పరీక్షకు 2 రోజుల ముందే నెట్ పేపర్.. సోషల్ మీడియాలో రూ. 6 లక్షలకు అమ్మకం

ఓవైపు నీట్ వ్యవహారంపై దేశవ్యాప్తంగా తీవ్ర దుమారం కొనసాగుతుండగా... యూజీసీ నెట్ పశ్నాపత్రం కూడా లీకయినట్టు వెల్లడయ్యింది. మంగళవారం (జూన్ 18న) పరీక్షను నిర్వహించగా.. 48 గంటల ముందు అంటే ఆదివారం (జూన్ 16న)పేపర్ లీకయినట్టు సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) వర్గాలు వెల్లడించాయి. డార్క్ వెబ్, సోషల్ మీడియా వేదికల్లో ప్రశ్నాపత్రాన్ని రూ.6 లక్షలకు విక్రయించినట్టు పేర్కొన్నాయి. నెట్‌లో అవకతవకలు జరిగినట్టు ఆరోపణలు రావడంతో కేంద్రం ఇప్పటికే రద్దుచేసిన విషయం తెలిసిందే. దీనిపై సీబీఐ విచారణకు ఆదేశించింది.

అయితే పేపర్‌ లీక్‌కు మూలం ఇంకా తెలియరాలేదని సంబంధిత వర్గాలు తెలిపాయి. దేశవ్యాప్తంగా పోటీ పరీక్షలను నిర్వహించే నేషనల్ టెస్టింగ్ ఏజెన్సీతో కలిసి సీబీఐ విచారణ కొనసాగిస్తోంది. అనేక రాష్ట్రాల్లో ఎన్ఈటీ, ఎన్ఇఇటీ (మెడికల్ కోర్సుల కోసం), ఐఏఎస్ (సివిల్ సర్వీస్ కోసం) వంటి పోటీ పరీక్షల్లో అర్హత సాధించాలనే ఆశతో వేలాది మంది శిక్షణ తీసుకుంటారు. పేపర్ లీకేజ్‌లో కోచింగ్ సెంటర్ల పాత్రపై కూడా దర్యాప్తు జరిపి, కొందర్ని సీబీఐ అధికారులు వ్యక్తిగతంగా విచారణకు పిలిచే అవకాశం ఉందని విశ్వసనీయ వర్గాలు పేర్కొన్నాయి.

కేంద్ర విద్యాశాఖ ఫిర్యాదు ఆధారంగా ఈ కేసులో గురువారం సీబీఐ తన మొదటి ఎఫ్‌ఐఆర్ నమోదుచేసింది. గుర్తుతెలియని వ్యక్తులపై విద్యాశాఖ ఆరోపణలు చేయడంతో ఆ దిశగా దర్యాప్తు సాగుతోంది. ‘పరీక్ష సమగ్రత విషయంలో రాజీపడి ఉండొచ్చని ప్రాథమికంగా సూచిస్తోంది’ అని మంత్రిత్వ శాఖ పేర్కొంది. కాగా, లీకేజ్ వెనుక పెద్ద ఎత్తున అవినీతి రాకెట్ ఉందని అధికారులు విశ్వసిస్తున్నారు. దీన్ని దృష్టిలో ఉంచుకుని ప్రశ్నా పత్రాలను సెట్ చేసిన వారితో సహా పరీక్ష నిర్వహణలో భాగస్వాములైన అధికారులను విచారించనున్నట్లు వర్గాలు తెలిపాయి.

మరోవైపు, నీట్ విషయంలో ప్రతిపక్షాలు చేస్తోన్న విమర్శలను కేంద్రం తోసిపుచ్చింది. పరీక్ష విధానంలో అత్యున్నత స్థాయి పారదర్శకత, సమగ్రతను నిర్ధారించడానికి నెట్‌ను రద్దు చేయవలసి వచ్చిందని స్పష్టం చేసింది. నెట్‌ను రద్దు చేసిన తర్వాత దేశవ్యాప్తంగా విశ్వవిద్యాలయాల్లోని విద్యార్థులు నిరసనలు చేపట్టారు. పరీక్షకు రెండు రోజుల ముందే పేపర్ లీకయినట్టు గుర్తించినా ఎటువంటి చర్యలు తీసుకోలేదని మండిపడుతున్నారు.

కాగా, కనీసం ఒక పేపర్ లీకయ్యిందని, కేవలం రూ.5 వేలకే సోషల్ మీడియాలో అమ్మకానికి పెట్టారని లక్నో యూనివర్శిటీలోని విద్యార్థులు ఆరోపిస్తున్నారు. జూన్ 16 నుంచి వాట్సాప్, టెలిగ్రామ్ గ్రూపుల్లో పేపర్ దర్శనమిచ్చిందని పేర్కొన్నారు. కళాశాలలు, యూనివర్సిటీల్లోని ప్రొఫెసర్ ఉద్యోగాలతో పాటు రిసెర్చ్ ఫెలోషిప్‌ల్లో ప్రవేశాల కోసం యూనివర్సిటీ గ్రాంట్స్ కమిషన్ నిర్వహించే అర్హత పరీక్ష నెట్. ఏడాదికి ఈ పరీక్షను జూన్, డిసెంబరులో రెండు సార్లు నిర్వహిస్తారు. ప్రస్తుతం జరిగిన నెట్‌కు 11 లక్షల మంది విద్యార్థులు దరఖాస్తు చేశారు.