జైలులోనే లారెన్స్ బిష్ణోయ్ హత్యకు కుట్ర.. ఎవరీ బంబిహా గ్యాంగ్

 ప్రముఖులను టార్గెట్ చేస్తూ హత్యలు, బెదిరింపులకు దిగుతున్న లారెన్స్ బిష్ణోయ్‌ గ్యాంగ్ గురించి ప్రస్తుతం దేశంలో హాట్ టాపిక్‌ నడుస్తోంది. ఈ నేపథ్యంలోనే తాజాగా లారెన్స్ బిష్ణోయ్‌ను చంపేందుకు బంబిహా అనే మరో గ్యాంగ్ ప్రయత్నాలు చేస్తోంది. అయితే ఆ బంబిహా గ్యాంగ్ లీడర్ కూడా జైలులోనే ఉండగా.. జైలులోనే లారెన్స్ బిష్ణోయ్‌ను హత్య చేసేందుకు ప్లాన్ చేస్తున్నట్లు తెలుస్తోంది. ఇటీవల ఢిల్లీలో జరిగిన కాల్పుల ఘటనలో పట్టుబడిన వారిని విచారించగా.. ఈ విషయం వెలుగులోకి వచ్చింది. అయితే ఆ బంబిహా గ్యాంగ్ లీడర్‌ను కూడా లారెన్స్ బిష్ణోయ్ అడ్డు తొలిగించుకోవాలని చూస్తున్నట్లు సమాచారం. తన హిట్ లిస్ట్‌లో బంబిహా గ్యాంగ్ ఉందని స్వయంగా లారెన్స్ బిష్ణోయ్.. ఎన్ఐఏ అధికారులు సబర్మతీ జైలులో చేసిన విచారణ సమయంలో చెప్పినట్లు తెలుస్తోంది.

లారెన్స్‌ బిష్ణోయ్‌ని హత్య చేసి.. తన గ్యాంగ్‌ను వార్తల్లోకి తీసుకువచ్చేందుకు బంబిహా గ్యాంగ్ లీడర్ కుషాల్ చౌద్రీ ప్లాన్ చేస్తున్నట్లు తెలుస్తోంది. తన అనుచరుడు పవన్ షూకీన్ అలియాస్ సోనూతో కలిసి.. జైలులోనే లారెన్స్ బిష్ణోయ్‌ని మట్టుబెట్టేందుకు పథకం రచించినట్లు ఇటీవల ఢిల్లీలో జరిగిన కాల్పుల ఘటన దర్యాప్తులో ఈ విషయం వెల్లడైంది. ఈ నేపథ్యంలోనే అమెరికాలోని కాలిఫోర్నియాలో ఉంటున్న పవన్‌ షూకీన్.. ఇద్దరు షార్ప్‌ షూటర్లతో అక్టోబర్‌ 26వ తేదీన ఢిల్లీ రాణీబాగ్‌లోని ఓ బిజినెస్‌మెన్ ఇంటివద్ద రెక్కీ నిర్వహించి కాల్పులు జరిపించాడు. ఆ తర్వాత అతడిని రూ.15 కోట్లు చెల్లించాలని డిమాండ్‌ చేశాడు.

డబ్బులు ఇవ్వకపోతే హత్య తప్పదని బెదిరింపులకు దిగడంతో.. డబ్బులు ఇచ్చేందుకు ఆ బిజినెస్‌మెన్ కూడా సిద్ధమైనట్లు తేలింది. ఈలోపు ఆ ఇద్దరు షార్ప్‌ షూటర్లను ఢిల్లీ పోలీసులు అరెస్ట్ చేశారు. వారి వద్ద నుంచి సెమీ ఆటోమేటిక్‌ తుపాకులను స్వాధీనం చేసుకున్నారు. వారిని విచారించగా లారెన్స్‌ బిష్ణోయ్‌ని చంపేందుకు ఢిల్లీ జైలులో ఉన్న కుషాల్ చౌధ్రీ ప్రయత్నాలు చేస్తున్నట్లు తేలింది. లారెన్స్ బిష్ణోయ్‌ని హత్య చేసేందుకు కావాల్సిన డబ్బుల కోసమే ఆ బిజినెస్‌మెన్‌ను బెదిరించినట్లు గుర్తించారు.

కుషాల్‌ చౌద్రీని 2019లో థాయ్‌లాండ్‌లో అరెస్ట్ చేసి భారత్‌కు తరలించారు. ఆ తర్వాత కుషాల్ చౌద్రీ స్థావరాలపై ఎన్‌ఐఏ అధికారులు వరుసగా దాడులు చేసి కట్టడి చేసింది. పంజాబీ సింగర్ సిద్ధూ మూసేవాల హత్యకు ప్రతీకారంగా లారెన్స్‌ బిష్ణోయ్‌ను చంపేస్తానని కుషాల్ చౌద్రీ 2022లో సోషల్‌ మీడియాలో ఒక వీడియోను విడుదల చేశాడు. గతేడాది పోలీస్‌ కస్టడీలో ఉండగా కుషాల్ చౌద్రీ ఆత్మహత్యకు యత్నించినట్లు వార్తలు వచ్చాయి. ఇక లారెన్స్‌ బిష్ణోయ్ కూడా కుశాల్‌ చౌద్రీని అంతం చేయాలని చూస్తున్నట్లు తెలుస్తోంది. ఇటీవల సబర్మతి జైల్లో అతడిని ఎన్‌ఐఏ ప్రశ్నించగా.. తన హిట్‌ లిస్ట్‌లో బంబిహా గ్యాంగ్‌ లీడర్ కుషాల్ చౌద్రీ ఉన్నట్లు చెప్పినట్లు తెలుస్తోంది.