మహిళా ఉద్యోగిని పై వేధింపులు, విచారించిన పోలీసులు

మార్కాపురం డివిజనల్‌ పంచాయతీ కార్యాలయంలో మహిళా ఉద్యోగినిని వేధించిన వ్యవహారంపై కలెక్టర్‌ నియమించిన కమిటీ విచారణ చేపట్టింది. ప్రకాశం భవన్‌లోని డీపీవో కార్యాలయంలో విచారణ కమిటీ సభ్యులు బాధిత ఉద్యోగిని నుంచి సమాచారాన్ని సేకరించినట్లు తెలిసింది. మార్కాపురం డీఎల్‌పీవో కార్యాలయంలో పనిచేస్తున్న మహిళా ఉద్యోగిని తనను ఆ కార్యాలయ సీనియర్‌ సహాయకుడు శ్రీనివాసులుతోపాటు డీఎల్‌పీవో నాగేశ్వరరావు వేధిస్తున్నట్లు ఫిర్యాదు చేశారు. అందుకు సంబంధించిన ఆడియోలను కూడా బహిర్గతం చేశారు. ఈనేపథ్యంలో డీపీవో ఉషారాణి ఈనెల 20న ప్రాథమిక విచారణ చేసి నివేదికను కలెక్టర్‌ దినేష్‌కుమార్‌కు అందజేశారు. దాన్ని పరిశీలించిన కలెక్టర్‌ అక్కడి సీనియర్‌ సహాయకుడు శ్రీనివాసులును సస్పెండ్‌ చేయడంతోపాటు క్రిమినల్‌ కేసు నమోదు చేయాలని ఆదేశించారు. మరోవైపు విచారణకు కమిటీని నియమించారు. ఈ కమిటీ సభ్యులు బాధిత మహిళా ఉద్యోగితోపాటు అక్కడి డీఎల్‌పీవోను సోమవారం ఒంగోలుకు పిలిపించి విచారించారు. తనను మానసికంగా అనేకసార్లు వేధింపులకు గురిచేశారని బాధితురాలు చెప్పినట్లు సమాచారం. అందుకు సంబంధించిన కొన్ని ఆడియోలను కూడా ఆమె అందజేసినట్లు తెలిసింది. తదనంతరం విచారణకు వచ్చిన డీఎల్‌పీవోను కూడా కమిటీ సభ్యులు పలు ప్రశ్నలు అడిగినట్లు సమాచారం. వాటికి వివరణ ఇచ్చే సమయంలో ఆయన కొంత ఇబ్బందిపడినట్లు తెలిసింది. కాగా అంతకు ముందు ఆ ఉద్యోగినిని జేసీ గోపాలకృష్ణ తన చాంబర్‌కు పిలిపించుకొని మాట్లాడారు. అండగా ఉంటాం, న్యాయం చేస్తామని భరోసా ఇచ్చారు. మీకు జరిగిన అన్యాయాన్ని విచారణ కమిటీ ముందుంచాలని సూచించినట్లు సమాచారం. అక్కడే ఉన్న డీపీవో ఉషారాణికి కూడా పలు సూచనలను జేసీ చేసినట్లు తెలిసింది. కాగా డీపీవో ఉషారాణితోపాటు విచారణ కమిటీ నివేదికను సోమవారం రాత్రి లేదా మంగళవారం కలెక్టర్‌ దినేష్‌కుమార్‌కు అందజేయనున్నట్లు సమాచారం.