ఇజ్రాయేల్‌లో ఆందోళనలు.. నెతన్యాహుపై తీవ్ర ఆగ్రహం

ఇజ్రాయెల్‌-హమాస్‌ మధ్య కాల్పుల విరమణకు ఎడతెగని చర్చలు కొనసాగుతున్న తరుణంలో కీలక పరిణామం చోటు చేసుకుంది. హమాస్‌ చెరలోని ఆరుగురు బందీల మృతదేహాలను దక్షిణ గాజాలోని రఫాలో ఓ సొరంగం వద్ద ఆదివారం ఉదయం ఇజ్రాయెల్‌ సైన్యం గుర్తించింది. వీరు 48 గంటల కిందట మృతిచెందినట్టు పోస్టుమార్టం నివేదికలో వెల్లడయ్యింది. మృతుల్లో ఇద్దరు మహిళలు సహా ఆరుగురు ఉన్నారు. గతేడాది అక్టోబరు 7న ఇజ్రాయేల్‌లోకి చొరబడిన హమాస్ సాయుధులు దాదాపు 1,200 మందిని అతికిరాతకంగా చంపి నరమేధానికి పాల్పడిన విషయం తెలిసిందే. అలాగే, దాదాపు 250 మందిని బందీలుగా చేసుకున్నారు. వీరిలో 101 మంది హమాస్‌ చెరలో ఉన్నారు.

కాగా, బందీల మృతితో ఇజ్రాయేల్ పౌరుల్లో ఆగ్రహం కట్టలు తెంచుకుంది. ఆ దేశ ప్రధాన మంత్రి బెంజిమిన్ నెతన్యాహుపై విపక్షాలు, బాధిత కుటుంబాలు తీవ్రస్థాయిలో విరుచుకుపడ్డాయి. కాల్పుల విరమణ ఒప్పందం కుదరకపోవడానికి నెతన్యాహుయే కారణమని మండిపడుతున్నారు. రాజధాని టెల్‌ అవీవ్‌ వీధుల్లో భారీ ప్రదర్శనలకు దిగారు. సోమవారం నుంచి దేశవ్యాప్తంగా సమ్మెకు దిగుతున్నారు. ఈ మేరకు ఇజ్రాయేల్‌లోని అతి పెద్ద కార్మిక సంఘం హిస్ట్రాడ్రట్‌ లేబర్‌ ఫెడరేషన్‌ ప్రకటించింది. ఇక తాము కోల్పోయింది చాలని, బందీలుగా ఉన్న మిగతావారిని ప్రాణాలతో విడిపించాలని బాధిత కుటుంబాలు కోరుతున్నాయి.

కానీ, నెతన్యాహు వైఖరిలో ఏ మాత్రం మార్పు లేదు. బందీలను హత్య చేసిన హమాస్‌పై ప్రతీకారం తీర్చుకుంటామని ఆయన పునరుద్ఘాటించారు. అయితే, ఇజ్రాయేల్‌ వైమానిక దాడిలోనే బందీలు మృతి చెందినట్టు హమాస్‌ ప్రకటన చేసింది. మరోవైపు, వెస్ట్‌బ్యాంక్‌లో భారీ ఆపరేషన్‌ నిర్వహిస్తోన్న ఇజ్రాయేల్‌కు ఆదివారం ఎదురుదెబ్బ తగిలింది. ఓ పాలస్తీనా మిలిటెంట్‌ కాల్పుల్లో ముగ్గురు ఇజ్రాయేల్ పోలీసులు మృతిచెందారు. దక్షిణ వెస్ట్‌బ్యాంక్‌ వెంబడి ఉన్న రహదారిపై పోలీసులు ప్రయాణిస్తున్న సమయంలో ఈ దాడి చోటు చేసుకుంది. అనంతరం ఆ పాలస్తీనా మిలిటెంట్‌ను ఇజ్రాయెల్‌ దళాలు హతమార్చాయి.

గత అక్టోబరు 7 నాటి మారణహోమానికి ప్రతీకారంగా గాజాలోని హమాస్‌పై ఇజ్రాయేల్ యుద్దం ప్రకటించింది. ఇప్పటి వరకు ఈ యుద్ధం 40,738 మంది పౌరులు ప్రాణాలు కోల్పోయారు. వీరిలో అధిక శాతం మంది మహిళలు, చిన్నారులే ఉన్నట్టు ఐక్యరాజ్యసమితి ఆవేదన వ్యక్తం చేసింది.