82 మార్కులొస్తే 18 వేశారు.. పేపర్ దిద్దినోడికి దండం రా సామీ

పదో తరగతి అనేది ప్రతి విద్యార్థి జీవితంలోనూ కీలక దశ. బంగారు భవిష్యత్తు దిశగా అడుగులు పడేది అప్పటి నుంచే. పదోతరగతిలో వచ్చే మార్కులు విద్యార్థుల భవితను నిర్దేశిస్తాయి. ఉపాధ్యాయులు కూడా పదో తరగతిలో కష్టపడి చదవాలంటూ విద్యార్థులను ప్రోత్సహిస్తూ ఉంటారు. ఆ విద్యార్థి కూడా అలాగే చదివాడు. మంచి మార్కులు తెచ్చుకోవాలనే పట్టుదలతో శ్రమించాడు. కానీ ఫలితాలు వచ్చాక.. రిజల్ట్స్ చూసి షాక్ తిన్నాడు. అన్ని సబ్జెక్టులలో 90 శాతానికి మార్కులు సంపాందించుకున్న ఆ విద్యార్తి.. ఇంగ్లీషులో మాత్రం ఫెయిల్ అయినట్లు వచ్చింది. దీంతో విద్యార్థితో పాటు, అతని తల్లిదండ్రులు, ఉపాధ్యాయులు కూడా షాక్ తిన్నారు. అయితే రీవెరిఫికేషన్ చేయిస్తే.. తాజాగా 82 మార్కులు వచ్చినట్లు తేలింది. దీంతో పేపర్ వాల్యుయేషన్ తీరుపై విమర్శలు వ్యక్తమవుతున్నాయి.

శ్రీసత్యసాయి జిల్లా బత్తలపల్లికి చెందిన గోగుల అంజి అనే విద్యార్థి ఈ ఏడాది పదో తరగతి పరీక్షలు రాశాడు. ఇటీవల వెల్లడైన ఫలితాల్లో అంజి ఫెయిల్ అయినట్లు వచ్చింది. అయితే అన్ని సబ్జెక్టులలో 90 వరకూ మార్కులు సంపాదించుకున్న అంజికి.. ఇంగ్లీషులో మాత్రం 18 మార్కులే వచ్చాయి. తెలుగులో 98, హిందీలో 89, గణితంలో 92, సైన్స్‌లో 87, సోషల్‌లో 86 మార్కులు రాగా.. ఇంగ్లీషులో 18 మార్కులే వచ్చాయి. దీంతో విద్యార్థితో పాటు అతని కుటుంబం, ఉపాధ్యాయులు షాక్ తిన్నారు.

అంజి బాగా చదివే విద్యార్థి కావటంతో ఉపాధ్యాయులు అతనితో రీవెరిఫికేషన్ కోసం దరఖాస్తు చేయించారు. రీవెరిఫికేషన్ చేసిన అధికారులు.. పేపర్లు దిద్దటంతో తప్పు జరిగినట్లు గుర్తించారు. 82 మార్కులు వస్తే 18 మార్కులు తప్పుగా వేసినట్లు గుర్తించారు. తప్పును సరిదిద్ది 82 మార్కులు వచ్చినట్లు మార్కుల మెమోను పంపారు. అయితే అధికారులు తప్పును సరిదిద్దుకున్నప్పటికీ.. నెలరోజులు పాటు తమ కొడుకు ఫెయిల్ అయ్యానంటూ మానసిక క్షోభను అనుభవించాడని అంజి తల్లిదండ్రులు చెప్తున్నారు. ఫెయిల్ అయ్యాననే ఆవేదనలో జరగరానిది ఏదైనా జరిగితే ఎవరిది బాధ్యత అని ప్రశ్నిస్తున్నారు. ఇలాంటి విషయాల్లో అధికారులు నిర్లక్ష్యం సరికాదన్న అంజి తల్లిదండ్రులు.. క్షణికావేశంలో పిల్లలు ఏవైనా ఊహించని నిర్ణయాలు తీసుకుంటే ఏంటి పరిస్థితి అని ప్రశ్నిస్తున్నారు. ఇకనైనా విద్యాశాఖ అధికారులు ఇలాంటి ఘటనలు పునరావృతం కాకుండా చూడాలని కోరుతున్నారు.