జగ్గయ్యపేట మున్సిపల్ ఛైర్మన్ రాజీనామా,,,మంత్రి నారా లోకేష్ సమక్షంలో టీడీపీలో చేరిక

ఏపీలో వైఎస్సార్ కాంగ్రెస్ పార్టీకి వరుస షాకులు తగులుతున్నాయి. కొంతమంది ముఖ్యనేతలతో పాటుగా ద్వితీయ శ్రేణి నాయకులు కూడా పార్టీని వీడుతున్నారు. తాజాగా ఎన్టీఆర్ జిల్లాలో వైసీపీకి షాక్ తగిలింది. జగ్గయ్యపేట మున్సిపల్ ఛైర్మన్, కౌన్సిలర్లతో పాటుగా పలువురు వైసీపీ నేతలు పార్టీకి గుడ్ బై చెప్పారు. మంత్రి నారా లోకేష్ సమక్షంలో వారంతా టీడీపీ తీర్థం పుచ్చుకున్నారు. జగ్గయ్యపేట మున్సిపల్ ఛైర్మన్ రంగాపురం రాఘవేంద్రతో పాటుగా ముగ్గురు కౌన్సిలర్లు, వైసీపీ శ్రేణులు నారా లోకేష్ సమక్షంలో తెలుగుదేశం పార్టీ గూటికి చేరాయి. ఏడో వార్డు కౌన్సిలర్ పూసపాటి సీతారావమ్మ, 23వ వార్డు కౌన్సిలర్ రమాదేవి, 31వ వార్డు కౌన్సిలర్ వెంకట్రావుతో పాటుగా వారి కుటుంబసభ్యులు, అనుచరులు కూడా టీడీపీలో చేరారు.

మరోవైపు జగ్గయ్యపేట ఎమ్మెల్యే శ్రీరామ్ తాతయ్య నేతృత్వంలో నారా లోకేష్ సమక్షంలో వీరంతా టీడీపీ గూటికి చేరారు. నారా లోకేష్ వీరందరికీ కండువాలు కప్పి పార్టీలోకి ఆహ్వానించారు. ఈ సందర్భంగా మాట్లాడిన ఎమ్మెల్యే శ్రీరామ్ తాతయ్య.. వైసీపీ విధానాలు నచ్చకే ఆ పార్టీ నుంచి వలసలు జరుగుతున్నాయని అన్నారు. వైసీపీ నేత, మాజీ ఎమ్మెల్యే సామినేని ఉదయభాను కూడా త్వరలోనే వైసీపీని వీడుతారనే ప్రచారం నడుస్తోందంటూ శ్రీరామ్ తాతయ్య సంచలన వ్యాఖ్యలు చేశారు.

మరోవైపు జగ్గయ్యేపేట మున్సిపాలిటీలో వైసీపీకి 17, టీడీపీ 14 మంది కౌన్సిలర్లు ఉండేవారు. అయితే తాజాగా నలుగురు కౌన్సిలర్లు వైసీపీని వీడి టీడీపీలో చేరటంతో టీడీపీ బలం 18కి చేరింది. వైసీపీ బలం 13కు పడిపోయింది. దీంతో జగ్గయ్యపేట మున్సిపాలిటీ టీడీపీ వశమైంది. ఏపీలో ఇప్పటికే పలు మున్సిపాలిటీను టీడీపీ తన ఖాతాలో వేసుకుంది. టీడీపీ అధికారంలోకి వచ్చిన తర్వాత పలువురు కౌన్సిలర్లు, కార్పొరేటర్లు వైసీపీని వీడి టీడీపీలో చేరుతున్నారు. దీంతో మున్సిపాలిటీలు టీడీపీ వశం అవుతున్నాయి. ఇక 2024 జగ్గయ్యపేట ఎన్నికల విషయానికి వస్తే.. టీడీపీ నుంచి శ్రీరామ్ తాతయ్య పోటీచేస్తే.. వైసీపీ నుంచి సామినేని ఉదయభాను పోటీ చేశారు. అయితే ఈ ఎన్నికల్లో ఉదయభాను మీద శ్రీరామ్ తాతయ్య 15 వేలకుపైగా ఓట్ల మెజారిటీతో గెలుపొందారు.