చంద్రబాబుపై కేసులు.. ఏపీ హైకోర్టు కీలక ఆదేశాలు

ఆంధ్రప్రదేశ్ ముఖ్యమంత్రి నారా చంద్రబాబు నాయుడిపై ఉన్న కేసుల్ని సీబీఐ, ఈడీకి అప్పగించాలంటూ దాఖలైన పిటిషన్‌పై ఏపీ హైకోర్టులో విచారణ జరిగింది. అయితే ఈ పిటిషన్‌పై విచారణ అర్హతపై అడ్వకేట్ జనరల్ దమ్మాలపాటి శ్రీనివాస్ అభ్యంతరం వ్యక్తం చేశారు. ఈ కేసుల్ని ప్రభుత్వం సమీక్షిస్తామన్నప్పటికి అంతిమ నిర్ణయం పబ్లిక్ ప్రాసిక్యూటర్ కదా అంటూ ఆంధ్రప్రదేశ్ హైకోర్టు ధర్మాసనం ప్రశ్నించింది. ఈ పిటిషన్‌పై విచారణ అనర్హతపై కౌంటర్ దాఖలు చేయాలని ఏజీని ఆదేశించింది. అలాగే పూర్తి స్థాయి కౌంటర్ దాఖలు చేస్తామని ఏజీ కోర్టుకు తెలపడంతో.. ఈ పిటిషన్‌పై విచారణను సెప్టెంబర్ నెలకు వాయిదా వేసింది.

 అలాగే కేవలం చంద్రబాబు ముఖ్యమంత్రిగా ఉన్నారని సీబీఐ విచారణకు ఆదేశించడం సబబు కాదని.. ప్రభుత్వం తరఫున సుప్రీం కోర్టు సీనియర్ న్యాయవాది ముఖుల్ రోహత్గి వాదనలు వినిపించారు. ఇప్పటికే ఐదు కేసుల్లో విచారణ పూర్తి చేసి ఛార్జ్ షీట్లు దాఖలు చేశారని కోర్టుకు వివరించారు.. రాజకీయ కక్షతో పెట్టిన కేసులు సమీక్షిస్తామని ప్రభుత్వం చెప్పిందన్నారు రోహత్గి.

 గత వైఎస్సార్‌సీపీ ప్రభుత్వ హయాంలో చంద్రబాబు ముఖ్యమంత్రి (2014-2019)గా ఉన్న సమయంలో తీసుకున్న నిర్ణయాలపై కేసులు నమోదు చేశారు. చంద్రబాబుపై వరుసగా కేసులు నమోదు చేశారు. చంద్రబాబుపై 2020లో 5, 2021లో 9, 2022లో 2, 2023లో 6 కేసులు నమోదయ్యాయి. స్కిల్ డెవలప్‌మెంట్, రాజధాని భూములు, అమరావతి ఇన్నర్‌ రింగు రోడ్డు, ఏపీ ఫైబర్‌నెట్‌, అమరావతి అసైన్డ్‌ భూములు, ఉచిత ఇసుక విధానం, మద్యం విధానం వంటి అంశాలపై సీఐడీ కేసులు నమోదు చేసింది. ఈ కేసుల్ని సీబీఐకి అప్పగించాలని పిటిషన్ దాఖలైంది.

చంద్రబాబుపై నమోదైన కేసుల్ని సీబీఐకి, ఈడీకి అప్పగించాలని సీనియర్ జర్నలిస్ట్ బాల గంగాధర తిలక్‌ ఈ పిటిషన్ దాఖలు చేశారు. చంద్రబాబుపై నమోదైన ఈ కేసుల్లో పోలీసులు నిష్పాక్షికంగా దర్యాప్తు చేసే పరిస్థితులు లేవని.. అందుకే నిష్పాక్షికంగా, పారదర్శకంగా, వేగవంత దర్యాప్తు కోసం ఈ కేసుల దర్యాప్తు బాధ్యతల్ని సీబీఐ, ఈడీలకు అప్పగించాలని పిటిషన్‌లో కోరారు. ఈ కేసుల్ని నీరుగార్చేలా వ్యవహరిస్తున్నారని ఆరోపించారు. అంతేకాదు రెడ్ బుక్ పేరుతో బెదిరింపులకు దిగుతున్నారని ప్రస్తావించారు. ఈ కేసుల్ని సీబీఐ, ఈడీ దర్యాప్తు చేయాలని.. విచారణ పురోగతికి సంబంధించి ఎప్పటికప్పుడు స్థాయీ నివేదికలను కోర్టు ముందుంచేలా ఆదేశించాలని కోరారు.

చంద్రబాబు ఒక్కరు మాత్రమే కాదు.. మంత్రులు నారా లోకేష్, నారాయణ, అచ్చెన్నాయుడు, కొల్లు రవీంద్రతో పాటూ టీడీపీ నేతలపై కేసుల్ని సీబీఐ, ఈడీలకు అప్పగించాలని కూడా కోరారు. ఎమ్మెల్యే చింతమనేని ప్రభాకర్, మాజీ మంత్రి దేవినేని ఉమామహేశ్వరరావు, వ్యాపార వేత్తలు లింగమనేని రమేష్, వేమూరు హరికృష్ణ ప్రసాద్‌ పేర్లను కూడా ప్రస్తావించారు.. అలాగే కొన్ని కంపెనీలపై నమోదు చేసిన కేసుల్ని అప్పగించాలని పిటిషన్‌లో కోరారు.