బీజేపీలో వైసీపీ విలీనం,,,బీజేపీ ఎమ్మెల్యే విష్ణుకుమార్ రాజు

తెలంగాణ రాజకీయాల్లో ఇప్పుడు బీజేపీలో బీఆర్ఎస్ విలీనం గురించే హాట్ టాపిక్‌గా ఉంది. ముఖ్యమంత్రి రేవంత్ రెడ్డి వ్యాఖ్యలతో ఇది మరింత ముదిరింది. అయితే బీజేపీ- బీఆర్ఎస్ విలీనాన్ని ఆ రెండు పార్టీలు కూడా తప్పుబడుతున్నాయి. గిట్టనివారి ప్రచారమని.. పరువు నష్టం దావా కూడా వేస్తామంటూ బీఆర్ఎస్ నేతలు హెచ్చరిస్తున్నారు. అయితే తెలంగాణలో రాజకీయ పంచాయతీ ఇలా సాగుతున్న వేళ.. ఏపీలోనూ విలీనమనే ప్రస్తావన వచ్చింది. ఆ ప్రస్తావన తెచ్చింది కూడా మరెవరో కాదు.. బీజేపీ సీనియర్ లీడర్, ఎమ్మెల్యే విష్ణుకుమార్ రాజు.. సోమవారం మీడియాతో మాట్లాడిన విష్ణుకుమార్ రాజు.. వైసీపీపైనా, వైఎస్ జగన్‌పైనా ఓ రేంజులో విరుచుకుపడ్డారు. అంతేకాదు.. వచ్చే ఎన్నికల్లో వైసీపీకి ఎన్ని సీట్లు వస్తాయనే దానిపైనా జోస్యం చెప్పారు.

2029 ఎన్నికల్లో ఏపీలో వైసీపీకి ఐదు సీట్లు కూడా రావని విష్ణుకుమార్ రాజు ఎద్దేవా చేశారు. అలాగే వైసీపీని.. బీజేపీలో విలీనం చేస్తామంటే ఒప్పుకోమని స్పష్టం చేశారు. బీజేపీలో వైసీపీ విలీనాన్ని తీవ్రంగా వ్యతిరేకిస్తామని అన్నారు. వైసీపీని విలీనం చేసుకుని బీజేపీకూడా నాశనం కావాలా అంటూ సెటైర్లు వేశారు. వైఎస్ జగన్ లక్షల కోట్ల రూపాయలు దోచుకుని.. బెంగళూరులో ప్యాలెస్‌లో ఉంచారన్న విష్ణుకుమార్ రాజు.. ఆ ప్యాలెస్ మీద సోదాలు చేయకుండా కేంద్ర సంస్థలు ఏం చేస్తున్నాయని ప్రశ్నించారు. వైఎస్ జగన్ విమానంలో వెళ్తున్నప్పుడు కూడా చెక్ చేయాలని సూచించారు. వచ్చే ఎన్నికల్లో వైసీపీకి ఐదు సీట్లు కూడా రావన్న విష్ణుకుమార్ రాజు.. ఈ విషయాన్ని రాసిపెట్టుకోవాలని వైసీపీ నేతలకు సూచించారు.

మరోవైపు తెలంగాణలో బీజేపీలో బీఆర్ఎస్ పార్టీ విలీనంపైనా విష్ణుకుమార్ రాజును విలేకర్లు ప్రశ్నించారు. అయితే తెలంగాణలో మొన్నటి వరకూ అధికారంలో ఉన్న బీఆర్ఎస్.. ప్రస్తుతం ఇబ్బందికర పరిస్థితుల్లో ఉందన్న విష్ణుకుమార్ రాజు.. విలీనం వార్తలపై తెలంగాణ బీజేపీ నేతలు మాట్లాడాలని అన్నారు. పక్క రాష్ట్ర రాజకీయాలపై వ్యాఖ్యానించడం సరికాదన్నారు.

మరోవైపు వైసీపీ నుంచి గెలిచిన 11 మంది ఎమ్మెల్యేలు కూడా ఆ పార్టీలో మిగలరని.. మంత్రి వాసంశెట్టి సుభాష్ అన్నారు. వారంతా తమతో టచ్‌లో ఉన్నారంటూ సంచలన వ్యాఖ్యలు చేశారు. తాము గేట్లు ఓపెన్ చేస్తే వైఎస్ జగన్ తప్ప ఆ పార్టీలో ఎవరూ మిగలరని సుభాష్ అన్నారు. అయితే వైసీపీ నేతలను పార్టీలోకి చేర్చుకోవద్దని చంద్రబాబు చెప్పారన్న మంత్రి.. అందుకే తాము చేరికలను ఆహ్వానించలేదన్నారు. ఇక వైసీపీ పాలనలో జరిగిన అవినీతి గురించి ప్రశ్నిస్తారనే భయంతోన వైఎస్ జగన్ అసెంబ్లీకి రావడానికి వెనుకాడుతున్నారంటూ మంత్రి ఎద్దేవా చేశారు.