ఆస్పత్రిలో మహిళా డాక్టర్‌పై రోగి, అతడి మిత్రులు దాడి

కోల్‌కతాలో ట్రెయినీ డాక్టర్ హత్యాచార ఘటన దేశాన్ని కుదిపేస్తోంది. ఈ తరుణంలో ముంబయిలోని ఓ ఆస్పత్రిలో మరో వైద్యురాలిపై రోగి, అతడి సహాయకులు దాడికి పాల్పడ్డారు. ముంబయి సియోన్ ఆస్పత్రిలో ఆదివారం తెల్లవారుజామున ఈ ఘటన చోటుచేసుకుంది. నైట్ డ్యూటీలో ఉన్న ట్రెయినీ డాక్టర్‌పై మద్యం మత్తులో ఉన్న కొందరు దాడికి పాల్పడినట్టు వైద్యులు తెలిపారు. ఆదివారం తెల్లవారుజామున 3.30 గంటల సమయంలో గాయపడిన ఓ వ్యక్తిని తీసుకుని కొందరు ఆస్పత్రికి వచ్చారని, అతడికి చికిత్స చేస్తున్న సమయంలోనే డాక్టర్‌‌ను వేధించి, దాడికి దిగారని చెప్పారు.

 రోగితో పాటు మద్యం మత్తులో ఉన్న ఐదారుగురు వచ్చారని, వైద్యురాలిపై భౌతిక దాడికి పాల్పడ్డారని అన్నారు. ఈ దాడి నుంచి తప్పించుకునే క్రమంలో బాధితురాలికి గాయాలైనట్టు పేర్కొన్నారు. వైద్యురాలు కేకలు వేయడంతో రోగితో పాటు అందరూ అక్కడ నుంచి పారిపోయారు. ఈ ఘటనపై సియోన్ పోలీస్ స్టేషన్‌లో ఫిర్యాదు చేయడంతో కేసు నమోదయ్యింది.

పోలీస్ స్టేషన్‌కు చేరుకున్న సియోన్ హాస్పిటల్ రెసిడెంట్ డాక్టర్ల.. ‘ఈ సంఘటన భద్రతా వైఫల్యాన్ని ఎత్తి చూపుతోంది’ అని అన్నారు. ‘ఆస్పుత్రుల్లో వైద్యుల భద్రత గురించి పట్టించుకోవడం లేదు.. ఈ పరిస్థితిపై తక్షణమే స్పందించి, అన్ని ఆసుపత్రులలో కఠినమైన భద్రతా చర్యలను అమలు చేయాల్సిన అవసరం ఉంది’ అని వ్యాఖ్యానించారు.

‘తెల్లవారుజామున 3.30 గంటలకు గాయాలతో ఉన్న వ్యక్తి, అతడి బంధువులు ఆసుపత్రికి వచ్చారు.. ఫుల్లుగా మద్యం సేవించి మత్తులో ఉన్నారు... రెసిడెంట్ డాక్టర్‌తో గొడవపడి దాడికి దిగారు.. ముంబయిలో ఈ ఘటన జరగడం తీవ్ర ఆందోళనకరం’ అని బీఎంసీ మార్డ్ వైద్యుడు డాక్టర్ అక్షయ్ మోరే అన్నారు. ఇక, కోల్‌కతా వైద్యురాలి హత్యాచార ఘటనకు నిరసనగా ఇండియన్ మెడికల్ అసోసియేషన్ పిలుపు మేరకు వైద్యులు చేపట్టిన 24 గంటల సమ్మెతో దేశవ్యాప్తంగా అన్ని రకాల వైద్య సేవలు నిలిచిపోయాయి. అత్యవసర సేవలు మినహా అన్నిరకాల ఓపీలను నిలిచిపోవడంతో లక్షల మంది తీవ్ర ఇబ్బందిపడ్డారు.