పట్టాలు తప్పిన 2 రైళ్లు.. ఇద్దరు మృతి

జార్ఖండ్‌లోని చక్రధర్‌పూర్ వద్ద ముంబై హౌరా ఎక్స్‌ప్రెస్ రైలు పట్టాలు తప్పింది. మంగళవారం తెల్లవారుజామున జరిగిన ఈ రైలు ప్రమాదంలో ఇద్దరు ప్రయాణికులు మృతి చెందగా.. మరో 20 మంది ప్రయాణికులకు తీవ్ర గాయాలు అయ్యాయి. మహారాష్ట్రలోని ముంబై నుంచి పశ్చిమ బెంగాల్‌లోని హౌరాకు వెళ్లే హౌరా - సీఎస్ఎంటీ ఎక్స్‌ప్రెస్ రైలు.. మంగళవారం ఉదయం 3.45 గంటల సమయంలో ప్రమాదానికి గురైంది. జార్ఖండ్‌లోని జంషెడ్‌పూర్‌కు 80 కిలోమీటర్ల దూరంలో ఉన్న బరంబంబూ ప్రాంతంలో పట్టాలు తప్పింది. ఈ ఘటనలో హౌరా - సీఎస్ఎంటీ ఎక్స్‌ప్రెస్ రైలులోని 18 బోగీలు ట్రాక్ నుంచి పక్కకు జరిగాయి. గాయపడిన వారిని దగ్గర్లో ఉన్న ఆస్పత్రులకు తరలించి మెరుగైన చికిత్స అందిస్తున్నట్లు అధికారులు వెల్లడించారు.

ఈ ప్రమాద సమాచారం అందుకున్న రైల్వే అధికారులు వెంటనే ఘటనా స్థలానికి చేరుకుని సహాయక చర్యలు చేపట్టారు. ఈ ప్రాంతం ఆగ్నేయ రైల్వే డివిజన్‌ (సౌత్ ఈస్టర్న్ రైల్వే - ఎస్ఈఆర్) కిందకు ప్రయాణికులను వారి గమ్యస్థానాలకు చేర్చేందుకు ప్రత్యామ్నాయ ఏర్పాట్లు చేసినట్లు ఎస్‌ఈఆర్‌ అధికార ప్రతినిధి వెల్లడించారు. ఈ ప్రమాదం జరగడంతో పలు రైళ్లను రద్దు.. మరికొన్ని రైళ్లను దారి మళ్లించినట్లు తెలిపారు. హౌరా-టిట్లాగఢ్‌-కాంటాబాంజీ ఇస్పత్‌ ఎక్స్‌ప్రెస్‌.. హౌరా-బార్బిల్‌ జనశతాబ్ది ఎక్స్‌ప్రెస్‌ను రద్దు చేస్తున్నట్లు సౌత్ ఈస్టర్న్ రైల్వే తెలిపింది.

అయితే ఈ ప్రమాదం జరిగిన ప్రాంతానికి కొద్ది దూరంలోనే మరో గూడ్స్‌ రైలు కూడా పట్టాలు తప్పినట్లు అధికారులు గుర్తించారు. అయితే ఈ రెండు ప్రమాదాలూ ఒకేసారి జరిగాయా అనే విషయంలో ఇంకా స్పష్టత లేదని తెలిపారు. అయితే గూడ్స్ రైలు పట్టాలు తప్పిన ఘటనలో ప్రమాద తీవ్రతను కూడా ఇంకా అంచనా వేయాల్సి ఉందని ఎస్ఈఆర్ అధికారులు వెల్లడించారు. ఈ ప్రమాదంపై పశ్చిమ బెంగాల్‌ ముఖ్యమంత్రి మమతా బెనర్జీ ట్వీట్ చేశారు. ఈ సందర్భంగా కేంద్ర ప్రభుత్వంపై విమర్శలు గుప్పించారు. దేశంలో రైలు ప్రమాదాలు సర్వ సాధారణంగా మారిపోతున్నాయని మండిపడ్డారు. దేశంలో ప్రతీ వారం ఇలాంటి ప్రమాదాలు చోటుచేసుకుంటూనే ఉన్నాయని పేర్కొన్నారు. ఇంకా ఎంతకాలం వీటిని సహించాలి.. కేంద్ర ప్రభుత్వం నిర్లక్ష్యం వీడదా.. ఇదేనా కేంద్ర ప్రభుత్వ పాలన అంటూ దీదీ ఫైర్ అయ్యారు. ఇక ఇదే ఘటనపై జార్ఖండ్‌ సీఎం హేమంత్ సోరెన్ భార్య, జార్ఖండ్ ఎమ్మెల్యే కల్పనా సోరెన్ ఈ ప్రమాద ఘటనపై తీవ్ర విచారం వ్యక్తం చేశారు. గాయపడిన వారికి సహాయక చర్యలు కొనసాగుతున్నాయని పేర్కొన్నారు.