దేశంలో మరోసారి బర్డ్ ఫ్లూ వ్యాప్తి.. రాష్ట్రాలకు కేంద్రం హెచ్చరికలు

పక్షులు, కోళ్లకు సోకే బర్డ్‌ ఫ్లూపై అన్ని రాష్ట్రాలు, కేంద్ర పాలిత ప్రాంతాలు.. నిత్యం అప్రమత్తంగా ఉండాలని.. కేంద్ర ప్రభుత్వం కీలక సూచనలు చేసింది. పౌల్ట్రీల్లో అసాధారణ మరణాలు సంభవిస్తే ఆ విషయాన్ని వెంటనే సంబంధిత పశుసంవర్ధక శాఖకు తెలియజేయాలని తెలిపింది. అలా చేస్తే వెంటనే స్పందించి.. బర్డ్‌ ఫ్లూ వ్యాప్తిని అరికట్టి నివారణ చర్యలు తీసుకునే అవకాశం ఉంటుందని పేర్కొంది. ఈ ఏడాది ఇప్పటికే ఆంధ్రప్రదేశ్‌‌లోని నెల్లూరు, మహారాష్ట్రలోని నాగ్‌పుర్‌, కేరళలోని అలప్పుజ, కొట్టాయం, జార్ఖండ్‌లోని రాంచీలలో బర్డ్ ఫ్లూ వ్యాప్తిని గుర్తించినట్లు కేంద్రం వెల్లడించింది.

అయితే అత్యంత వేగంగా వ్యాప్తి చెందే ఏవియన్‌ ఇన్‌ఫ్లుయెంజా మానవులకు కూడా వ్యాప్తి చెందే అవకాశాలు ఉన్న నేపథ్యంలో కేంద్రం ముందస్తు జాగ్రత్త చర్యలు చేపట్టింది. బర్డ్ ఫ్లు వ్యాధి వ్యాప్తిని అడ్డుకునేందుకు అవసరమైన అన్ని చర్యలు తీసుకోవడం అవసరమని పేర్కొంటూ మే 25 వ తేదీన కేంద్ర పశుసంవర్ధక శాఖ, ఎన్‌సీడీసీలు కలిసి విడుదల చేసిన సంయుక్త ప్రకటనలో తెలిపాయి. యాంటీవైరల్‌ ఔషధాలు, పీపీఈ కిట్లు, మాస్కులను అందుబాటులో ఉంచుకోవాలని రాష్ట్రాలకు సూచించింది. ఇప్పటికే బర్డ్‌ ఫ్లూ వ్యాప్తి క్రియాశీలంగా ఉన్న రాష్ట్రాలు మరిన్ని ఎక్కువ చర్యలు తీసుకోవాలని పేర్కొంది. ఇన్‌ఫెక్షన్‌ సోకిన పక్షులను చంపేసే వారితోపాటు వారి పర్యవేక్షకుల నుంచి నమూనాలు తీసుకొని హెచ్‌5ఎన్‌1 పరీక్షలు నిర్వహించాలని తెలిపింది.

బర్డ్‌ ఫ్లూను ఏవియన్‌ ఇన్‌ఫ్లూయెంజాగా పిలుస్తారు. ఇది సాధారణంగా పక్షులు, కోళ్లకు సోకుతుంది. ఇన్‌ఫ్లూయంజా టైప్‌-ఏలో 12 కుపైగా వైరస్‌లు ఉండగా హెచ్5ఎన్8, హెచ్5ఎన్1 రకాలకు చెందిన బర్డ్‌ ఫ్లూ మాత్రం పౌల్ట్రీ ఉత్పత్తులైన కోళ్లు, బాతులతో పాటు టర్కీ కోళ్లపై తీవ్ర ప్రభావం చూపిస్తాయి. పక్షుల్లో ప్రాణాంతకమైన ఈ హెచ్5ఎన్1 రకాన్ని.. ప్రపంచ ఆరోగ్య సంస్థ 1997లో తొలిసారి గుర్తించింది. భారత్‌లో మాత్రం ఈ వైరస్‌ 2006లో బయటపడింది. మన దేశంలో ఉండే అనువైన వాతారణం దృష్ట్యా ఏటా వచ్చే విదేశీ వలస పక్షుల ద్వారా బర్డ్‌ ఫ్లూ వ్యాపిస్తుందని నిపుణులు వెల్లడించారు. అయితే ఈ బర్డ్ ఫ్లూ ఇతర పక్షులకు, జంతువులతో పాటు మానవులకు వైరస్‌ వ్యాప్తి చెందే ఆస్కారం ఉంటుందని పేర్కొన్నారు.