తుంగభద్ర డ్యామ్ వద్ద స్టాప్ లాగ్ గేట్ ఏర్పాటు,,,ఆగిపోయిన నీటి వృథా

తుంగభద్ర జలాశయంపై చేపట్టిన ఆపరేషన్ విజయవంతమైంది. విరిగిన గేటు స్థానంలో స్టాప్ లాగ్ గేట్ నిపుణులు సక్సెస్ పుల్‌గా ఏర్పాటు చేశారు. ఐదు ఎలిమెంట్లను ప్రవాహానికి అడ్డంగా అమర్చటంలో నిపుణులు విజయవంతమయ్యారు. దీంతో విరిగిపోయన 19వ గేట్ నుంచి నీటి సరఫరా ఆగిపోయింది. స్టాప్ లాగ్ గేట్‌గా మొత్తం ఐదు ఎలిమెంట్లను అమర్చారు. నిపుణుడు కన్నయ్య నాయుడు పర్యవేక్షణలో స్టాప్ లాగ్ గేట్ ఏర్పాటు చేశారు. మరోవైపు నీటి సరఫరా ఆగిపోవటంతో విరిగిపోయిన 19వ గేటు కనిపించింది. దీంతో సుమారు వారం రోజుల తర్వాత తుంగభద్ర జలాశయాన్ని కట్టుదిట్టం చేయడంలో ఇంజినీర్ల, నిపుణులు విజయవంతమయ్యారు.

ఇక తాత్కాలిక గేట్‌ అమర్చడానికి ముందు 30 టన్నుల బరువున్న సెంటర్‌ వెయిట్‌ను ఇంజినీర్లు విజయవంతంగా కిందకు దించారు. అయితే, ఈ సెంటర్ వెయిట్‌ను విజయవంతంగా కిందికి దించడానికి పడిన శ్రమ వర్ణనాతీతం. ఒకటి రెండు దఫాల వైఫల్యాల అనంతరం ఎన్నో మెలకువలతో ఆనకట్ట పైభాగంలోని స్కైవాక్‌ విభాగాన్ని తాత్కాలికంగా పక్కకు తొలగించి.. ఆ వైపు నుంచే కిందకు దించారు. ఇలా మొత్తం ఐదు ఎలిమెంట్లను ఏర్పాటు చేశారు. మరోవైపు సుమారుగా వారం పదిరోజుల కిందట తుంగభద్ర జలాశయం 19వ గేటు వరద ఉద్ధృతికి కొట్టుకుపోయిందని తెలియగానే.. కర్ణాటక, ఆంధ్రప్రదేశ్, తెలంగాణ రాష్ట్రాల పరిధిలోని కొప్పళ, విజయనగర, బళ్లారి, రాయచూరు, కర్నూలు, మహబూబ్‌నగర్, అనంతపురం, కడప జిల్లాల్లో లక్షలాది మంది ఆయకట్టు రైతులు కంగారు పడ్డారు.

తుంగభద్ర డ్యాంకు తాత్కాలిక గేటు.. హ్యాట్సాఫ్ కన్నయ్య నాయుడు

60 టీఎంసీల నీటిని జలాశయం నుంచి ఖాళీ చేయాలని నిపుణులు చెప్పడంతో రైతులకు దిగ్భ్రాంతికర పరిస్థితి ఏర్పడింది. ఇలాంటి సమయంలో ఎంతో అనుభవజ్ఞుడైన ఇంజినీరింగ్ నిపుణుడు కన్నయ్యనాయుడు రంగంలోకి దిగారు. తన టీమ్‌తో కలిసి తాత్కాలిక గేటు ఏర్పాటుకు ప్రయత్నాలు మొదలుపెట్టారు. శుక్రవారం ఉదయం నుంచి జలాశయం ప్రాంతంలో ఎలిమెంటు బిగించేందుకు ఎన్నో ఇబ్బందులు పడ్డారు. రెండు భారీ క్రేన్లతో ఎలిమెంటును దించుతుండగా కౌంటర్‌ లాక్‌ గేటు అడ్డుతగిలింది. క్రస్ట్‌ గేటును కిందకు దించితే, కౌంటర్‌ లాక్‌ గేటు పైకి లేస్తుంది. క్రస్ట్‌ గేటును పైకి ఎత్తితే, కౌంటర్‌ లాక్‌గేటు కిందకు దిగే పరిస్థితి. సుమారు 60 అడుగుల వెడల్పు ఉన్న ఎలిమెంటును బిగించే సమయంలో కౌంటర్‌లాక్‌ గేటు అడ్డుపడింది. పని పూర్తవుతుందనుకున్న ఇంజినీర్లకు నిరాశే ఎదురైంది.

అయితే అతికష్టంమీద మధ్యాహ్నం వరకు కృషి చేసి కౌంటర్‌ లాక్‌ గేటును తొలగించారు. మరోసారి ఎలిమెంటును దించే పనులు ఉండగా.. కౌంటర్‌లాక్‌ గేటుపైన ఉన్న స్కైవాక్‌ అడ్డు తగిలింది. మధ్యాహ్నం నుంచి ప్రయత్నాలు చేసి, సాయంత్రం 6 గంటల 30 నిమిషాలకు స్కైవాక్‌ను తొలగించారు. డ్యాం నిర్మాణ సమయంలో వీటిని పకడ్బందీగా ఏర్పాటు చేయడంతో తొలగించడం అంత సులభమైన పనికాలేదు. అయినప్పటికీ నిపుణుల మార్గదర్శనంలో కార్మికులు రెండు అడ్డంకులను తొలగించారు. అప్పటి నుంచి ఎలిమెంటును బిగించే పనులు ప్రారంభించారు. అలా మొత్తం ఐదు ఎలిమింట్లను ఏర్పాటు చేశారు. దీంతో నీటి సరఫరా ఆగిపోయింది. విజయవంతంగా స్టాప్ లాగ్ గేట్ ఏర్పాటు చేయటంతో అటు అధికారులు, ఇటు రైతులు సంతోషం వ్యక్తం చేస్తున్నారు.