ప్రపంచాన్ని వణికిస్తున్న కొత్త కరోనా వేరియంట్.. 27 దేశాల్లో భయాందోళనలు

గత కొన్ని నెలలుగా కరోనా కేసుల సంఖ్య ప్రపంచవ్యాప్తంగా తగ్గుతోంది అని సంతోషపడే లోపే పిడుగు లాంటి వార్త బయటికి వచ్చింది. కొవిడ్ వైరస్ అంతం అవుతుంది అనుకున్న ప్రతీసారి.. కొత్త రకం వేరియంట్లు విస్తరిస్తూనే ఉన్నాయి. అయితే అందులో చాలా వేరియంట్లు ప్రాణాలకు ముప్పు తీసుకురానప్పటికీ.. రోజుకో వేరియంట్ పుట్టుకురావడం మాత్రం తీవ్ర ఆందోళన కలిగిస్తోంది. తాజాగా ఎక్స్ఈసీ అనే కొత్త కరోనా వేరియంట్ కారణంగా 27 దేశాల్లో కొవిడ్ కేసుల సంఖ్య భారీగా పెరుగుతోంది. ఈ నేపథ్యంలోనే అలర్ట్ అయిన శాస్త్రవేత్తలు.. ఈ ఎక్స్ఈసీ వేరియంట్ సోకినవారి నమూనాలు తీసుకుని పరీక్షలు జరుపుతున్నారు. ఈ వేరియంట్ పట్ల అప్రమత్తంగా ఉండాలని ప్రజలకు హెచ్చరికలు చేస్తున్నారు.

అయితే ఈ ఎక్స్ఈసీ కొవిడ్ వేరియంట్ అత్యంత ప్రమాద‌క‌ర‌మైందని శాస్త్రవేత్తలు చెబుతున్నారు. దీని వ్యాప్తి చాలా వేగంగా ఉందని పేర్కొంటున్నారు. ఈ ఎక్స్ఈసీ వైరస్‌ను మొట్టమొదటగా జర్మనీలో గుర్తించగా.. ప్రస్తుతం యూరోప్‌లోని చాలా దేశాల్లో మెరుపు వేగంతో వ్యాప్తి చెందుతోంది. జర్మనీ త‌ర్వాత ఈ ఎక్స్ఈసీ వేరియంట్ కేసులు బ్రిట‌న్‌, అమెరికా, డెన్మార్క్‌తో పాటు ఇతర దేశాల్లోనూ వెలుగు చూశాయి. ఒమిక్రాన్ వేరియంట్‌కు స‌బ్‌ లీనియేజ్‌గా ఉన్న ఈ కొత్త వేరియంట్‌లో రకరకాల మ్యుటేష‌న్లు జ‌రుగుతున్నట్లు శాస్త్రవేత్తలు గుర్తించారు.

గ‌తంలో ప్రపంచ దేశాలను వణికించిన ఒమిక్రాన్ స‌బ్‌ వేరియంట్లు అయిన కేఎస్.1.1, కేపీ.3.3 త‌ర‌హాలోనే ఈ కొత్త ఎక్స్ఈసీ కేసులు కూడా వ్యాపిస్తున్నట్లు తెలుస్తోంది. ఈ క్రమంలోనే 27 దేశాల నుంచి 500 నమూనాలను సేకరించి వాటిని ప‌రీక్షిస్తున్నారు. పోలాండ్‌, నార్వే, లక్సెంబ‌ర్గ్‌, ఉక్రెయిన్, పోర్చుగ‌ల్‌, చైనా లాంటి దేశాల్లో ఇప్పటివరకు ఈ ఎక్స్ఈసీ కొవిడ్ కేసులు న‌మోదయ్యాయి. ఇటీవ‌లి కాలంలో సోకుతున్న కొవిడ్ వేరియంట్లలో ఎక్స్ఈసీ రకం కరోనా వేరియంట్‌కు వ్యాప్తి వేగం అధికంగా ఉన్నట్లు లండ‌న్ జెన‌టిక్స్ కాలేజీ ప్రొఫెస‌ర్ ఫ్రాంకోసిస్ బ‌ల్లాక్స్ వెల్లడించారు.

ఈ ఎక్స్ఈసీ కరోనా వైరస్ సోకిన వారికి ఉండే లక్షణాలను కూడా శాస్త్రవేత్తలు గుర్తించారు. జ్వరం, గొంతు నొప్పి, ద‌గ్గు, వాస‌న కోల్పోవ‌డం, అకస్మాత్తుగా బ‌రువు త‌గ్గడం, ఒళ్లు నొప్పులు లాంటి సాధారణ కొవిడ్ వైరస్ ల‌క్షణాలు ఉంటాయని పేర్కొన్నారు. ఒమిక్రాన్ వేరియంట్‌కు చెందిన వేరియంట్ కావడం వ‌ల్ల.. ఇప్పటివరకు ఉన్న వ్యాక్సిన్లు, బూస్టర్లతో ర‌క్షణ క‌ల్పించ‌వ‌చ్చని అమెరికా సీడీసీ తెలిపింది. ఈ వైరస్ సోకిన వారు స్వచ్ఛమైన గాలిని పీల్చాల‌ని సూచించింది. ఈ ఎక్స్ఈసీ వేరియంట్ సోకిన వారిని నిశితంగా ప‌రిశీలించాల‌ని శాస్త్రవేత్తలు చెబుతున్నారు.