తెలంగాణకు పవన్ కళ్యాణ్ భారీ విరాళం

ప్రస్తుతం గత కొన్ని రోజులుగా కురుస్తున్న భారీ వర్షాలకు రెండు తెలుగు రాష్ట్రాలు అతలాకుతలం అవుతున్నాయి. ఈ క్రమంలోనే వేలాదిమంది నిరాశ్రయులై.. రోడ్లపైకి వచ్చేశారు. తాగడానికి మంచినీరు, తినడానికి భోజనం లేక అవస్థలు పడుతున్నారు. ప్రస్తుత విపత్కర పరిస్థితుల్లో ప్రముఖులు వరద బాధితులకు అండగా నిలుస్తున్నారు. తమ వంతు సాయాన్ని ప్రకటిస్తున్నారు. ఎంపీలు, ఎమ్మెల్యేలు, మంత్రులు, రాజకీయ నాయకులే కాకుండా సినీ సెలబ్రిటీలు, బిజినెస్‌మెన్‌లు ముందుకు వచ్చి.. భారీగా ఆర్థిక సహాయం చేస్తున్నారు. ఈ క్రమంలోనే ఆంధ్రప్రదేశ్ డిప్యూటీ సీఎం, జనసేన అధినేత, పవర్ స్టార్ పవన్ కళ్యాణ్.. ఇప్పటికే తన సొంతంగా ఏపీకి రూ. కోటి విరాళం ప్రకటించగా.. తాజాగా తెలంగాణకు కూడా రూ. కోటి ఆర్థిక సహాయం ఇస్తానని హామీ ఇచ్చారు.

తాజాగా విజయవాడలో నిర్వహించిన మీడియా సమావేశంలో పాల్గొన్న పవన్ కళ్యాణ్.. ఈ ఆర్థిక సహాయం ప్రకటించారు. తానే స్వయంగా తెలంగాణ ముఖ్యమంత్రి రేవంత్ రెడ్డిని కలిసి రూ. కోటి చెక్కును అందిస్తానని స్పష్టం చేశారు. ఆంధ్రప్రదేశ్‌లోని 400 గ్రామ పంచాయతీల్లో పారిశుద్ధ్య నిర్వహణకు తన వంతుగా లక్ష రూపాయల చొప్పున సొంతంగా అందజేస్తానని పవన్ కళ్యాణ్ ప్రకటించారు. ఇక పంచాయతీ రాజ్‌ ఉద్యోగులు, ఇంజినీర్లు.. వరద బాధితులకు విరాళం ప్రకటించడం పట్ల డిప్యూటీ సీఎం వారిని అభినందించారు.

2014-19లో వచ్చిన హుద్ హుద్‌ తుఫాన్‌ ప్రభావం వల్ల నష్టపోయిన బాధితులకు తాను రూ. 50 లక్షలు ఇచ్చినట్లు పవన్ కళ్యాణ్ ఈ సందర్భంగా గుర్తు చేశారు. ఇక గత కొన్ని రోజులుగా ఏపీలో కురుస్తున్న వర్షాలు, భారీ వరదల వల్ల 29 మంది ప్రాణాలు కోల్పోయారని తెలిపారు. మరో ఇద్దరు గల్లంతు అయ్యారని చెప్పారు. ఇక 200 పశువులు, వేల సంఖ్యలో కోళ్లు చనిపోయాయని వెల్లడించారు. 131 కేంద్రాల్లో పశువులకు చికిత్స కేంద్రాలు ఏర్పాటు చేసినట్లు పవన్ కళ్యాణ్ వివరించారు. రాష్ట్రవ్యాప్తంగా లక్షా 69 వేల హెక్టార్లలో పంట నష్టం జరిగిందని అధికారులు అంచనా వేసినట్లు తెలిపారు. 233 కిలోమీటర్ల పంచాయతీ రోడ్లు దెబ్బతిన్నాయని చెప్పారు. వరద ఉద్ధృతి తగ్గిన తర్వాత రోడ్లు, కల్వర్టులు బాగు చేస్తామని వెల్లడించారు.