అమెరికాలో విషాదం.. ఎంఎస్ చేయడానికి వెళ్లిన ఏపీ విద్యార్థి మృతి

అమెరికాలో ఉన్నత చదువుల కోసం వెళ్లిన మరో తెలుగు విద్యార్థి ప్రాణాలు కోల్పోయాడు. స్నేహితులతో కలిసి సరదాగా వాటర్ ఫాల్స్ చూద్దామని వెళ్లి ప్రాణాలు పోగొట్టుకున్నాడు. తూర్పుగోదావరి జిల్లా గోపాలపురం మండలం చిట్యాలకు చెందిన రైతు గద్దె శ్రీనివాసరావుకు ఒక కుమార్తె, కుమారుడు సంతానం. కుమార్తెకు వివాహం చేయగా.. కుమారుడు సాయి సూర్య అవినాష్ ఎంఎస్ చేయడానికి అమెరికాలోనే న్యూజెర్సీ వెళ్లారు. సోమవారం మిత్రులతో కలిసి వాటర్ ఫాల్స్ చూడటానికి వెళ్లగా.. అక్కడ

ప్రమాదవశాత్తు కాలుజారి వాటర్ ఫాల్స్‌లో పడిపోవడంతో నీట మునిగి ప్రాణాలు కోల్పోయాడు. అవినాష్ మరణంతో కుటుంబ సభ్యులు తీవ్ర విషాదంలో ఉన్నారు. అమెరికాలోని తానా అసోసియేషన్ సహకారంతో విద్యార్థి మృతదేహాన్ని సొంత ఊరికి తీసుకొచ్చేందుకు ఏర్పాట్లు చేస్తున్నారు.ఇదే చిట్యాలకు చెందిన యువకుడు నెల క్రితం కూడా అమెరికాలో ప్రాణాలు కోల్పోయాడు.. ఇప్పుడు అవినాష్ మరణం కలిచివేసింది. చిట్యాలకు చెందిన ఇద్దరు విద్యార్థులు అమెరికాలో మృతి చెందడంతో స్థానికులు తీవ్ర విషాదంలో ఉన్నారు. నెల క్రితం జరిగిన ఘటనలో అమెరికా నుంచి యువకుడి మృతదేహాన్ని రూ.35 లక్షల ఖర్చుతో తీసుకువచ్చేందుకు తానా ప్రతినిధులు సాయం అందించినట్లు తెలుస్తోంది.

గతవారం తెలంగాణకు చెందిన విద్యార్థి అమెరికాలో చనిపోయాడు. ఖమ్మం జిల్లా కల్లూరు మండలం చిన్న కోరుకొండికి కిరణ్ ఉన్నత చదువుల కోసం అమెరికా వెళ్లారు. కిరణ్ స్నేహితులతో కలిసి స్విమ్మింగ్ పూల్‌‌లోకి దిగాడు..ఈత రాకపోవడంతో నీట మునిగి చనిపోయాడు. కిరణ్‌ను కాపాడేందుకు స్నేహితులు ప్రయత్నించినా పలితం లేకుండా పోయింది. వారికి కూడా ఈత రాకపోవడంతో ఏమీ చేయలేకపోయారు. కిరణ్ మరణవార్తతో తల్లిదండ్రులు తీవ్ర విషాదంలో ఉన్నారు. అమెరికాలో తెలుగు విద్యార్థులు వరుస మరణాలు ఆందోళన కలిగిస్తున్నాయి. తెలుగు రాష్ట్రాలకు చెందిన విద్యార్థుల్ని రోడ్డు ప్రమాదాలు, వాటర్ ఫాల్స్ రూపంలో మృత్యువు వెంటాడుతోంది. ఇటీవల బాపట్ల జిల్లాకు చెందిన మరో విద్యార్థి అమెరికాలో జరిగి కాల్పుల్లో ప్రాణాలు కోల్పోయాడు. విద్యార్థిని ఓ షాప్‌లో దుండగుడు గన్‌తో కాల్చి చంపాడు.