కిమ్‌ను సర్‌ప్రైజ్ చేసిన పుతిన్.. గిఫ్ట్‌గా అరుదైన 24 తెల్ల గుర్రాలు

రష్యా అధినేత వ్లాదిమిర్‌ పుతిన్, ఉత్తర కొరియా నియంత కిమ్‌జోంగ్‌ ఉన్‌ మధ్య ఉన్న స్నేహం గురించి ప్రత్యేకంగా చెప్పాల్సిన అవసరం లేదు. తరుచూ ఈ ఇరు దేశాధినేతలు కలుసుకుని.. పరస్పరం కానుకలు ఇచ్చిపుచ్చుకోవడం షరమూమూలే. గతంలో పంగ్సన్‌ అనే వేట జాగిలాలను పుతిన్‌కు కిమ్‌ కానుకగా ఇవ్వగా.. రష్యా అధ్యక్షుడు ఆరుస్‌ లిమోసిన్‌ కారు‌ను ఆయనకు బహూకరించారు. ఇరువురూ ఈ కారులో కొద్దిసేపు షికారు కూడా చేశారు. తాజాగా, మరోసారి కిమ్‌కు మాస్కో అధినేత కానుకలు పంపారు. తనకు పుతిన్ పంపిన ఈ అరుదైన కానుకలను చూసి కిమ్ తెగ మురిసిపోతున్నాడు.

ఉక్రెయిన్‌పై దండయాత్ర సాగిస్తోన్న రష్యాకి ఉత్తర కొరియా భారీగా ఆయుధ సహకారం అందిస్తోంది. ఈ సాయానికి కృతజ్ఞతగా కిమ్‌కి 24 తెల్ల గుర్రాలను గిఫ్ట్‌గా అందజేశారు పుతిన్. ఓర్లోవ్ ట్రోటర్ అనే ఈ అరుదైన జాతి గుర్రాలంటే కిమ్‌కి చాలా ఇష్టమట. అందుకే వాటినే పుతిన్ బహుమతిగా పంపారని తెలుస్తోంది. తన మిత్రుడు పంపిన గుర్రాలపై సరిహద్దుల్లో స్వారీ చేస్తూ కిమ్ ఎంజాయ్ చేశాడు. కాగా, రెండేళ్ల క్రితం కూడా ఇవే గుర్రాలపై కిమ్ స్వారీ చేసిన ఫోటోలు అప్పట్లో వైరల్ అయ్యాయి.

ఉత్తర కొరియా, రష్యాల మధ్య పలు కీలక ఒప్పందాలు కుదిరిన క్రమంలో ఇలా ఒకరికొకరు కానుకలు ఇచ్చుకున్నారు. ఇక, దేశంలో ప్రజలు ఆకలితో అలమటించిపోతున్న కిమ్‌కు అవేమీ పట్టవు. ప్రపంచంలోనే అత్యంత శక్తివంతమైన అణ్వాయుధ దేశంగా ఉత్తర కొరియా ఉండాలనేది ఆయన బలమైన కోరిక. ఆ దేశ సంపద అంతా బాలిస్టిక్ క్షిపణి, అణ్వాయుధ ప్రయోగాలపైనే ఖర్చు చేస్తున్నారు. ఐక్యరాజ్యసమితి సహా అంతర్జాతీయ సమాజం ఆంక్షలను సైతం బేఖాతరుచేస్తూ పరీక్షలను కొనసాగిస్తున్నారు.

కాగా, ఉక్రెయిన్‌తో యుద్ధం చేస్తోన్న రష్యాకు ఆయుధాలను సరఫరా చేసినందుకు కృతజ్ఞతగా పుతిన్ ఈ రిటర్న్‌గిఫ్ట్‌ను పంపినట్లు మీడియా కథనాలు పేర్కొన్నాయి. ఓర్లోవ్‌ ట్రోటర్‌ జాతికి చెందిన 19 మగ గుర్రాలు (స్టాలియన్లు), ఐదు ఆడ గుర్రాలను రష్యా పంపింది. ఈ గుర్రాలను ఉత్తర కొరియా వారసత్వానికి ప్రతీకగా భావిస్తారు. కిమ్‌కి వ్యక్తిగతంగా గుర్రాలంటే చాలా ఇష్టం. గతంలోనూ కిమ్‌కు పుతిన్ 400కిపైగా మేకలను కానుకగా పంపడం గమనార్హం.

ఇక, సైనిక విభాగాల్లోనూ అశ్వికదళం ఏర్పాటుకు భారీగానే నిధులు కేటాయిస్తున్నాయి. 2020-23 మధ్య కాలంలో పెద్ద సంఖ్యలో గుర్రాలనూ దిగుమతి చేసుకున్నారు. అందుకే అటు సైన్యంతో పాటు తన వ్యక్తిగత కోరికలను తీర్చుకోడానికి గుర్రాలను కొనుగోలు చేస్తున్నారు.