డేటింగ్ కోసం సెలవు కావాలా నాయనా? ఉద్యోగులకు కంపెనీ బంపరాఫర్!

సెలవు పేరెత్తితే బాస్‌లు కస్సున లేస్తారు. కొన్ని సంస్థల్లో అయితే ఏదైనా అవసరం పడితే సెలవు కోసం బతిమిలాడుకునే పరిస్థితి. కానీ, ఓ సంస్థ మాత్రం ఉద్యోగులు అడక్కుండానే డేటింగ్ టూర్ కోసం సెలవులు ఇస్తానంటోంది. హాయిగా మీ భాగస్వామితో గడిపి రండి అంటూ యాజమాన్యమే అనడంతో ఉద్యోగులు ఎగిరి గంతేస్తున్నారు. ఇదేదే మన దేశంలో అనుకునేరు ఈ ఆఫర్ ఇచ్చింది థాయ్‌లాండ్‌కు చెందిన ఓ మార్కెటింగ్‌ కంపెనీ. అంతేకాదు, యువ ఉద్యోగులకు భాగస్వాములు లేకపోతే .. డేటింగ్ యాప్‌ సబ్‌స్క్రిప్షన్ కోసం కంపెనీయే ఖర్చు భరిస్తామంటోంది.

ఇలా ఎందుకు చేస్తున్నారని అంటే.. సర్వేల విషయం చెబుతోంది. లవ్ లేదా రిలేషన్‌షిప్‌లో ఉన్నవారు అందరికన్నా సంతోషంగా ఉంటారనీ, దీంతో వారి పనితీరు చాలా మెరుగ్గా ఉంటుందని పలు అధ్యయనాల్లో వెల్లడయ్యింది. ఈ ఫలితాలనే ప్రామాణికంగా తీసుకుని ‘టిండర్‌ లీవ్స్‌’ పేరిట ఉద్యోగికి ఎటువంటి నిబంధనలు లేకుండా కొన్ని రోజులు సెలవులు ఇస్తున్నట్టు ఆ సంస్థ పేర్కొంది.

ఒకవేళ భాగస్వామి లేకంటే డేటింగ్‌ యాప్స్‌లో జోడీ కుదుర్చుకునేందుకు సబ్‌స్క్రిప్షన్లకు కూడా సహకారం అందిస్తామని తెలిపింది. ఆరు నెలల పాటు టిండర్ ప్లాటినమ్, టిండర్ గోల్డ్ ప్యాకేజీలు అందిస్తోంది. అయితే, కంపెనీ నిర్ణయం తీసుకోవడం వెనుక ఓ మహిళా ఉద్యోగి కారణం. ‘డేట్‌కి వెళ్లాలని ఉన్నా, పని ఒత్తిడితో వెళ్లలేక పోతున్నా’నంటూ మేనేజర్‌ దగ్గర ఆమె వాపోయింది. దీంతో కరిగిపోయిన అతడు ఈ విషయాన్ని యాజమాన్యం దృష్టికి తీసుకెళ్లాడు. వాళ్లూ సానుకూలంగా స్పందించి టిండర్ లీవ్స్‌ ప్రకటించారు. ఈ విషయాన్ని ఆ సంస్థ తన అధికారిక లింక్డ్‌ఇన్‌ అకౌంట్‌లో పోస్ట్ చేసింది.

తమ భాగస్వామితో ఎవరైనా డేటింగ్‌కు వెళ్లాలని అనుకుంటే వారం రోజుల ముందుగానే సంస్థకు తెలియజేయాల్సి ఉంటుంది. కానీ, ఏడాది జులై 9- డిసెంబరు 31 మధ్య సంస్థలో కొత్తగా చేరి ప్రొబేషన్ పూర్తయినవారికి మాత్రమే అని తెలిపింది పేర్కొంది. కాగా, ఈ ఏడాది తొలినాళ్లలో చైనాకు చెందిన సూపర్ మార్కెట్ కంపెనీ ఫ్యాట్ డాంగ్ లై ‘సాడ్ లీవ్స్’ తీసుకొచ్చింది. ఏడాదిలో 40 సాధారణ సెలవులు, చైనా కొత్త ఏడాదికి ఐదు రోజులతో పాటు ఈ 10 సెలవులు అదనం. ఏ ఉద్యోగి అయినా పనిచేయడానికి ఆసక్తి లేకుంటే ఈ సెలవులు తీసుకోవచ్చు. ఆ కంపెనీ ప్రకటన గురించి విన్న కుర్ర ఉద్యోగులు.. ‘ఈ క్రేజీ సెలవులు మాకూ ఉంటే బాగుండు’ అని తెగ ముచ్చటించుకుంటున్నారు.

ఇదిలా ఉండగా, తన ఉద్యోగుల శ్రేయస్సు గురించి థాయ్‌లాండ్ కంపెనీ ఆలోచిస్తుండగా.. ఒక ఆస్ట్రేలియన్ సంస్థ మాత్రం పనివేళలో తన ఉద్యోగులు కార్యాలయ ప్రాంగణం నుంచి బయటకు వెళ్లరాదని హుకుం జారీచేసింది. మినరల్ రిసోర్సెస్ మేనేజింగ్ డైరెక్టర్ క్రిస్ ఎల్లిసన్.. ఉద్యోగులు తమ పని వేళల్లో బయటకు రాకుండా పెర్త్‌లోని తమ కంపెనీ ప్రధాన కార్యాలయంలో సౌకర్యాలను ఏర్పాటు చేస్తామని తెలిపారు.