ఇదెక్కడి విడ్డూరం.. నిద్రపోయి రూ.9 లక్షలు గెలుచుకున్న యువతి, ఎలాగంటే
national | Suryaa Desk | Published : Tue, Oct 01, 2024, 11:22 PM
చాలా మంది డబ్బులు సంపాదించాలంటే ఎక్కువగా పనిచేస్తూ ఉంటారు. ఎక్కువ సమయం పనిచేస్తే ఎక్కువ డబ్బులు వెనకేయవచ్చని ఆలోచిస్తూ ఉంటారు. దీని కోసం నిద్ర, సెలవులు లేకుండా పగలు, రాత్రి తీవ్రంగా కష్టపడి పనిచేస్తారు. కానీ ఈ యువతి మాత్రం పనిచేయకుండానే ఏకంగా రూ.9 లక్షలు సాధించింది. అది కూడా నిద్రపోవడం వల్ల అంత డబ్బు సంపాదించింది. కర్ణాటక రాజధాని బెంగళూరుకు చెందిన యువతి.. తాజాగా నిర్వహించిన నిద్ర పోటీల్లో స్లీప్ ఛాంపియన్‌గా నిలిచి.. రూ.9 లక్షలు గెలుచుకుంది. అయితే బాగా నిద్రపోవడం అంటే ఇష్టం ఉన్న ఆ యువతి.. తన ఇష్టంతోనే ఇలా లక్షలు సంపాదించుకుంది.
బెంగళూరుకు చెందిన ఇన్వెస్ట్‌మెంట్‌ బ్యాంకర్‌ అయిన సాయిశ్వరి పాటిల్.. ఎక్కువసేపు నిద్రపోవడం ద్వారా స్లీప్ ఛాంపియన్‌గా నిలిచింది. బెంగళూరు స్టార్టప్‌ ఇన్షియేటివ్‌ అయిన వేక్ఫిట్ సంస్థ వరుసగా మూడో సీజన్‌లోనూ ‘స్లీప్ ఇంటర్న్షిప్ ప్రోగ్రాం’ను నిర్వహించింది. ఈ స్లీప్ ఇంటర్న్షిప్ ప్రోగ్రాంలో భాగంగా అందులో పాల్గొనే పోటీదారులు ప్రతీ రాత్రి 8 నుంచి 9 గంటలు కచ్చితంగా నిద్రపోవాల్సి ఉంటుంది. పోటీదారులు నిద్ర అలవాట్లను మెరుగుపరిచేందుకు, స్లీప్ ఛాంపియన్‌ టైటిల్‌ గెలుచుకునే అవకాశాన్ని కల్పించేందుకు స్లీప్ ఎక్స్‌పర్ట్స్‌తో వేక్ఫిట్ సంస్థ.. కొన్ని వర్క్‌షాపులు కూడా నిర్వహిస్తూ ఉంటుంది.
ఈ వేక్ఫిట్ అనేది పరుపుల కంపెనీ కాగా.. తమ పరుపుల అడ్వర్టైజ్‌మెంట్‌లో భాగంగా స్లీప్ ఇంటర్న్షిప్ అనే ప్రోగ్రామ్‌ను ఏర్పాటు చేస్తూ ఉంటుంది. ఇక సాయిశ్వరి పాటిల్‌కు నిద్రపోవడం అంటే చాలా ఇష్టం కావడంతో తన అలవాటుతో డబ్బులు సంపాదించాలని నిర్ణయించుకుంది. ఈ క్రమంలోనే వేక్ఫిట్ సంస్థ 12 మంది అభ్యర్థులను ఎంపిక చేయగా.. అందులో సాయిశ్వరి పాటిల్ కూడా ఉంది.
ఈ ఇంట్న్‌షిప్‌లో భాగంగా వేక్ఫిట్ కంపెనీ తయారు చేసిన పరుపులపై.. 2 నెలలపాటు రోజూ 9 గంటలు నిద్రపోవాల్సి ఉంటుంది. ఇలా 2 నెలల పాటు రోజూ 9 గంటలు నిద్రపోయిన సాయిశ్వరి పాటిల్.. ఈ ఇంటర్న్షిప్ ప్రోగ్రామ్‌లో పాల్గొన్న 12 మందిలో స్లీప్ ఛాంపియన్‌గా నిలిచి ఏకంగా రూ.9 లక్షలు సొంతం చేసుకుంది. ప్రస్తుతం ఈ వార్త సోషల్ మీడియాలో తెగ వైరల్ అవుతుండటంతో అది చూసిన నెటిజన్లు.. ఇలా కూడా డబ్బులు ఇస్తారా అని ఆశ్చర్యపోతున్నారు. అంతేకాకుండా తమకు కూడా ఇలాంటిది ఏదైనా ఆఫర్ ఉంటే చెప్పండి అంటూ కామెంట్లు చేస్తున్నారు. ఇక ఇది విని చాలా మంది నోరెళ్లబెడుతున్నారు.
|
|