ప్రపంచం మొత్తం చుట్టొచ్చిన ఫ్రెంచ్ రాయబారిని.. చోర కళతో ఆశ్చర్యపరిచిన ఢిల్లీ దొంగలు!

దేశ రాజధాని న్యూఢిల్లీలో ఫ్రెంచ్ రాయబారి థియెర్రీ మథోవు ఫోన్ చోరీకి గురైంది. అక్టోబర్ 20న థియెర్రీ, తన భార్యతో కలిసి చాందినీ చౌక్ ఏరియాలో దీపావళి షాపింగ్‌కు వెళ్లారు. జైన మందిరం సమీపంలో ఆయన జేబులో నుంచి మొబైల్ ఫోన్‌ను ఎవరో దొంగిలించారు. మరుసటి రోజున ఫ్రెంచ్ ఎంబసీ పోలీసులకు ఫిర్యాదు చేసింది. దీంతో రంగంలోకి దిగిన పోలీసులు సీసీటీవీ కెమెరాలను పరిశీలించి ఆ ఏరియాను జల్లెడ పట్టారు.

ఫోన్ దొంగతనం చేసిన నలుగుర్ని అరెస్ట్ చేసిన పోలీసులు.. వారి దగ్గర్నుంచి ఫోన్‌ను రికవరీ చేశారు. ఈ కేసులో నిందితులైన నలుగురి వయసు 20 నుంచి 25 ఏళ్ల మధ్య ఉంటుందని.. వీరంతా యమునా ఒడ్డున ఉన్న ప్రాంతంలో నివసిస్తున్నారని పోలీసులు తెలిపారు. ప్రస్తుతం కేసు దర్యాప్తు కొనసాగుతోందన్నారు.

ఢిల్లీలోని ప్రముఖ ప్రాంతాల్లో ఒకటైన చాందినీ చౌక్‌లో ఓ దేశ రాయబారి ఫోన్‌ చోరీకి గురి కావడం పట్ల చాలా మంది ఆశ్చర్యం వ్యక్తం చేస్తున్నారు. దొంగలు ఆయన్ను గుర్తు పట్టకపోయి ఉండొచ్చని.. ఆ ప్రాంతంలో సెక్యూరిటీ పెంచాల్సిన అవసరం ఉందని ఈ ఘటన చెబుతోందని కొందరు అభిప్రాయపడ్డారు. చాందినీ చౌక్ ఏరియాలో ఫోన్లు చోరీ కావడం సాధారణమైన విషయమని.. ఆయన వీఐపీ కాబట్టి పోలీసులు ఫోన్‌ను వెతికి పెట్టారని.. సాధారణ వ్యక్తుల ఫోన్లు పోతే ఇలాగే వెతుకుతారా? అని కొందరు ప్రశ్నిస్తున్నారు.

సిగ్గు పడాలంటూ ట్వీట్లు..

ఇది మనమంతా సిగ్గుపడాల్సి విషయం అని కొందరు నెటిజన్లు అభిప్రాయపడ్డారు. అంతే కాదు.. ఇండియాతో పోలిస్తే ఫ్రాన్స్, స్పెయిన్ లాంటి దేశాల్లో నేరాలు, చోరీలు ఎక్కువగా జరుగుతున్నాయని, అందుకు సంబంధించిన సమాచారాన్ని మన కళ్ల ముందుంచేందుకు కొందరు నెటిజన్లు ప్రయత్నించారు.

ఎవర్రీ థియెర్రీ..?

డాక్టర్ థియెర్రీ మథోవు 2023 సెప్టెంబర్ 17న భారత్‌లో ఫ్రెంచ్ రాయబారిగా నియమితులయ్యారు. ఆయన ఆసియాలోని పరిస్థితులను క్షుణ్నంగా అధ్యయనం చేశారు. 1989లో వాషింగ్టన్‌ డీసీలోని ఫ్రెంచ్ ఎంబసీలో రాయబారిగా చేరడం ద్వారా ఆయన దౌత్యవేత్తగా జీవితాన్ని ప్రారంభించారు. 1993లో ఆయన బీజింగ్‌లోని ఫ్రెంచ్ ఎంబసీలో నియమితులయ్యారు. ఆసియా వ్యవహారాల్లో స్పెషలైజేషన్ చేసిన థియెర్రీ,, మూడుసార్లు చైనాలో పని చేశారు. మొత్తం 13 ఏళ్లపాటు ఆయన చైనాలో పని చేశారు. 2006 నుంచి 2010 వరకు షాంఘైలో కాన్సుల్ జనరల్‌గా థియెర్రీ వ్యవహరించారు.

2010 నుంచి 2015 వరకు మయన్మార్‌లో ఫ్రాన్స్ అంబాసిడర్‌గా పని చేసిన థియెర్రీ.. ఆ తర్వాత రెండేళ్లు ఫిలిప్పిన్స్‌లో రాయబారిగా పని చేశారు. ఆ సమయంలోనే పలావ్, మార్షల్ ఐలాండ్స్, ఫెడరేటెడ్ స్టేట్స్ ఆఫ్ మైక్రోనేసియా దేశాలకు నాన్ రెసిడెంట్ అంబాసిడర్‌గా వ్యవహరించారు.