త్వరలోనే ఆదరణ పనిముట్ల పంపిణీ.. చంద్రబాబు కీలక ఆదేశాలు

వైసీపీ హయాంలో నిలిపివేసిన ఆదరణ పనిముట్లను వెంటనే పంపిణీ చేయాలని ఏపీ ప్రభుత్వం ఆదేశించింది. ఈ మేరకు కలెక్టర్ల సమావేశంలో సీఎం చంద్రబాబు నాయుడు స్పష్టం చేశారు. బీసీల్లోని చేతివృత్తులను ప్రోత్సహించడానికి గతంలో ఆదరణ పథకం కింద పనిముట్లను అందించామన్న చంద్రబాబు.. గత ప్రభుత్వం నిర్లక్ష్యంగా కొన్ని ప్రాంతాల్లో పనిముట్లు లబ్ధిదారులకు అందలేదన్నారు. చిత్తూరు, అల్లూరి సీతారామరాజు మన్యం, శ్రీకాకుళం జిల్లాల్లో పనిముట్లు పంపిణీ చేయలేదన్న సీఎం చంద్రబాబు.. ఆయా జిల్లాలలో వాటిని వెంటనే లబ్ధిదారులకు అందించాలని ఆదేశించారు. గత టీడీపీ ప్రభుత్వంలో ప్రారంభించిన బీసీ భవనాల నిర్మాణాలను కూడా వేగంగా పూర్తిచేయాలని స్పష్టం చేశారు.

ఇక ఎస్టీల కోసం గతంలో టీడీపీ ప్రభుత్వం చైతన్యం అనే కార్యక్రమం తెచ్చిన సంగతిని చంద్రబాబు ఈ సందర్భంగా ప్రస్తావించారు. అలాగే గౌడ, ఈడిగ సామాజిక వర్గాల ప్రజలు కల్లు విక్రయాలకు ప్రాధాన్యమిస్తారన్న సీఎంం.. ఆయా సామాజికవర్గాలకు 15 నుంచి 20 శాతం షాపులను కేటాయించాలన్నారు. చేనేత వస్త్రాలకు ప్రాధాన్యం పెరుగుతున్న నేపథ్యంలో.. చేనేత రంగంలోకి టెక్నాలజీని తీసుకువచ్చే అంశంపై ఆలోచన చేయాలని చంద్రబాబు అన్నారు. మరోవైపు పౌరసరఫరాల విధానం ద్వారా గతంలో ధాన్యం కొనుగోలు చేసేవాళ్లమన్న చంద్రబాబు.. ఆ విధానంపై దృష్టి సారించాలని సూచించారు.

అలాగే రైతుల నుంచి కొనుగోలు చేసిన ధాన్యానికి 48 గంటల్లోనే డబ్బులు చెల్లించాలని సీఎం చంద్రబాబు నాయుడు ఆదేశించారు. చిరిగిన గోతాలు కాకుండా నాణ్యమైన గోతాలను రైతులకు అందించాలన్నారు. రైతుల నుంచి సేకరించిన ధాన్యాన్ని దగ్గరలోని రైస్ మిల్లులకు తరలించేలా చర్యలు తీసుకోవాలన్నారు. అలాగే రైతులు తృణధాన్యాలు సాగుచేసేలా వారికి అవగాహన కల్పించాలని చంద్రబాబు చెప్పారు. రేషన్ షాపుల్లోనూ తృణధాన్యాల విక్రయం జరగాలని చంద్రబాబు అన్నారు. జిల్లాల్లో రెవెన్యూ అంశాల పర్యవేక్షణకు అదనంగా జాయింట్ కలెక్టర్‌ను నియమించాలని సూచించారు.

ఇక రేషన్ పంపిణీ విషయంలోనూ చంద్రబాబు కీలక ఆదేశాలు ఇచ్చారు. వైసీపీ ప్రభుత్వంలో ఇంటింటికీ రేషన్ అంటూ వాహనాలను తీసుకువచ్చారని.. వాటికోసం సుమారుగా రెండు వేల కోట్లు ఖర్చుచేశారని ఆరోపించారు. రేషన్ సరుకులను రేషన్ దుకాణాల ద్వారా పంపిణీ చేయాలన్న సీఎం.. రేషన్ దుకాణాలకు రాలేని వారికి ఇంటింటి వెళ్లి ఇవ్వాలని సూచించారు. అంగన్వాడీ కేంద్రాల్లో న్యూట్రీ గార్డెన్స్ ఏర్పాటు చేయాలని.. క్షేత్రస్థాయికి వెళ్లే అంగన్వాడీ సూపర్ వైజర్లకు టీఏలు అందిస్తామని చంద్రబాబు ప్రకటించారు.