఇన్‌కంటాక్స్ చెల్లించాల్సి ఉంటుంది. మన ఖర్చులకు అనుగుణంగా ఆదాయపు పన్ను రిటర్న్స్ వస్తుంటుంది. చాలా మంది రీఫండ్ ఆశించి ఐటీ రిటర్న్స్ దాఖలు చేస్తుంటారు. అయితే ఇటీవలి కాలంలో ఇలా ఫైల్ చేసిన వారి రీఫండ్ స్టేటస్ చూపించట్లేదు. దీనికి ఎన్నో కారణాలు ఉండొచ్చని నిపుణులు అంటున్నారు. ఇప్పటికీ మీరు మీ రీఫండ్ అందుకోకుంటే మాత్రం.. దానికి తగిన కారణాల్ని అన్వేషించాలని సూచిస్తున్నారు. ఐటీ శాఖ నుంచి ఏదైనా కమ్యూనికేషన్‌ను ట్రాక్ చేసి.. వారు అదనపు సమాచారం లేదా ధ్రువీకరణను అభ్యర్థిస్తే వెంటనే ప్రతిస్పందించాలని సూచిస్తున్నారు. అయితే ఆదాయపు పన్ను రీఫండ్ రాకుంటే ఏం చేయాలో ఇప్పుడు తెలుసుకుందాం.

>> ఐటీఆర్‌ను ఆదాయపు పన్ను శాఖ ప్రాసెస్ చేసేందుకు కొన్ని రోజుల సమయం పడుతుంది. మీరు ఐటీఆర్ ఫైల్ చేసి చాలా రోజులు అయితే మీరు ఇన్‌కం టాక్స్ వెబ్‌సైట్‌లో మీ రీఫండ్ స్టేటస్ చెక్ చేసుకోవచ్చు. టాక్స్ రిటర్న్స్ ప్రాసెస్ చేసిన తర్వాతే రీఫండ్ జారీ చేస్తారని గుర్తుంచుకోవాలి.

>> ఆదాయపు పన్ను శాఖ.. మీ రిటర్న్స్ ప్రాసెస్ చేశాకే మీ అర్హతను ధ్రువీకరించుకొని వాపసు అందిస్తుంది. మీరు అర్హులని నిర్ధరించాక.. నాలుగు వారాల్లోనే వాపసు క్రెడిట్ అవుతుంది.

>> రీఫండ్ ప్రాసెస్ కోసం బ్యాంక్ అకౌంట్ తప్పనిసరిగా ముందుగా ధ్రువీకరించాలి. లేకుంటే వాపసు జారీ చేయరు. బ్యాంక్ అకౌంట్ డీటెయిల్స్ పాన్ కార్డు వివరాలతో సరిపోలాలి. మీ ఐటీఆర్ పేర్కొన్న బ్యాంక్ అకౌంట్‌కు రీఫండ్ జారీ చేస్తారు. ఖాతా వివరాలు సరిగా ఉండాలి.

>> ఐటీఆర్ ఫైలింగ్ ప్రక్రియలో ఇ-వెరిఫికేషన్ తప్పనిసరి. ఐటీఆర్ ఫైల్ చేశాక 30 రోజుల్లోపు ఈ ప్రాసెస్ జరగాలి. అప్పుడే మీ రీఫండ్ ప్రాసెస్ వేగవంతం చేయడంలో సహాయపడుతుంది.

>> మీకు అంతకుముందు ఆర్థిక సంవత్సరం నుంచి పరిష్కరించబడని ఏదైనా బకాయిలు ఉన్న సందర్భాల్లో రీఫండ్ ఆలస్యం కావొచ్చు. ఇంకొన్ని సార్లు సర్వర్ సమస్యలు లేదా బ్యాక్‌లాగ్స్ వంటి సాంకేతిక సమస్యల కారణంగా వాపసు ఆలస్యం అవుతుంది. ఈ సందర్భాల్లో మరింత స్పష్టత కోసం ఐటీడీ హెల్ప్‌లైన్‌ను సంప్రదించాలి. దీని సహాయం కోసం మీరు ఇ-మెయిల్ పంపొచ్చు.