అమ‌ర్ సింగ్ కు అందుకే రాఖీ క‌ట్ట‌లేద‌ట‌!

ద‌క్షిణాదికి చెందిన ఒక సినీ న‌టి.. బాలీవుడ్ కి వెళ్లి రాణించ‌ట‌మే ఎక్కువ‌. అలాంటి న‌టి రాజ‌కీయాల్లోకి రావ‌టం ఒక ఎత్తు అయితే.. త‌న‌కు ఏ మాత్రం ప‌రిచ‌యం లేని ఉత్త‌రాదికి వెళ్లి రాణించ‌టం అంటే మాట‌లు కాదు. ఒక సౌత్ హీరోయిన్.. న‌టిగా.. రాజ‌కీయ నేత‌గా పేరు ప్ర‌ఖ్యాతుల్ని సొంతం చేసుకోవ‌టం ఒక విశేష‌మైతే.. అంతేలా ఆరోప‌ణ‌లు ఎదుర్కోవ‌టం ఆమెకు మాత్ర‌మే సొంతం. ఆమె.. నాటికి నేటికి బ్యూటీగా బ్రాండ్ ఇమేజ్ ఉన్న జ‌య‌ప్ర‌ద‌.
తాజాగా ఆమె క్వీన్స్ లైన్ లిట‌రేచ‌ర్ ఫెస్టివ‌ల్ లో ర‌చ‌యిత రామ్ క‌మ‌ల్ తో క‌లిసి మాట్లాడారు. ఈ సంద‌ర్భంగా ఆమె త‌న వ్య‌క్తిగ‌త విష‌యాల్ని వెల్ల‌డించారు. ఒక మ‌హిళ‌గా ఉత్త‌ర‌ప్ర‌దేశ్ రాష్ట్రంలో ఎన్నిక‌ల్లో పోటీ చేస్తున్నందుకు తాను ఎన్నో ఇబ్బందులు ఎదుర్కొన్న‌ట్లు చెప్పారు.
తాను ఇంటి నుంచి బ‌య‌ట‌కు వెళితే క్షేమంగా తిరిగి వ‌స్తానో లేదో కూడా త‌న త‌ల్లికి చెప్ప‌లేక‌పోతున్నాన‌ని చెప్పారు. త‌న‌కు ఏ ఒక్క రాజ‌కీయ నాయ‌కుడు మ‌ద్ద‌తుగా నిల‌వ‌లేద‌న్నారు. ములాయం కూడా ఎలాంటి సాయం చేయ‌లేద‌న్నారు.  సోష‌ల్ మీడియాలో మార్ఫింగ్ చేసిన త‌న ఫోటోల గురించి సూసైడ్ చేసుకోవాల‌ని అనుకున్నట్లు ఆమె చెప్పారు.
తాను గాడ్ ఫాద‌ర్ గా భావించే వ్య‌క్తితో త‌న‌కు సంబంధాలు అంట‌క‌ట్టి.. అస‌త్యాల్ని ప్ర‌చారం చేస్తున్న తీరుపై ఆమె మండిప‌డ్డారు. పురుషాధిక్య‌త ప్ర‌పంచంలో రాజ‌కీయాల్లో రాణించ‌టం మ‌హిళ‌ల‌కు నిజ‌మైన యుద్దంగా ఆమె అభివ‌ర్ణించారు. స‌మాజ్ వాదీ పార్టీ ఎంపీగా ఉన్న స‌మ‌యంలో అజ‌మ్ ఖాన్ వేధించార‌ని.. త‌న‌పై యాసిడ్ దాడికి ప్ర‌య‌త్నిచార‌న్నారు. ఆ త‌ర్వాతి రోజు  తానింకా బ‌తికే ఉన్నానా? అనే అనుమానం క‌లిగింద‌న్నారు.
త‌న‌పై సోష‌ల్ మీడియాలో పెద్ద ఎత్తున అస‌త్య ప్ర‌చారం చేస్తున్న వేళ‌.. అమ‌ర్ సింగ్ ఆసుప‌త్రిలో ఉన్నార‌ని... ఆయ‌న తిరిగి వ‌చ్చిన త‌ర్వాతే త‌న‌కు చేయూత‌నిచ్చార‌న్నారు. అలాంటి వ్య‌క్తిని తాను పెద్ద మ‌నిషిగా భావిస్తుంటే.. సంబంధాలు అంట‌క‌డుతున్నార‌న్నారు. రాఖీ క‌ట్టినా త‌ప్పుగానే చూస్తార‌ని.. అందుకే తాను రాఖీ క‌ట్ట‌లేద‌న్నారు. ఇటీవ‌ల విడుద‌లైన మ‌ణిక‌ర్ణిక సినిమాను చూసిన‌ప్పుడు త‌న‌పాత్ర‌ను తానే చూసుకున్న‌ట్లు ఉంద‌న్నారు.