మాజీ సీఎం జగన్, ఐపీఎస్ పీవీ సునీల్‌పై కేసు

ఆంధ్రప్రదేశ్‌ మాజీ ముఖ్యమంత్రి వైఎస్ జగన్‌ సహా పలువురిపై కేసు నమోదైంది. తెలుగు దేశం పార్టీ ఎమ్మెల్యే రఘురామకృష్ణరాజు ఫిర్యాదు చేయంతో.. గుంటూరులోని నగరంపాలెం పోలీసులు కేసు ఫైల్ చేశారు. గత వైఎస్సార్‌సీపీ ప్రభుత్వ హయాంలో.. ఓ కేసులో తనను హైదరాబాద్‌లో అరెస్ట్ గుంటూరుకు తీసుకొచ్చారని.. తనను కస్టడీకి తీసుకుని కొట్టడమే కాకుండా హత్యాయత్నం చేశారని రఘురామ నగరంపాలెం పోలీసులకు ఫిర్యాదు చేశారు. రఘురామ ఫిర్యాదుతో మాజీ ముఖ్యమంత్రి వైఎస్ జగన్, మాజీ ఇంటిలిజెన్స్ చీఫ్ సీతారామాంజనేయులు, అప్పటి సీఐడీ డీజీ పీవీ సునీల్ కుమార్‌, సీఐడీ మాజీ ఐజీ సునీల్ నాయక్‌, మాజీ డీఎస్పీ పాల్‌పైనా కేసు నమోదైంది. ఐపీఎస్ సునీల్‌కుమార్‌ (ఏ1), ఇంటెలిజెన్స్‌ మాజీ డీజీ సీతారామాంజనేయులు (ఏ2), వైఎస్ జగన్ (ఏ3), అప్పటి సీఐడీ ఏఎస్పీ విజయ్‌పాల్‌ (ఏ4), గుంటూరు జీజీహెచ్‌ మాజీ సూపరింటెండెంట్‌ డాక్టర్‌ ప్రభావతి (ఏ5)పై వివిధ సెక్షన్ల కింద కేసు నమోదు చేశారు.

వైఎస్సార్‌సీపీ ప్రభుత్వ హయాంలో తనపై జరిగిన కస్టోడియల్‌ టార్చర్‌పై ఉండి టీడీపీ ఎమ్మెల్యే రఘరామకృష్ణరాజు గుంటూరు పోలీసులకు ఇటీవల ఫిర్యాదు చేశారు. తనపై పోలీస్‌ కస్టడీలో హత్యాయత్నం జరిగిందని.. ఆ ఘటనకు, దీనికి సీఐడీ మాజీ చీఫ్‌ సునీల్‌ కుమార్‌, ఐపీఎస్‌ అధికారి సీతారామాంజనేయులు, మాజీ సీఎం వైఎస్‌ జగన్‌మోహన్‌రెడ్డి, అప్పటి సీఐడీ అడిషనల్‌ ఎస్పీ విజయ్‌ పాల్‌ బాధ్యులని ఫిర్యాదులో పేర్కొన్నారు. తనకు కస్టడీలో అయిన గాయాలపై గుంటూరు జీజీహెచ్‌ సూపరింటెండెంట్‌ డా.ప్రభావతి కోర్టుకు తప్పుడు నివేదిక ఇచ్చారని కూడా పోలీసులకు ఫిర్యాదు చేశారు. మాజీ ముఖ్యమంత్రి జగన్‌ను విమర్శిస్తే చంపేస్తానని ఐపీఎస్ పీవీ సునీల్‌ కుమార్‌ బెదిరించారని.. తన ఫిర్యాదుపై విచారణ జరిపి చర్యలు తీసుకోవాలని రఘురామ గుంటూరు జిల్లా ఎస్పీని కోరారు.

2021 మే 14వ తేదీన రఘురామను ఏపీ సీఐడీ అధికారులు.. హైదరాబాద్‌లోని నివాసంలో అదుపులోకి తీసుకున్నారు. రఘురామ పుట్టిన రోజు నాడే అరెస్ట్ చేసి గుంటూరులోని సీబీసీఐడీ ప్రాంతీయ కార్యాలయానికి తరలించారు. కస్టడీ పేరుతో తనను టార్చర్ చేశారని.. కనీసం వైద్య సహాయం, భోజనం ఏర్పాటు చేయలేదని రఘురామ అప్పట్లోనే ఆరోపించారు. కస్టడీలో తనను రబ్బర్ బెల్ట్, లాఠీతో కొట్టడంతోపాటు శారీరకంగా వేధించారని సంచలన వ్యాఖ్యలు చేశారు. అరెస్ట్ చేసిన రోజు రాత్రి 11:30 గంటల ప్రాంతంలో అప్పటి సీబీసీఐడీ, డీజీ పీవీ సునీల్ కుమార్, ఐపీఎస్ సీతారామాంజనేయులుతో పాటుగా పోలీసులు తనను చిత్రహింసలకు గురిచేసినట్లు ఆరోపించారు.

అంతేకాదు రఘురామ ఈ కస్టోడియల్ టార్చర్ వ్యవహారంపై హైకోర్టను కూడా ఆశ్రయించారు.. లోక్‌సభ స్పీకర్‌కు ఫిర్యాదు చేశారు. పీవీ సునీల్ కుమార్‌తో పాటుగా తనను టార్చర్ చేసిన అధికారులపై చర్యలు తీసుకోవాలని కోరారు. ఈ ఘటన జరిగిన సమయంలో ఆయన నరసాపురం తాజాగా కూటమి ప్రభుత్వం అధికారంలోకి వచ్చిన తర్వాత మరోసారి గుంటూరు పోలీసులకు ఫిర్యాదు చేశారు. దీంతో తాజాగా కేసు నమోదు చేశారు.